തിരുവനന്തപുരം : കൊവിന് ആപ്പില് രജിസ്റ്റര് ചെയ്തിട്ടും വാക്സിന് ലഭിക്കുന്നില്ല എന്ന പരാതിയുമായി മുതിര്ന്ന പൗരന്മാര്. സര്ക്കാര് ആശുപത്രികളില് പ്രായമായവരെയും കൊണ്ട് എത്തുന്ന പലരും കുത്തി വയ്പ്പെടുക്കാതെ തിരിച്ചുപോയി. രജിസറ്റര് ചെയ്ത സ്ഥലവും സമയവും നോക്കി എത്തുന്നവരോട് തിരക്കാണന്നും മറ്റൊരു സമയത്ത് എത്തുവാന് പറഞ്ഞും തിരിച്ചയയ്ക്കുകയാണ് അധികൃതര്.
ആപ്പില് രജിസറ്റര് ചെയ്തവരെ കൂടാതെ ആരോഗ്യപ്രവര്ത്തകരും, കൊവിഡ് മുന്നണി പോരാളികളും തെരഞ്ഞെടുപ്പ് ചുമതലയുള്ള ഉദ്യോഗസ്ഥരും കുത്തിവയ്പ്പെടുക്കാന് എത്തുന്നു. കൊവിന് ആപ്പിന്റെ സാങ്കേതിക തകരാര് മൂലവും നേരിട്ട് തിരിച്ചറിയല് രേഖകളുമായി വാക്സിനെടുക്കാന് എത്തുന്നവരുണ്ട്. ഇതൊക്കെയാണ് തിരക്കിന് കാരണമെന്ന് അധികൃതര് പറയുന്നു. ഇതിനൊരു പ്രതിവിധിയായി മുതിര്ന്ന പൗരന്മാര്ക്ക് ആശുപത്രികളില് പ്രത്യക ക്യൂ നല്കണമെന്നും ആവശ്യം ഉയരുന്നുണ്ട്.
രാജ്യത്ത് മൂന്നാംഘട്ട വാക്സിനേഷന് 81 ശതമാനം കാര്യക്ഷമത എന്നാണ് റിപ്പോര്ട്ടുകള് പറയുന്നത്. അനിയന്ത്രിതമായ തിരക്ക് ഉണ്ടാകുന്നതിനാല് വാക്സിനേഷന് നടകത്താന് സമയക്രമം പാലിക്കേണ്ടന്നും, 24 മണിക്കൂറും വാക്സിന് നല്കാമെന്നും കേന്ദ്ര ആരോഗ്യമന്ത്രാലയം സംസ്ഥാനങ്ങളെ അറിയിച്ചിട്ടുണ്ട്. വരും ദിവസങ്ങളില് തിരക്ക് വര്ദ്ധിക്കാന് സാധ്യതയുണ്ട്, അതിനാല് കുത്തിവയ്പിനെത്തുന്നവരെ, പ്രത്യേകിച്ച് പ്രായമയവരെ മറ്റൊരു ദിവസത്തേക്ക് നിര്ദ്ദേശിക്കുന്നത് ശരിയല്ലെന്നും ആശുപത്രികളില് എത്തുന്നവര് പരാതിപ്പെടുന്നു. സര്ക്കാര് ആശുപത്രികളില് തിരക്ക് അനുഭവപ്പെടുന്നതിനാല് സ്വകാര്യ ആശുപത്രികളേയും വാക്സിനെടുക്കാന് ജനങ്ങള്ക്ക് ആശ്രയിക്കേണ്ടതായി വരുന്നു.
ബുധനാഴ്ച വരെ രാജ്യത്ത് 6.9 ലക്ഷം വാക്സിനാണ് കൊടുത്തു കഴിഞ്ഞത്. ആദ്യഡോസ് വാക്സിന് സ്വീകരിച്ചവരില് 45-60 ന് ഇടയില് പ്രായമുള്ള 32,364 പേര് ഉണ്ടായിരുന്നു. 67.7 ലക്ഷം ആരോഗ്യപ്രവര്ത്തരില് ആദ്യഡോസ് കുത്തിവയ്പ്പ് നടത്തി. അതില് നിന്നും ഇതുവരെ 28.2 ലക്ഷം ആളുകള് രണ്ടാമത്തെ ഡോസും സ്വീകരിച്ചു.
