രാജീവ് രവി സംവിധാനo ചെയ്തു, ആസിഫ് അലി മുഖ്യ വേഷത്തിലെത്തുന്ന 'കുറ്റവും ശിക്ഷയും' ജൂലൈ 2ന് തീയേറ്ററുകളില് പ്രദര്ശനത്തിനെത്തും. സിനിമയുടെ റിലീസിംഗ് പോസ്റ്റര് ഒഫീഷ്യല് പേജിലും, ആസിഫ് അലി , ഷെറഫുദീന്, സണ്ണി വെയ്ന്, അലെന്സിയര് ലോപ്പസ്, സെന്തില് എന്നിവരുടെ സോഷ്യല് മീഡിയ പേജുകളിലും കൂടിയാണ് പുറത്തിറക്കിയത്.
രാജീവ് രവിയും ആസിഫ് അലിയും ഒന്നിക്കുന്ന ഈ പോലീസ് ഇന്വെസ്റ്റിഗേഷന് ത്രില്ലറിന്റെ ഫസ്റ്റ് ലുക്ക് പോസ്റ്റര് സോഷ്യല് മീഡിയയില് തരംഗമായിരുന്നു. അതിനിടെ ചിത്രം ഒ.റ്റി.റ്റി റിലീസ് ആണെന്ന അഭ്യൂഹവും പരന്നിരുന്നു. എന്നാല് ആരാധകരെ സന്തോഷിപ്പിച്ചു കൊണ്ട് തീയേറ്ററുകളില് തന്നെ എത്തും എന്ന പ്രഖ്യാപനമാണ് ഉണ്ടായിട്ടുള്ളത്.
ഏറ്റവുമധികം യാഥാര്ഥ്യത്തോടടുടുത്തു നില്ക്കുന്ന ഒരു പോലീസ് സ്റ്റോറി എന്ന നിലയിലാണ് 'കുറ്റവും ശിക്ഷയും' കാത്തിരിക്കപ്പെടുന്നത് . തൊണ്ടിമുതലും ദൃക്സാക്ഷിയും എന്ന ചിത്രത്തിലൂടെ പ്രശസ്തനായ നടനും പോലീസ് ഉദ്യോഗസ്ഥനുമായ സിബി തോമസാണ് ഈ ചിത്രത്തിന് കഥ ഒരുക്കിയിരിക്കുന്നത്. മാധ്യമപ്രവര്ത്തകനും തിരക്കഥാകൃത്തുമായ ശ്രീജിത്ത് ദിവാകരനും സിബി തോമസും ചേര്ന്നാണ് ചിത്രത്തിനായി തിരക്കഥ തയ്യാറാക്കിയിരിക്കുന്നത്.
ഫിലിംറോള് പ്രൊഡക്ഷന്സിന്റെ ബാനറില് അരുണ്കുമാര് വി.ആറാണ് ഈ ചിത്രം നിര്മ്മിക്കുന്നത്. ഇയ്യോബിന്റെ പുസ്തകം, സി.ഐ.എ , വരത്തന് , തുറമുഖം എന്നീ ചിത്രങ്ങളുടെ എക്സിക്യൂട്ടീവ് പ്രൊഡ്യൂസര് ആയിരുന്നു അരുണ് കുമാര് . ബി.അജിത്കുമാര് എഡിറ്റിങ്ങും, സുരേഷ് രാജന് ക്യാമറയും, സംഗീത സംവിധാനം ഡോണ് വിന്സെന്റും നിര്വഹിച്ചിരിക്കുന്നു.
