കണ്ണൂര്: ആക്ടിങ് സെക്രട്ടറി എ.വിജയരാഘവന് പ്രചാരണരംഗത്തു സജീവമല്ലാത്തതും അവധിയിലുള്ള സെക്രട്ടറി കോടിയേരി ബാലകൃഷ്ണന് പൂര്വ്വാധികം സജീവമായി രംഗത്തിറങ്ങിയതും സി.പി.എം നേതൃത്വത്തില് വരാന് പോകുന്ന മാറ്റത്തിന്റെ സൂചന. ആരോഗ്യപ്രശ്നങ്ങള് മാറിയ സാഹചര്യത്തില് വീണ്ടും നേതൃസ്ഥാനത്തെത്തുമെന്ന പരോക്ഷമായ സൂചന നല്കി കോടിയേരി.
പഴയ പാര്ട്ടി സെക്രട്ടറിയെപോലെ തെരഞ്ഞെടുപ്പ് പ്രചരണ രംഗത്ത് നിറസാന്നിധ്യമാണ് ഇപ്പോള് കോടിയേരി. സ്വന്തം തട്ടകമായ കണ്ണൂരിലെ പ്രചാരണത്തിന്റെ മേല്നോട്ടം കോടിയേരിയാണ് നിര്വഹിക്കുന്നത്. ഐ ഫോണ് വിവാദവും മകന് ബിനീഷിന്റെ ജയില്വാസവും തദ്ദേശഭരണ തെരഞ്ഞെടുപ്പിനെ ബാധിക്കുന്ന ഘട്ടമെത്തിയപ്പോഴാണ് ആരോഗ്യകാരണങ്ങള് ചൂണ്ടിക്കാട്ടി സി.പി.എം സംസ്ഥാന സെക്രട്ടറി സ്ഥാനത്തുനിന്നു കോടിയേരി മാറി നിന്നത്. രാഷ്ട്രീയസാഹചര്യത്തിനു പുറമേ ആരോഗ്യകാരണങ്ങളാണ് ഇതിനു കാരണമായി പാര്ട്ടി പറഞ്ഞത്.
സംസ്ഥാന സെക്രട്ടറി സ്ഥാനത്തുനിന്നും കോടിയേരി മാറിനിന്നതോടെ വിവാദങ്ങളുടെ മൂര്ച്ച കുറഞ്ഞു. ഏറ്റവും ഒടുവില് ഭാര്യ വിനോദിനിയുടെ പേരിലുണ്ടായിരുന്ന ഐ ഫോണ് വിവാദത്തില് ക്രൈം ബ്രാഞ്ച് റിപ്പോര്ട്ട് അനുകൂലമായതും കോടിയേരിക്ക് ഗുണം ചെയ്തു.
പാര്ട്ടി പോളിറ്റ് ബ്യൂറോ അംഗമെന്ന നിലയില് പ്രചരണ പരിപാടികളില് സജീവമായ കോടിയേരിക്ക് അണികളുടെ വന് വരവേല്പ്പാണ് ലഭിക്കുന്നത്. പൂര്ണ ആരോഗ്യം വീണ്ടെടുത്ത രിതിയിലുള്ള ആത്മവിശ്വാസവും ഊര്ജവും കോടിയേരി പ്രകടിപ്പിക്കുന്നു. കണ്ണൂരില് ഇ.പി. ജയരാജനും പി.കെ ശ്രീമതിയും അടക്കമുള്ളവര് അത്ര സജീവമല്ല. ആ കുറവും കോടിയേരി മറികടക്കുന്നു.
