മൈസൂര്: താഴ്ന്ന ജാതിയില് പെട്ടവരുടെ മുടിവെട്ടിയതിന് ബാര്ക്കര്ക്ക് ഊരുവിലക്ക്. മൈസൂരിലെ ഹല്ലാറ ഗ്രാമത്തില് നടന്ന സംഭവത്തില് മല്ലികാര്ജ്ജുന് ഷെട്ടി എന്ന ബാര്ബര്ക്കാണ് മുന്നാക്ക സമുദായത്തില് പെട്ടവര് സാമൂഹ്യ ബഹിഷ്ക്കരണം ഏര്പ്പെടുത്തിയത്. പട്ടികജാതി, പട്ടികവര്ഗ്ഗ, മറ്റു പിന്നാക്ക സമുദായങ്ങളില് പെടുന്നവരുടെ മുടിവെട്ടുന്നതിനെതിരേയായിരുന്നു നടപടി.
ഗ്രാമത്തിലെ ബാര്ബറായ മല്ലികാര്ജ്ജുന് ഷെട്ടി സ്വന്തമായി ബാര്ബര് ഷോപ്പ് നടത്തിവരികയാണ്. അവര്ണ്ണ വിഭാാഗത്തില് ഉള്പ്പെടുന്ന ആളുകള് കടയില് എത്തുന്നതും മുടി വെട്ടുന്നതും ശ്രദ്ധയില്പ്പെട്ടതോടെ മുന്നാക്ക വിഭാഗത്തിലെ ചിലര് കടയിലെത്തി ഇദ്ദേഹത്തെ ഭീഷണിപ്പെടുത്തിയിരുന്നു.
എസ്സി, എസ്ടി, ഒബിസി വിഭാഗത്തിലെ ആളുകള്ക്ക് മുടി മുറിക്കുന്നതിനും ഷേവ് ചെയ്യുന്നതിനും പ്രത്യേക നിരക്ക് ഏര്പ്പെടുത്തണമെന്നതായിരുന്നു അവരുടെ ആവശ്യം. മുടിമുറിക്കുന്നതിന് 300 രൂപയും ഷേവ് ചെയ്യുന്നതിന് 200 രൂപയും വാങ്ങാനാണ് നിര്ദ്ദേശിച്ചത്. എന്നാല് മല്ലികാര്ജ്ജുന് ഇത് അംഗീകരിച്ചില്ല. നിലവിവിലെ നിരക്കുകളായ 80, 60 രൂപയില് നിന്നും ഒരു വിഭാഗത്തിനു വേണ്ടിമാത്രം നിരക്കുവര്ദ്ധന സാധ്യമാക്കില്ലെന്ന നിലപാടായിരുന്നു അദ്ദേഹം സ്വീകരിച്ചത്. ഇതോടെ മല്ലികാര്ജ്ജുനും കുടുംബത്തിനുമെതിരെ മുന്നാക്ക സമുദായാംഗങ്ങള് ഭീഷണി മുഴക്കി.
ഇതിനെതിരെ അദ്ദേഹവും കുടുംബവും പോലീസിനെയും തഹസില്ദാരെയും സമീപിച്ചെങ്കിലും ഫലമുണ്ടായില്ല. പോലീസ് സ്ഥലത്തെത്തി ഭീഷണിപ്പെടുത്തിയ ആളുകളെ താക്കീതു ചെയ്തിരുന്നു. എന്നാല് കുറച്ചു ദിവസങ്ങള്ക്കു ശേഷം വീണ്ടും അവര് ഭീഷണിയുമായി രംഗത്തുവന്നു. 50,000 രൂപ പിഴയായി നല്കണമെന്നാണ് അവര് ആവശ്യപ്പെടുന്നത്.
മകനെ നിര്ബന്ധപൂര്വ്വം മദ്യം കഴിപ്പിക്കുകയും നഗ്നനാക്കി വീഡിയോ ചിത്രീകരിച്ച് സമൂഹമാധ്യമങ്ങളില് പ്രചരിപ്പിക്കുകയും ചെയ്യുമെന്നാണ് നിലവിലെ ഭീഷണി. ഇംഗിതത്തിനു വഴങ്ങാത്തതാണ് ഇപ്പോള് മല്ലികാര്ജ്ജുന് ഷെട്ടിക്കും കുടുംബത്തിനും എതിരെ സമൂഹ്യ ബഹിഷ്ക്കരണം പ്രഖ്യാപിച്ചത്.
