മുംബൈ: രാജ്യത്തിന്റെ സമ്പദ് വ്യവസ്ഥ ഒരു കാലത്ത് അംബാനി കുടുംബത്തിന്റെ കൈകളിലായിരുന്നു. ദിരുബായ് അംബാനിയുടെ സാമ്പ്രാജ്യം അദ്ദേഹത്തിന്റെ പെട്ടെന്നുണ്ടായ മരണത്തോടെ പ്രതിസന്ധിയിലായി. പക്ഷെ ആരും പ്രതീക്ഷിക്കാതെ രണ്ടു ചെറുപ്പക്കാര് ആ പ്രതിസന്ധികളെയെല്ലാം മറികടന്ന് അംബാനി കുടുംബത്തിന്റെ പ്രതാപം നിലനിര്ത്തി. ദിരുബായ് അംബാനിയുടെ മൂത്ത മകന് മുകേഷ് അംബാനിയും ഇളയമകന് അനില് അംബാനിയും പിന്നീടങ്ങോട്ട് ഇന്ത്യന് സാമ്പത്തിക മേഖലയിലെ മാറ്റിനിര്ത്താന് സാധിക്കാത്ത വിധം ശക്തികളായി മാറി. ഇന്ധന മേഖല മുതല് ടെലികോം മേഖലവരെ ഈ സഹോദരന്മാരുടെ കൈകളിലായി.
എന്നാല് മുകേഷ് അംബാനി കൂടുതല് ശക്തനായതോടൊപ്പം അനില് അംബാനി കൂടുതല് ദുര്ബ്ബലനായി മാറുന്ന കാഴ്ചയാണ് പിന്നീടുണ്ടായത്്. മുകേഷ് അംബാനി ജിയോയിലൂടെ വിപ്ലവകരമായ മാറ്റം രാജ്യത്തു സാധ്യമാക്കിയപ്പോള് അനില് അംബാനിയുടെ ടെലികോം കമ്പനി തകര്ന്നടിഞ്ഞു. കടം കയറി വഴിമുട്ടി നില്ക്കുന്ന അനുജന്റെ മുന്നിലൂടെ മുകേഷ് അംബാനി തന്റെ കമ്പനികളെ ലോകത്തിലെ തന്നെ ഇരുപതു ബ്രാന്റുകളില് ഒന്നാക്കി മാറ്റുന്നതിന്റെ തിരക്കുകളില്ലായിരുന്നു. അപ്പോഴേക്കും അനില് അംബാനി കടം നികത്താനായി തന്റെ ഉടമസ്ഥതയിലുള്ള കമ്പനികള് ഓരോന്നോരോന്നായി വിറ്റു തുടങ്ങിയിരുന്നു. നിലവില് റിലയന്സ് ഇന്ഫ്രാടെല്ലിന്റെ ആസ്തികളും മുകേഷ് അംബാനിയുടെ ജിയോയ്ക്ക് നല്കാന് അനുമതി ലഭിച്ചിരിക്കുകയാണ്.
ദേശീയ കമ്പനി ലോ ട്രിബ്യൂണല് ആണ് അനുമതി നല്കിയത്. പ്ലാന് പ്രകാരം അനില് അംബാനിയുടെ റിലയന്സ് ഇന്ഫ്രാടെല്ലിന്റെ ടവറുകള് ഇനി റിലയന്സ് ജിയോയ്ക്ക് സ്വന്തമാകും. കടം നല്കിയവര്ക്കായി 4,400 കോടി രൂപ ജിയോയ്ക്കു കീഴിലുളള റിലയന്സ് ഡിജിറ്റല് പ്ലാറ്റ് ഫോം തുക കൈമാറും. ഇതോടെ ആര്കോമും റിലയന്സ് ടെലികോമും ഇന്ഫ്രാസ്ട്രക്ചര് ലിമിറ്റഡും യുവി അസറ്റ്സ് റികണ്സ്ട്രക്ഷന് കമ്പനിക്കു ലഭിക്കും.
റിലയന്സ് ഇന്ഫ്രാടെല്ലിന്റെ വെബ്സൈറ്റില് നല്കിയിരിക്കുന്ന വിവരം അനുസരിച്ച് ആര്കോമിന്റെ കടം 49,193.46 കോടി രൂപയാണ്. പണം കടം നല്കിയവര് കോടതിയെ സമീപിച്ചതോടെയാണ് പ്രതിസന്ധി രൂക്ഷമാകുന്നത്. എന്നാല് പുതിയ നീക്കം അനില് അംബാനിക്ക് ചെറിയ ആശ്വാസം നല്കുന്നതാണ്.
