ന്യൂഡല്ഹി: കോണ്ഗ്രസുമായി അകലുന്നുവെന്ന അഭ്യൂഹങ്ങള്ക്കിടെ പാര്ട്ടിക്ക് ആശ്വാസമാകുന്ന പ്രതികരണവുമായി മുതിര്ന്ന നേതാവ് ഗുലാം നബി ആസാദ്. തിരഞ്ഞെടുപ്പ് പ്രഖ്യാപിച്ച അഞ്ച് സംസ്ഥാനങ്ങളിലും പാര്ട്ടിക്കുവേണ്ടിയും സ്ഥാനാര്ത്ഥികള്ക്കായും ഞങ്ങള് പ്രചരണത്തിനിറങ്ങുകയാണ്. കോണ്ഗ്രസിന്റെ വിജയം ഉറപ്പാക്കുക. അതാണ് മുന്ഗണന, അദേഹം വ്യക്തമാക്കി.
പാര്ട്ടിയിലെ എന്റെ സഹപ്രവര്ത്തകര്ക്ക് വേണ്ടിയാണ് ഞാനിത് പറയുന്നത്.. പാര്ട്ടിക്കുള്ളില് പരിഷ്കാരങ്ങള്ക്കായി ആഹ്വാനം ചെയ്യുകയും 'ജി-23' എന്ന വിളിക്കപ്പെടുകയും ചെയ്ത 23 ഓളം നേതാക്കളെ പരാമര്ശിച്ചാണ് അദേഹത്തിന്റെ പ്രതികരണം.
പാര്ട്ടിയോ സ്ഥാനാര്ത്ഥിയോ എവിടെ പ്രചരണത്തിന് വിളിച്ചാലും, അടുത്ത രണ്ട് മാസം അത് മാത്രമാണ് ശ്രദ്ധ. അദേഹം കൂട്ടിച്ചേര്ത്തു.
പ്രധാനമന്ത്രി നരേന്ദ്രമോഡിയെക്കുറിച്ചുള്ള പ്രശംസയായി കാണുകയും, തെറ്റിദ്ധാരണയുടെ പേരിലുയര്ന്ന കോണ്ഗ്രസുമായുള്ള വിവാദം അകന്നതായും 71 കാരനായ ആസാദ് വ്യക്തമാക്കി. ഗുലാം നബി ആസാദ് പ്രധാനമന്ത്രി നരേന്ദ്രമോഡിയെ പ്രശംസിച്ചതാണ് പാര്ട്ടിക്കുള്ളില് വിവാദമായത്. രാജ്യസഭയില് നിന്ന് വിരമിച്ച ദിവസം ഗുലാം നബി ആസാദിന് മോഡി കണ്ണീരോടെ യാത്രയയപ്പ് നല്കിയതും വാര്ത്തയായിരുന്നു.
