ചെന്നൈ: തടവ് ശിക്ഷയ്ക്ക് ശേഷം കര്ണാടകത്തില് നിന്നും തമിഴ്നാട്ടിലേക്ക് മടങ്ങിയ ശശികലയുടെ മടക്കയാത്രയ്ക്കിടയില് രണ്ടു കാറുകള്ക്ക് തീപിടിച്ചത് പരിഭ്രാന്തി പരത്തി. ആര്ക്കും പരിക്കേറ്റിട്ടില്ലെന്നാണ് പ്രാഥമിക നിഗമനം. സംഭവം അട്ടിമറിയല്ലെന്നും റിപ്പോര്ട്ടുകളില് പറയുന്നു. ശശികലയെ സ്വീകരിക്കുന്നതിനിടയില് പ്രവര്ത്തകര് പടക്കം പൊട്ടിച്ചതിനെ തുടര്ന്നുണ്ടായ തീ പിടുത്താണ് കാറുകള് കത്തുന്നതിലേക്ക് നയിച്ചത്. കൃഷ്ണഗിരി ടോള്ഗേറ്റിന് സമീപമാണ് കാര് കത്തിയത്.
ഫയര്ഫോഴ്സ് ഉടന് തന്നെ സ്ഥലത്തെത്തി. സംഭവത്തില് കൂടുതല് പരിശോധനകള് നടന്നു വരികയാണ്. ശശികലയെ സ്വീകരിക്കാന് ഇവിടെ എത്തിയത് അഞ്ഞൂറിലധികം പ്രവര്ത്തകരായിരുന്നു. ക്ഷേത്ര ദര്ശനമൊക്കെ കഴിഞ്ഞ് ഇവിടെയെത്തിയ ശശികല പ്രവര്ത്തകരുടെ സ്വീകരണം ഏറ്റുവാങ്ങി അവരെ അഭിവാദ്യവും ചെയ്ത ശേഷം മടങ്ങാന് തുടങ്ങുമ്പോഴായിരുന്നു വാഹനങ്ങള്ക്ക് തീ പിടിച്ചത്.
നേരത്തേ ശശികല ഇവിടെ എത്തിയപ്പോള് തന്നെ പ്രവര്ത്തകര് പടക്കവും മറ്റും പൊട്ടിച്ചിരുന്നു. തുടര്ന്ന് ശശികലയെ പ്രവര്ത്തകര് ഹാരമണിയിക്കുകയും മറ്റും ചെയ്തു. ഇതെല്ലാം സ്വീകരിച്ച ശേഷം ശശികല മടങ്ങാന് കാറില് കയറുമ്പോള് യാത്ര അയയ്ക്കുന്നതിന്റെ ഭാഗമായി വീണ്ടും പടക്കം പൊട്ടിച്ചപ്പോഴായിരുന്നു അതില് നിന്നും വാഹനത്തിലേക്ക തീ പടര്ന്നത്.
എ.ഐ.എ.ഡി.എം.കെ.യുടെ കൊടി വാഹനത്തില് ഉപയോഗിക്കരുതെന്ന് കൃഷ്ണഗിരി പോലീസ് ശശികലയ്ക്ക് നിര്ദേശം നല്കിയിരുന്നു. അഞ്ചില് കൂടുതല് വാഹനങ്ങള് ശശികലയുടെ വാഹനവ്യൂഹത്തില് ഉണ്ടാകരുതെന്നും നിര്ദേശം നല്കിയിരുന്നു. എന്നാല് എല്ലാം കാറ്റില് പറത്തിയാണ് യാത്ര. എന്നാല് പോലീസിന്റെ ഇത്തരം നിര്ദേശങ്ങളൊന്നും തങ്ങള്ക്ക് ലഭിച്ചിട്ടില്ലെന്നും കൊടിയുമായി ബന്ധപ്പെട്ട പ്രശ്നം നിയമപരമായി നേരിടുമെന്നാണ് ശശികലയുടെ അഭിഭാഷകര് പറയുന്നത്.
ശശികലയുടെ വാഹനം എഡിഎംകെ പ്രവര്ത്തകര് തടയുകയും കൊടി എടുത്തുമാറ്റുകയും ചെയ്തിരുന്നു. എന്നാല് മറ്റൊരു കൊടി വെച്ച് ശശികല യാത്ര തുടരുകയും ചെയ്തു. എ.ഐ.എ.ഡി.എം.കെ. യുടെ കാറിലായിരുന്നു ശശികലയുടെ യാത്ര. ജയലളിത ഉപയോഗിച്ചിരുന്ന എ.ഐ.എ.ഡി.എം.കെ. കൊടിവെച്ച കാറാണ് ശശികല ഉപയോഗിച്ചത്. പാര്ട്ടി കൊടി ഉപയോഗിക്കുന്നതിനെതിരേ എ.ഐ.എ.ഡി.എം.കെ. നേതാക്കള് പോലീസില് പരാതി നല്കിയിരുന്നു. കാര് തടയപ്പെട്ട സാഹചര്യത്തില് ശശികല ഈ കാറില് നിന്നും മാറി മറ്റൊരു പ്രവര്ത്തകന്റെ കാറിലാക്കി യാത്ര.
ബംഗലുരുവിലെ റിസോര്ട്ടില് നിന്നും തമിഴ്നാട്ടിലേക്ക് രാവിലെ 7.30 യ്ക്കാണ് മടക്കയാത്ര ആരംഭിച്ചത് മുതല് പ്രശ്നങ്ങളാണ്. 100 ലധികം വാഹനങ്ങളാണ് ശശികലയുടെ വാഹനത്തിന് അകമ്പടി സേവിക്കുന്നത്. യാത്ര തുടങ്ങിയപ്പോള് ഒരു ഒംനി കാറും മറ്റൊരു ഒംനി കാറും തമ്മില് ചെറുതായി ഇടിച്ചിരുന്നു. ഇതിന് പിന്നാലെ കര്ണാടക അതിര്ത്തിയിലെ ആറ് ജില്ലകളില് സ്വീകരണങ്ങള് ഏറ്റുവാങ്ങി.
