വരുന്ന നിയമസഭാ തെരഞ്ഞെടുപ്പില് 71 സീറ്റ് നേടി ബിജെപി കേരളത്തില് അധികാരത്തില് വരുമെന്ന് മുന് ഡിജിപി ജേക്കബ് തോമസ്. ബിജെപി എന്നത് ഇന്ത്യയിലെ തന്നെ ഏറ്റവും വലിയ ടീം ആണെന്നും ആ ടീം ജയിക്കാനായി ആ ടീമിലെ ഒരു അംഗം എന്ന നിലയില് പ്രചാരണം താന് തുടങ്ങിക്കഴിഞ്ഞതായും പറഞ്ഞു. മീഡിയാ വണ് ചാനലിന് നല്കിയ അഭിമുഖത്തിലാണ് ഇക്കാര്യം പറഞ്ഞത്. ബിജെപി ജയിക്കാന് താന് പ്രചാരണങ്ങള് ചെയ്യുന്നുണ്ടെന്നും പറഞ്ഞു.
ഭരണത്തെ അടുത്തറിഞ്ഞ് മനസ്സിലാക്കിയതിന്റെ അടിസ്ഥാനത്തിലാണ് മത്സരത്തിനിറങ്ങുന്നതെന്നും ഇത്രയും കാലം ജോലികള് ഏല്പ്പിച്ചു ഇനി ജനങ്ങള് ജോലികള് ഏല്പ്പിക്കട്ടെ എന്നും പറഞ്ഞു. തെരഞ്ഞെടുപ്പില് മത്സരിക്കുന്ന ബിജെപി സ്ഥാനാര്ത്ഥി പട്ടികയില് ജേക്കബ് തോമസിന്റെ പേരുകളുമുണ്ട്. ഇരിങ്ങാലക്കുടയിലെ സ്ഥാനാര്ഥി പട്ടികയിലാണ് ജേക്കബ് തോമസിന്റെ പേരുള്ളത്.
ഫെബ്രുവരി നാലിന് ബിജെപി അദ്ധ്യക്ഷന് ജെപി നദ്ദ കേരളം സന്ദര്ശിച്ച വേളയിലാണ് ജേക്കബ് തോമസ് ബിജെപിയില് ചേരുന്നതായി പ്രഖ്യാപിച്ചത്. നദ്ദയില് നിന്നുമായിരുന്നു പാര്ട്ടി അംഗത്വം സ്വീകരിച്ചത്.
തന്റെ കടമ ചെയ്യാനാവാതെ വേദനിച്ചപ്പോള് വിദ്യാഭ്യാസം ആര്ക്കും ഉപകാരമില്ലാതെ പാഴാകരുതെന്ന് തിരിച്ചറിയുകയും ചെയ്തതോടെയാണ് പ്രവര്ത്തിക്കാനുള്ള പ്ലാറ്റ്ഫോം ആയി ബിജെപി ആയതെന്നായിരുന്നു പാര്ട്ടിയില് ചേര്ന്നതിന് ജേക്കബ് തോമസ് നല്കിയിരുന്ന വിശദീകരണം. ചില കള്ളരാഷ്ട്രീയക്കാരുടെ അഴിമതിക്ക് കൂട്ടുനില്ക്കാന് കഴിയാതെ വന്നതോടെ ഒറ്റപ്പെടുകയും വേദനിക്കുകയും ചെയ്തു.
ജനങ്ങളെ നീതിപൂര്വം സേവിക്കാനും സത്യസന്ധമായി ഭരണഘടന അനുശാസിക്കുന്ന രീതിയില് ജോലി ചെയ്യാനും ആഗ്രഹിച്ചിരുന്ന തന്നെ, സ്വാര്ത്ഥരായ രാഷ്ട്രബോധമില്ലാത്ത ചിലരുടെ താല്പര്യത്തിനും ഇഷ്ടത്തിനും എതിരുനിന്നപ്പോള് ദ്രോഹിക്കുകയും മാനസീകമായി പീഡിപ്പിക്കുകയും അപമാനിക്കുകയും ചെയ്തതായും ഫേസ്ബുക്ക് കുറിപ്പില് നേരത്തേ വ്യക്തമാക്കിയിരുന്നു.
വികസനകാര്യത്തില് എല്ഡിഎഫും യുഡിഎഫും പരാജയമാണ്. സ്രാവുകള്ക്കൊപ്പം നീന്തിയപ്പോള് ശിക്ഷാ നടപടി നേരിട്ടു. ഇനി ജനങ്ങള്ക്കൊപ്പം നീന്തുമെന്നും നേരത്തേ ജേക്കബ് തോമസ് പറഞ്ഞത്. സംസ്ഥാനത്ത് വരാനിരിക്കുന്ന നിയമസഭാ തെരഞ്ഞെടുപ്പില് ബിജെപി സ്ഥാനാര്ത്ഥിയായി മത്സരിക്കുമെന്നും ഏത് മണ്ഡലത്തിലാണ് മത്സരിക്കേണ്ടതെന്ന് പാര്ട്ടി തീരുമാനിക്കുമെന്നും അദ്ദേഹം നേരത്തെ വ്യക്തമാക്കിയിരുന്നു.
