വാഷിങ്ടണ്: ഡൊണാള്ഡ് ട്രംപ് യുഎസ് പ്രസിഡന്റ് തിരഞ്ഞെടുപ്പുമായി ബന്ധപ്പെട്ട് ഉയര്ത്തിയ നിയമപരമായ വെല്ലുവിളികള്ക്ക് ധനസഹായം നല്കാന് റിപ്പബ്ലിക്കന് പാര്ട്ടി 60 ദശലക്ഷം ഡോളര് (443 കോടിയോളം രൂപ) സമാഹരിക്കാനൊരുങ്ങുന്നു. ചൊവ്വാഴ്ച വോട്ടെടുപ്പ് അവസാനിച്ചത് മുതല് തന്നെ ട്രംപ് ടീം തിരഞ്ഞെടുപ്പില് ക്രമക്കേട് നടന്നെന്ന് ആരോപിച്ചിരുന്നു. ഇതിന് പിന്നാലെ നിയമസഹായത്തിന് ധനസമാഹരണത്തിനുള്ള മെയിലുകള് അയക്കാനും തുടങ്ങി.
റിപ്പബ്ലിക്കന് ദേശീയ സമിതിയുടെ ഫണ്ട് സമാഹരണ അഭ്യര്ത്ഥന ലഭിച്ച ഒരു റിപ്പബ്ലിക്കന് അനുയായിയാണ് നിയമസഹായത്തിന് ട്രംപ് ധനസമാഹരണം നടത്തുന്ന കാര്യം അറിയിച്ചതെന്ന് റോയിട്ടേഴ്സ് റിപ്പോര്ട്ട് ചെയ്തു. എന്നാല്, ട്രംപ് ടീമോ റിപ്പബ്ലിക്കന് ദേശീയ സമിതിയോ ഇതിനോട് പ്രതികരിച്ചിട്ടില്ല.
തെരഞ്ഞെടുപ്പ് ഫലവുമായി ബന്ധപ്പെട്ട് എതിരാളിയും ഡെമോക്രാറ്റിക് സ്ഥാനാര്ഥിയുമായ ജോ ബൈഡനെതിരെ നിരവിധി സംസ്ഥാനങ്ങളിലെ കോടതികളില് ട്രംപ് ടീം പരാതി നല്കിയിട്ടുണ്ട്.
അതേ സമയം തിരഞ്ഞെടുപ്പ് പ്രചാരണങ്ങളിലൂടെ ബൈഡനാണ് ഏറ്റവും കൂടുതല് ഫണ്ട് സമാഹരിച്ചതെന്നാണ് ഫെഡറല് തിരഞ്ഞെടുപ്പ് കമ്മീഷന്റെ വെളിപ്പെടുത്തല്.
