തിരുവനന്തപുരം: കഴിഞ്ഞ തവണ തുണച്ച നേമത്ത് ഇത്തവണ അടിതെറ്റുമെന്ന് കേന്ദ്രത്തിന്റെയും സംസ്ഥാനത്തിന്റെയും ഇന്റലിജന്റ്സ് റിപ്പോര്ട്ടുകളും സര്വേകളും പ്രവചിക്കുമ്പോഴും നേമം നിലനിര്ത്തുമെന്ന് ഉറച്ചു വിശ്വസിച്ച് ബിജെപി. തെരഞ്ഞെടുപ്പിന് ശേഷം വിജയസാധ്യത പരിശോധിക്കാന് ചേര്ന്ന ബിജെപി യോഗങ്ങള് കൂട്ടലും കിഴിക്കലും നടത്തി നേമത്തിന്റെ കാര്യത്തില് കൂടുതല് ആത്മവിശ്വാസത്തിലാണ്്. നേമത്ത് ബിജെപിയുടെ അടിത്തറ ശക്തമാണെന്നും പാര്ട്ടിയ്ക്ക് ശക്തമായ വോട്ടുബാങ്ക് ഇവിടെയുണ്ടെന്നുമാണ് ബിജെപി വിലയിരുത്തുന്നത്.
കഴിഞ്ഞ തവണ ഒ രാജഗോപാല് ജയിച്ച മണ്ഡലത്തില് ഇത്തവണയും ജയം നേടാന് കഴിയുമെന്ന് ബിജെപി പ്രതീക്ഷിക്കുമ്പോള് രാജഗോപാല് നേടിയ വ്യക്തിഗത വോട്ടുകള് തിരിച്ചുവരുമെന്നാണ് സിപിഎമ്മും കോണ്ഗ്രസും കരുതുന്നത്. കുമ്മനം രാജശേഖരനും ശിവന്കുട്ടിയും കെ. മുരളീധരനുമാണ് നേമത്ത് ഏറ്റുമുട്ടുന്നത്. പ്രചരണത്തിന് ചുക്കാന് പിടിച്ച ആര്എസ്എസും വിജയപ്രതീക്ഷയിലാണ്. കഴിഞ്ഞ തവണ 8000 വോട്ടിന്റെ ഭൂരിപക്ഷത്തിലാണ് ഒ രാജപോപാല് ജയിച്ചത്. ഇത്തവണയും നേമത്ത് ബിജെപി വോട്ടുകള് കൃത്യമായി തന്നെ പോള് ചെയ്യിക്കാനായെന്നും അതുകൊണ്ടു തന്നെ എന്തെല്ലാം അടിയൊഴുക്കുകള് ഉണ്ടായാലും തോല്വി നേരിടേണ്ടി വരില്ലെന്നുമാണ് ബിജെപിയുടെ കണക്കുകൂട്ടല്.
നേമത്തെ കേരളത്തിലെ ഗുജറാത്ത് എന്നാണ് ബിജെപി കേന്ദ്രങ്ങള് വിശേഷിപ്പിക്കുന്നത്. കഴിഞ്ഞ ലോക്സഭാ തെരഞ്ഞെടുപ്പില് തിരുവനന്തപുരത്ത് ശശി തരൂര് വിജയം നേടിയപ്പോഴും നേമത്തെ വോട്ടുകളില് മുന്നില് ബിജെപിയായിരുന്നു. തിരുവനന്തപുരം ലോക്സഭാ സീറ്റിന് കീഴില് വരുന്ന നേമത്ത് തരൂരിനേക്കാര് 12,000 വോട്ടുകളാണ് കുമ്മനം നേടിയെടുത്തത്. മണ്ഡലത്തില് നിന്നും നാലുലക്ഷത്തോളം വോട്ടുകള് നേടി വിജയം നേടിയ തരൂരിന് നേമം വരുന്ന പ്രദേശത്ത് നിന്നും കിട്ടിയത് 46,472 വോട്ടുകളാണ്. കുമ്മനത്തിന് ആ സ്ഥാനത്ത് 58,000 വോട്ടുകള് കിട്ടി.
2014 ലെ ലോക്സഭാ തെരഞ്ഞെടുപ്പിലും നേമം ഭാഗത്ത് ശശിതരൂര് പിന്നിലായിരുന്നു. അന്ന് മത്സരിച്ച ഒ. രാജഗോപാല് നേമത്ത് നിന്നും 50,685 വോട്ടുകള് നേടിയപ്പോള് ശശി തരൂരിന് കിട്ടിയത് 32,639 വോട്ടുകളാണ്. തദ്ദേശ തെരഞ്ഞെടുപ്പിലും ബിജെപിയ്ക്ക് നേമം വരുന്ന ഡിവിഷനുകളില് വന് മുന്നേറ്റം നടത്താനായി. തിരുവനന്തപുരം മുനിസിപ്പല് കോര്പ്പറേഷനിലെ നേമം നിയമസഭാ മണ്ഡലത്തിന്റെ ഭാഗമായ 23 ഡിവിഷനുകളില് 14 സീറ്റുകളാണ് ബിജെപി നേടിയത്. ഇവിടെ ഇടതുപക്ഷത്തിന് കിട്ടിയത് ഒമ്പത് ഡിവിഷനുകളായിരുന്നു. കഴിഞ്ഞ നിയമസഭാ തെരഞ്ഞെടുപ്പില് എന്തെല്ലാം അടിയൊഴുക്കുകള് ഉണ്ടായാലും നേമം നഷ്ടമാകില്ലെന്ന് ബിജെപി വിശ്വസിക്കാന് കാരണങ്ങളില് ഒന്ന് ഇതാണ്.
അതേസമയം രാജഗോപാല് മത്സരിച്ചപ്പോഴത്തെ സ്ഥിതിയല്ല ഇപ്പോഴെന്നാണ് എല്ഡിഎഫും യുഡിഎഫും കരുതുന്നത്. കഴിഞ്ഞ തവണ രാജഗോപാലിന് 67,813 വോട്ടുകളാണ് കിട്ടിയത്. അതിന് മുമ്പത്തെ തവണ 43,661 വോട്ടുകളും കിട്ടി. 24,152 വോട്ടുകളാണ് ഒ രാജഗോപാല് ബിജെപിയ്ക്ക് കൂട്ടിയെടുത്തത്. എന്നാല് എല്ഡിഎഫിന്റെ വി. ശിവന്കുട്ടി തോറ്റെങ്കിലും 59,142 വോട്ടുകള് നേടാനായി. അതിന് മുമ്പ് ജയിച്ചപ്പോള് കിട്ടിയത് 50,076 വോട്ടുകളാണ്. തോറ്റെങ്കിലും കഴിഞ്ഞ തവണ 9000 വോട്ടുകള് കൂട്ടിയെടുക്കാന് ശിവന്കുട്ടിയ്ക്ക് കഴിഞ്ഞു. ഇത്തവണ ബിജെപിയെ തോല്പ്പിക്കാന് ബിജെപി വിരുദ്ധരുടെ ന്യൂനപക്ഷ വോട്ടുകള് ഇടതുപക്ഷത്തിനോ യുഡിഎഫിനോ കിട്ടിയിരിക്കാമെന്ന് വിലയിരുത്തലുകളുണ്ട്.
മണ്ഡലത്തില് 10,000 ലേറെ വോട്ടുകള് ഉണ്ടെന്ന അവകാശപ്പെടുന്ന എസ്ഡിപിഐ ബിജെപി വിരുദ്ധതയ്ക്ക് വേണ്ടി നേമത്ത് എല്ഡിഎഫിന് വോട്ട് ചെയ്തിട്ടുണ്ടെന്ന് പരസ്യ നിലപാട് എടുത്തിരുന്നു. എസ്ഡിപിഐയുടെ വാക്കുകള് ശരിയാണെങ്കില് അതിനൊപ്പം കഴിഞ്ഞ തവണത്തെ വോട്ടുകള് കൂടി കണക്കാക്കിയാല് നേമത്ത് 2000 വോട്ടുകള്ക്കെങ്കിലും ബിജെപി തോല്വി അറിയും.
