ന്യൂഡല്ഹി: കേന്ദ്രസര്ക്കാരിന്റെ പുതിയ കാര്ഷിക നിയമത്തിനെതിരേ കര്ഷരുടെ സമരം ഡല്ഹിക്ക് പുറമേ മറ്റു സംസ്ഥാനങ്ങളിലും കരുത്ത് നേടുന്നു. ഇന്നലെ കര്ഷക സമരത്തിന്റെ പ്രതിഫലനം പഞ്ചാബ്, ഹരിയാന, രാജസ്ഥാന്, ഉത്തര്പ്രദേശ്, മദ്ധ്യപ്രദേശ് എന്നീ സംസ്ഥാനങ്ങളിലും നടന്നു. നിരാഹാരവും പ്രതിഷേധ പ്രകടനങ്ങളും പല ഭാഗങ്ങളിലും മണിക്കൂറോളം നീണ്ടു നിന്നപ്പോള് ഗതാഗത സംവിധാനങ്ങള് അപ്പാടെ പാളി.
രാജസ്ഥാനെയും ഡല്ഹിയെയും തമ്മില് ബന്ധിപ്പിക്കുന്ന എന്എച്ച് - 8 ല് ഉള്പ്പെടെ ഗതാഗതവും ചരക്കു നീക്കവുമെല്ലാം തടസ്സപ്പെട്ടു. പഞ്ചാബിലും ഹരിയാനയിലും കര്ഷകര് ജില്ലാ ആസ്ഥാനത്ത് ഡെപ്യൂട്ടി കമ്മീഷണര് ഓഫീസിന് മുന്നിലേക്ക് പ്രതിഷേധവുമായി എത്തി. ട്രാക്ടറുകളിലും ട്രോളികളിലുമാണ് കര്ഷകര് ഓഫീസ് ഘരാവോ ചെയ്യാനെത്തിയത്. രാജസ്ഥാനില് ഡല്ഹിയിലേക്ക് പോയ ട്രക്കുകളും ബസുകളുമെല്ലാം വഴിയില് കുടുങ്ങി. പഞ്ചാബ്, ഉത്തരാഖണ്ഡ്, ഹിമാചല് പ്രദേശ്, ജമ്മു കശ്മീര്, ഉത്തര്പ്രദേശിന്റെ ചില ഭാഗങ്ങള് എന്നിവിടങ്ങളിലും പ്രതിഷേധമുണ്ടായി.
ഹരിയാനയിലെ ഷാജഹാന്പൂരിന് സമീപത്ത് ജെയ്പൂര് - ഡല്ഹി - എന്എച്ച് 8 തുടര്ച്ചയായി രണ്ടാം ദിവസവും അടഞ്ഞു കിടന്നു. ക്യാബുകളും സ്വകാര്യ വാഹനങ്ങളും ബസ് ഓപ്പറേറ്റര്മാരും ഡല്ഹിയിലേക്കുള്ള യാത്ര ഒഴിവാക്കി.
ഡല്ഹിയിലേക്കുള്ള 20 ആര്എസ്ആര്ടിസി ബസുകളാണ് ക്യാന്സല് ചെയ്തത്. ഉത്തരാഖണ്ഡ്, പഞ്ചാബ്, ഹിമാചല് പ്രദേശ്, ഉത്തര്പ്രദേശ്, ജമ്മു എന്നിവിടങ്ങളിലേക്കുള്ള ബസുകളും ക്യാന്സല് ചെയ്യപ്പെട്ടു. ഹരിയാനയിലെ ജിന്ഡില് സ്ത്രീകളും ഖാപ് അംഗങ്ങളും സാമൂഹ്യ സംഘടനകളും റാലയില് പങ്കാളിയായി. 1000 ലധികം വാഹനങ്ങളാണ് റാലിയില് ഉണ്ടായിരുന്നത്.
ഹിസാര്, ഫത്തേഹാബാദ്, സിര്സാ എന്നിവിങ്ങളിലും കര്ഷകരുടെ പ്രതിഷേധത്തില് സ്ത്രീകളും പങ്കാളികളായി. ജില്ല കമ്മീഷണര് ഓഫസീന് മുന്നില് എല്ലാവരും കുത്തിയിരിപ്പ് സമരം തന്നെ നടത്തി. കര്ണാലില് കര്ഷകര്ക്കൊപ്പം കോണ്ഗ്രസിന്റെയും ഐഎന്എല്ഡി യുടെയും അംഗങ്ങള് സമരത്തിന്റെ ഭാഗമായി. കര്ണാല്, പാനിപ്പത്ത്, അംബാല, കുരുക്ഷേത്ര, യമുനാനഗര് ജില്ലാ കേന്ദ്രള്ക്ക് പുറത്തും ധര്ണ്ണ നടന്നു.
ഇവിടെയെല്ലായിടത്തും കാര്ഷിക നിയമം പിന്വലിക്കണം എന്നാവശ്യപ്പെട്ട് പ്രധാനമന്ത്രിക്കുള്ള മെമ്മോറാണ്ടം കര്ഷകര് നല്കി. കടുത്ത കാലാവസ്ഥയില് പോലും പഞ്ചാബില് കര്ഷകര് സധൈര്യം ജില്ലാ ആസ്ഥാനത്തിന് മുന്നില് തമ്പടിച്ചു. റെയില്വേ പാര്ക്കിലും റിലയന്സ് ഗ്രൂപ്പിന്റെ ഷോപ്പിംഗ് മാളുകള്ക്കും പെട്രോള് സ്റ്റേഷനുകള്ക്കും ബിജെപി നേതാക്കളുടെ വീടിന് സമീപത്തുമെല്ലാം കര്ഷകര് കൂട്ടമായി എത്തി പ്രതിഷേധിച്ചു.
മഴയും മൂടല്മഞ്ഞും അതിജീവിച്ചാണ് മദ്ധ്യപ്രദേശിലെ പലയിടങ്ങളിലും കര്ഷകരുടെ പ്രതിഷേധം അരങ്ങേറിയത്. ഡല്ഹി അതിര്ത്തിയില് കര്ഷകരോട് ഐക്യദാര്ഡ്യം പ്രഖ്യാപിക്കാന് എത്തിയത് അനേകരാണ്. ഉത്തര്പ്രദേശില് ഉടനീളം പല ജില്ലകളിലും പ്രതിഷേധം നടന്നു. ബിജെയു നേതാവ് രാകേഷ് ടികെയ്റ്റ് ഉള്പ്പെടെ അനേകം കര്ഷക നേതാക്കള് രാവിലെ എട്ടു മണി മുതല് വൈകിട്ട അഞ്ചു വരെ നിരാഹാര സമരം കിടന്നു.
യുപിയിലെ ഗസിയാബാദില് നിന്നുള്ള പ്രതിഷേധക്കാര് ഡല്ഹി - മീററ്റ അതിവേഗ പാതയിലെ യുപിഗേറ്റിലും ദേശീയപാത - 9 ും ഉപരോധം നടത്തി. കര്ഷക അനുകൂലികളായ മറ്റുള്ളവര് ഗാസിപ്പൂര് അതിര്ത്തി കടക്കാന് ആരേയും അനുവദിച്ചില്ല. പ്രതിഷേധക്കാരുടെ ട്രാക്ടറുകളും ട്രോളികളും പിടിച്ചെടുത്ത് പോലീസ് കര്ഷകരെ അപമാനിച്ചതായും കൃഷിക്കാരുടെ സംഘടന ആരോപിച്ചു.
