ന്യൂഡല്ഹി: ബിജെപിയിലേക്ക് കളം മാറ്റി ചവിട്ടിയ മുന് കോണ്ഗ്രസ് നേതാവ് ജ്യോതിരാദിത്യ സിന്ധ്യേ കോണ്ഗ്രസില് ആയിരുന്നെങ്കില് മുഖ്യമന്ത്രിയാകുമായിരുന്നു എന്നു രാഹുല്ഗാന്ധി. ബിജെപിയില് പോയ അദ്ദേഹം അവിടെ ഇപ്പോള് പിന്സീറ്റിലായെന്നും ഒരു ദിവസം നിങ്ങള് മുഖ്യമന്ത്രിയാകും എന്ന് താന് പറഞ്ഞിരുന്നതായിരുന്നെന്നും എന്നാല് അദ്ദേഹം ഗതിമാറി സഞ്ചരിച്ചെന്നും രാഹുല് രാജസ്ഥാനിലെ പരിപാടിയില് പറഞ്ഞു.
''കോണ്ഗ്രസില് നിന്നിരുന്നെങ്കില് അദ്ദേഹം ഇപ്പോള് മുഖ്യമന്ത്രിയാകുമായിരുന്നു. എന്നാല് ബിജെപിയില് ഇപ്പോള് അദ്ദേഹം പിന്ബഞ്ചിലെ ഇരിപ്പുകാരനായി.'' കോണ്ഗ്രസ് പ്രവര്ത്തകര്ക്കൊപ്പം സംഘടനയെ ശക്തിപ്പെടുത്തുകയായിരുന്നു സിന്ധ്യേ ചെയ്യേണ്ടിയിരുന്നതെന്നും പറഞ്ഞു. ഒരിക്കല് നിങ്ങള് മുഖ്യമന്ത്രിയാകുമെന്ന് ഞാന് പറഞ്ഞെങ്കിലും അദ്ദേഹം വേറെ വഴിയിലൂടെ പേയി. എല്ലാം എഴുതിതള്ളാം അദ്ദേഹം ഇനി ഒരിക്കലും മുഖ്യമന്ത്രി ആകാന് പോകുന്നില്ല. രാഹുല് പറഞ്ഞു. കോണ്ഗ്രസിന്റെ യുവജന പരിപാടിയില് സംബന്ധിക്കുമ്പോഴാണ് ഇക്കാര്യം പറഞ്ഞത്.
കോണ്ഗ്രസിലെ യുവാക്കള് ആര്എസ്എസ് ആശയങ്ങള്ക്കെതിരേ ശക്തമായി പൊരുതണം. അതിന് ആരേയും ഭയക്കേണ്ടതില്ലെന്നും പറഞ്ഞു. കഴിഞ്ഞ വര്ഷമാണ് സിന്ധ്യേ കോണ്ഗ്രസ് വിട്ട് 26 എംഎല്എ മാരുമായി ബിജെപിയില് പോയി ചേര്ന്നത്.
