നിലമ്പൂര്: ‘റബ്ബിനെ സാക്ഷി നിര്ത്തി ഞാന് പറയുന്നു. ഇഹലോകവും പരലോകവുമില്ലാത്തവര്ക്ക് വോട്ടു ചെയ്ത് വിട്ടിട്ട് എന്ത് കാര്യം’ എന്ന് ചോദിച്ച് പച്ചക്ക് വര്ഗീയത പറഞ്ഞ് പി.വി അന്വര് എം.എല്.എയുടെ പ്രസംഗം. നിലമ്പൂര് നഗരസഭയിലെ വൃന്ദാവനംകുന്നിലെ യോഗത്തിലാണ് മതവും വര്ഗീയതയും പറഞ്ഞ് അന്വര് വോട്ടു ചോദിക്കുന്ന പ്രസംഗത്തിന്റെ ഓഡിയോ പുറത്തുവന്നത്.
നഗരസഭയിലെ ചന്തക്കുന്ന് ഡിവിഷനിലെ ഇടതുപക്ഷ സ്വതന്ത്ര സ്ഥാനാര്ത്ഥി അബിദക്ക് വേട്ടുതേടിയായിരുന്നു എം.എല്.എയുടെ വിവാദ പ്രസംഗം. 'ഇന്ശ അള്ള, ഈ മഗ്രിബിന്റെ സമയത്ത് റബ്ബിനെ സാക്ഷി നിര്ത്തി ഞാന് നിങ്ങളോട് പറയുന്നു. ഇത് രാഷ്ട്രീയമൊന്നുമല്ല. എനിക്ക് വോട്ടു ചെയ്ത ഈ മനുഷ്യന്മാരെ സഹായിക്കല് എന്റെ അനാമത്താണ്. ഈ ചെയ്യുന്ന പ്രവൃത്തിയൊക്കെ ഇബാദത്താണ്.
ഇഹലോകവും പരലോകവുമില്ലാത്തവര്ക്ക് വേട്ടു ചെയ്ത് വിട്ടിട്ട് എന്താണ് കാര്യം. ബാക്കിയൊന്നും ഞാന് പറയേണ്ട കാര്യമില്ലല്ലോ. മനസിലാക്കാനുള്ള ശേഷി നിങ്ങള്ക്കുണ്ടാകും. പടച്ചോനെ പേടിയുള്ളവനേ പടപ്പിനെയും പേടിക്കൂ. പടച്ചോനെ പേടിക്കാത്തവര്ക്ക് എന്തിന് പടപ്പിനെ പേടിക്കണം. അതു മനസിലാക്കി കൊള്ളീ. ആബിദയെ നിങ്ങള് തോല്പ്പിച്ചാലും മുനിസിപ്പാലിറ്റി പടച്ചോന് തന്നാല് കുടിവെള്ളം തരുമെന്നും പ്രസംഗത്തില് അന്വര് പറയുന്നുണ്ട്.
ഏഴു മിനിറ്റും ഏഴു സെക്കന്റും ദൈര്ഘ്യമുള്ളതാണ് അന്വറിന്റെ പ്രസംഗം. മുസ്ലീം ഭൂരിപക്ഷ പ്രദേശമായ വൃന്ദാവന്കുന്ന് ഉള്ക്കൊള്ളുന്ന ചന്തക്കുന്ന് 9-ാംഡിവിഷനില് ആബിദ താത്തൂക്കാരന് ഇടതു പക്ഷ സ്വതന്ത്ര സ്ഥാനാര്ത്ഥിയും കോണ്ഗ്രസ് സ്ഥാനാര്ത്ഥി ശ്രീജ വെട്ടത്തേഴത്തുമാണ്.
