തിരുവനന്തപുരം: ഇടത് -വലത് മുന്നണികളെ പരിഹസിച്ച് കേന്ദ്രമന്ത്രി പ്രഹ്ളാദ് ജോഷി. കേരളത്തില് പരിസ്പരം പോരടിക്കുന്ന മുന്നണികള് ഡല്ഹിയിലെത്തിയാല് ഒറ്റക്കെട്ടാണ്. ബംഗാളിലും തമിഴ്നാട്ടിലും വരെ അവര് ഒരുമിച്ച് നില്ക്കുമെന്നും കേന്ദ്രമന്ത്രി പറഞ്ഞു.
'കേരളത്തില് ഗുസ്തി, ഡല്ഹിയിലും മറ്റ് സംസ്ഥാനങ്ങളിലുമെത്തിയാല് ദോസ്തി' എന്നതാണ് അവരുടെ സ്ഥിതി. തൃണമൂല് കോണ്ഗ്രസ് നേതാവ് മമത ബാനര്ജി ഡല്ഹിയില് കോണ്ഗ്രസിനെ പിന്തുണയ്ക്കുന്നു. എന്നാല് പശ്ചിമ ബംഗാളില് ടി.എം.സിയും കോണ്ഗ്രസും തമ്മില് ആ ബന്ധമില്ല. കോണ്ഗ്രസ് പല പ്രദേശിക കക്ഷികള്ക്കും ബാധ്യതയാണ്. കോണ്ഗ്രസിന് ദ്വൈമുഖമാണെന്നും കേന്ദ്രമന്ത്രി പറഞ്ഞു. തിരുവനന്തപുരത്ത് വാര്ത്താസമ്മേളനത്തില് സംസാരിക്കുകയായിരുന്നു അദ്ദേഹം.
ഇടതുമുന്നണിയുടെ ദ്വൈമുഖം എന്താണെന്നു വച്ചാല്, അവര് ഡല്ഹിയിലും ബംഗാളിലും കോണ്ഗ്രസിനെ പിന്തുണയ്ക്കും. ബംഗാളിലും തമിഴ്നാട്ടിലും അവര് സുഹൃത്തുക്കളാണ്. കേരളത്തില് പോളിറ്റ് ബ്യുറോയില് വിശ്വസിക്കാനാവില്ല, എന്നാല് അത് ബംഗാളില് നടപ്പാക്കും. ജനാധിപത്യത്തിലാണോ ആത്മവഞ്ചനയിലാണോ രാഹുല് ഗാന്ധി വിശ്വസിക്കുന്നതെന്ന് പറയണമെന്നും ജോഷി പരിഹസിച്ചു.
രാഹുല് ഗാന്ധി വയനാട്ടില് നടത്തിയ ട്രാക്ടര് റാലിയേയും ജോഷി പരിഹസിച്ചു. 'ആക്ടര് ഓണ് ട്രാക്ടര്' ആകാനാണ് രാഹുലിന്റെ ശ്രമം. നിങ്ങള് അഗ്രികള്ച്ചര് പ്രൊഡ്യൂസ് മാര്ക്കറ്റ് കമ്മിറ്റി (എപിഎംസി)യിലാണ് വിശ്വസിക്കുന്നതെങ്കില് എന്തുകൊണ്ട് അത് കേരളത്തിലില്ല? രാഹുല് ഗാന്ധിയുടെ പാര്ട്ടി ഭരിക്കുന്ന പഞ്ചാബില് കാര്ഷിക കരാര് ലംഘിക്കുന്ന കര്ഷകരെ ജയിലിലടയ്ക്കുന്ന നിയമമാണ് കൊണ്ടുവന്നിരിക്കുന്നത്.
പശ്ചിമ ബംഗാളിലും തമിഴ്നാട്ടിലും ബി.ജെ.പി സര്ക്കാര് രൂപീകരിക്കുമെന്നും പുതുച്ചേരിയില് എന്.ഡി.എ ഭരണം തിരികെ വരുമെന്നും ജോഷി പറഞ്ഞു. കേരളത്തില് ബി.ജെ.പി വലിയ നേട്ടമുണ്ടാക്കുമെന്നും അത്ഭുതങ്ങള് പ്രതീക്ഷിക്കാമെന്നും അദ്ദേഹം പറഞ്ഞു. തിരഞ്ഞെടുപ്പിനു മുന്നോടിയായി കേരള സന്ദര്ശനത്തിന് എത്തിയതായിരുന്നു അദ്ദേഹം.
