കട്ടപ്പന: വാഗമണിലെ വന് ലഹരിവേട്ടയില്നിന്നു വമ്പന്മാര് രക്ഷപെട്ടതായി വിവരം. വാഗമണ് വട്ടപ്പതാലിലെ ക്ലിഫ് ഇന് റിസോര്ട്ടിലായിരുന്നു ജില്ലാ പോലീസിന്റെയും നാര്ക്കോട്ടിക് സെല്ലിന്റെയും സംയുക്ത റെയ്ഡ്. സംഘാടകരെന്നു കരുതുന്ന ഒമ്പതു പേരുടെ അറസ്റ്റാണു രേഖപ്പെടുത്തിയത്. സി.പി.ഐ ലോക്കല് സെക്രട്ടറിയും പഞ്ചായത്ത് മുന് പ്രസിഡന്റുമായിരുന്ന ഷാജി ജേക്കബ് കുറ്റിക്കാടിന്റെ ഉടമസ്ഥതയിലുള്ള റിസോര്ട്ടില് പോലീസും നാര്ക്കോട്ടിക് സംഘവും ലക്ഷ്യമിട്ടത് വന് സംഘത്തെയായിരുന്നു.
സിനിമാ മേഖലയുമായി ബന്ധപ്പെട്ട ചിലര് പാര്ട്ടിയില് പങ്കെടുക്കുമെന്ന വിവരവും പോലീസിനു ലഭിച്ചിരുന്നു. ഇവര് റിസോര്ട്ടില് എത്തിയെന്ന ധാരണയിലാണ് ഞായാറാഴ്ച സന്ധ്യ കഴിഞ്ഞതോടെ പോലീസ് റിസോര്ട്ട് വളഞ്ഞത്. എന്നാല് ഇങ്ങനെയാരും സ്ഥലത്തുണ്ടായിരുന്നില്ല. വഴിയില് വിവരമറിഞ്ഞ സംഘം മടങ്ങിപ്പോയോയെന്നും സംശയിക്കുന്നുണ്ട്. കഞ്ചാവും എല്.എസ്.ഡിയുമടക്കം വിവിധതരം ലഹരിമരുന്നുകളാണ് നടത്തിപ്പുകാര് എത്തിച്ചിരുന്നത്. ആവശ്യക്കാര്ക്ക് ഇഷ്ടമുള്ളതു തെരഞ്ഞെടുക്കാനുള്ള സൗകര്യം ഒരുക്കിയിരുന്നു. പിടിച്ചെടുത്ത ലഹരിയുടെ അളവ് അന്വേഷണ സംഘം വെളിപ്പെടുത്തിയില്ലെങ്കിലും ലക്ഷങ്ങള് വിലമതിക്കുമെന്നാണു സുചന.
സി.പി.ഐ. നേതാവിന്റെ റിസോര്ട്ടിലെ റെയ്ഡിന് അതീവ രഹസ്യമായാണ് പോലീസും നാര്ക്കോട്ടിക്ക് സെല്ലും പദ്ധതിയിട്ടത്. ഉപ്പുതറ കേന്ദ്രീകരിച്ച് ഭൂമി െകെയേറ്റം ഒഴിപ്പിക്കാനെന്ന പ്രതീതി ജനിപ്പിച്ചാണ് എസ്.എച്ച്.ഒമാര് അടക്കമുള്ളവരെ ഒന്നിച്ചു കൂട്ടിയത്. വാഹനവ്യൂഹം വട്ടപ്പതാലില് എത്തിയപ്പോഴാണ് റിസോര്ട്ടിലെ റെയ്ഡിനാണെന്ന് സംഘത്തിലെ പലരും അറിഞ്ഞത്.
വന് ലഹരിപ്പാര്ട്ടി നടന്ന വാഗമണ് വട്ടപ്പതാല് ക്ലിഫ് ഇന് റിസോര്ട്ട് ഉടമ മുമ്പും വിവാദനായകന്. സി.പി.ഐ. ഏലപ്പാറ ലോക്കല് സെക്രട്ടറിയും ഏലപ്പാറ പഞ്ചായത്ത് മുന് പ്രസിഡന്റുമായ ഷാജി ജേക്കബ് കുറ്റിക്കാടിന്റെ ഉടമസ്ഥതയിലാണു റിസോര്ട്ട്.
പിറന്നാളാഘോഷത്തിനെന്നു പറഞ്ഞാണ് ഓണ്ലൈനില് മൂന്നു മുറികള് ബുക്ക് ചെയ്തതെന്നും ലഹരിപ്പാര്ട്ടി നടത്തുമെന്ന് അറിയില്ലായിരുന്നുവെന്നും ഷാജി പോലീസിനു മൊഴി നല്കി. ആളുകള് കൂടുതലായി എത്തിയതോടെ സ്ഥലത്തു ചെന്നു. ഇവരുമായി വാക്കുതര്ക്കത്തിലേര്പ്പെട്ടു. പിറന്നാളാഘോഷമാണെന്നും രാത്രി എട്ടോടെ പിരിയുമെന്നും അറിയിച്ചതോടെ അനുമതി നല്കിയെന്നും ഷാജി പോലീസിനോടു പറഞ്ഞു. ഇത് പോലീസ് പൂര്ണമായും വിശ്വാസത്തിലെടുത്തിട്ടില്ല.
നേരത്തേ നക്ഷത്ര ആമകളെ കൈവശം വച്ചെന്നും റിസോര്ട്ടില് മ്ലാവിറച്ചി വിളമ്പിയെന്നും ഇയാള്ക്കെതിരേ ആരോപണം ഉയര്ന്നിരുന്നു. ഈ വിഷയം ഉയര്ത്തിക്കാട്ടി കോണ്ഗ്രസും രംഗത്തെത്തിയിട്ടുണ്ട്. മുമ്പും നിശാപാര്ട്ടി നടന്നിരുന്ന വിവരം അന്വേഷിക്കുകയാണെന്നു പോലീസ് പറഞ്ഞു. ഷാജി കുറ്റിക്കാടിനെ ഏലപ്പാറ ലോക്കല് കമ്മിറ്റി സെക്രട്ടറി സ്ഥാനത്തുനിന്നും പാര്ട്ടി അംഗത്വത്തില്നിന്നും പുറത്താക്കിയതായി സി.പി.ഐ. ജില്ലാ സെക്രട്ടറി കെ.കെ. ശിവരാമന് അറിയിച്ചു. ഷാജിയുടെ ഉടമസ്ഥതയിലുള്ള റിസോര്ട്ടിലെ നിശാപാര്ട്ടിക്കിടെ ലഹരിമരുന്ന് ഉപയോഗം കണ്ടെത്തിയതിനെത്തുടര്ന്നാണു നടപടി.
