തിരുവനന്തപുരം : അഴിമതി ഭരണം പിണറായി സര്ക്കാരിന്റെ പ്രതിച്ഛായയെ ബാധിച്ചു, അതുകൊണ്ട് തന്നെ ബിജെപി ഭരണത്തില് വന്നാല് മുഖ്യമന്ത്രിയാവാന് തയ്യാറെന്ന് ഇ ശ്രീധരന്.
കേരളം കടക്കെണിയിലാണിപ്പോള്, ആ അവസ്ഥ മാറണമെങ്കില് കൂടുതല് വ്യവസായങ്ങള് വരണം, അടിസ്ഥാന സൗകര്യങ്ങള് വികസിക്കണം, തൊഴിലില്ലായ്മ പരിഹരിക്കണം. മാറി മാറി ഭരിച്ച എല്ഡിഎഫ് , യുഡിഎഫ് ഭരണം ഇതില് പരാജയമായിരുന്നു. കേരളത്തില് ഒരുപാട് പ്രവര്ത്തനങ്ങള്ക്ക് ശ്രമിച്ചെങ്കിലും രാഷ്ട്രീയ ഇടപെടലുകളുണ്ടായി ഒന്നും നടന്നില്ല . വികസനത്തിന് വേണ്ടി പ്രവര്ത്തിക്കണമെങ്കില് രാഷ്ട്രീയത്തിലേക്ക് പ്രവേശിക്കാതെ പറ്റില്ലായെന്നും ഇ ശ്രീധരന് മാധ്യമങ്ങളോട് പറഞ്ഞു.
കേരളത്തില് ബിജെപി ഭരണം കൊണ്ടുവരിക എന്നതാണ് ലക്ഷ്യം, അതിനായി പ്രവര്ത്തിക്കും. രാജ്യത്തിന്റെ വികസന പ്രവര്ത്തങ്ങള്ക്കാണ് ഭരണാധികാരികള് പ്രധാന്യം കൊടുക്കേണ്ടത്. ബിജെപി അധികാരത്തില് വന്നാല് നാടിന്റെ മുഖച്ഛായതന്നെ മാറും. ജനങ്ങള്ക്കിടയില് സി.പി.എമ്മിന്റെ നല്ലമുഖം നഷ്ടപ്പെട്ടുകഴിഞ്ഞു. ഏകാധിപതിയായ ഭരണാധികാരിയാണ് പിണറായി. ജനങ്ങളുമായി സമ്പര്ക്കം കുറഞ്ഞ നേതാവ്. മന്ത്രിസഭയിലെ മറ്റ് മന്ത്രിമാര്ക്കും, ഉദ്യോഗസ്ഥര്ക്കും ഒന്നും ചെയ്യാന് സ്വാതന്ത്ര്യമില്ലെന്നും അദ്ദേഹം പറഞ്ഞു.
കഴഞ്ഞ ദിവസമാണ് ശ്രീധരന് ബിജെപിയില് ചേരുന്നുവെന്ന് സംസ്ഥാന അധ്യക്ഷന് കെ സുരേന്ദ്രന് വ്യക്തമാക്കിയത്. ഞായറാഴ്ച സുരേന്ദ്രന് നയിക്കുന്ന വിജയയാത്രയില് ശ്രീധരന് പങ്കെടുക്കുകയും, ഔദ്യോഗികമായി പാര്ട്ടിയില് അംഗത്വമെടുക്കുകയും ചെയ്യും.
