പത്തനംതിട്ട : സ്വര്ണക്കടത്ത് കേസില് മുഖ്യമന്ത്രിക്കെതിരെ മൊഴി നല്കാന് പ്രതികളായ സ്വപ്നാ സുരേഷിനെയും സന്ദീപ് നായരെയും നിര്ബന്ധിച്ചെന്നാരോപിച്ച് എന്ഫോഴ്സ്മെന്റ് ഡയറക്ടറേറ്റിനെതിരേ ക്രൈംബ്രാഞ്ച് രജിസ്റ്റര്ചെയ്ത രണ്ടു കേസുകളും െഹെക്കോടതി റദ്ദാക്കിയ സാഹചര്യത്തില് സംസ്ഥാന സര്ക്കാര് സുപ്രീം കോടതിയെ സമീപിച്ചാലും തിരിച്ചടി ലഭിക്കാന് സാധ്യത.
ചട്ടങ്ങള് മറികടന്നാണു ക്രൈംബ്രാഞ്ച് കേസെടുത്തതെന്ന ഇ.ഡിയുടെ വാദം െഹെക്കോടതി അംഗീകരിച്ചിരുന്നു. ക്രൈംബ്രാഞ്ച് നപടിക്കെതിരേ നിരവധി തെളിവുകളാണ് ഇ.ഡി. മുന്നോട്ടുവയ്ക്കുന്നത്. കേസിന് ആധാരമായ മൊഴി നല്കിയ വനിതാ പോലീസ് ഉദ്യോഗസ്ഥര് മാത്രമല്ല കേസ് എടുത്ത ക്രൈംബ്രാഞ്ച് എ.ഡി.ജി.പിയും സര്ക്കാരിന്റെ നിയമോപദേശകനും കുടുങ്ങാനും സാധ്യത. മുഖ്യമന്ത്രിക്കും മൂന്നു മന്ത്രിമാര്ക്കുമെതിരേ മൊഴി നല്കാന് ഇ.ഡി. ഉദ്യോഗസ്ഥര് സ്വപ്ന സുരേഷിനോട് ആവശ്യപ്പെടുന്നതു കേട്ടെന്ന വനിത പോലീസ് ഉദ്യോഗസ്ഥരുടെ മൊഴിയുടെ അടിസ്ഥാനത്തിലാണ് ക്രൈംബ്രാഞ്ച് ഇ.ഡിക്കെതിരേ കേസെടുത്തത്.
* വനിതാ പോലീസുകാരുടെ സാന്നിധ്യത്തിലല്ല സ്വപ്ന സുരേഷിനെ ചോദ്യം ചെയ്തതെന്നാണ് ഇ.ഡിയുടെ വാദം. കഴിഞ്ഞ ഓഗസ്റ്റ് 12, 13 തീയതികളിലാണ് കസ്റ്റഡിയിലിരിക്കെ ഇ.ഡി. സ്വപ്ന സുരേഷിനെ ചോദ്യം ചെയ്തത്. കസ്റ്റഡി കാലാവധിക്ക് ശേഷം 14-ന് കോടതിയില് ഹാജരാക്കി. സ്ത്രീ സാന്നിധ്യത്തിലല്ല തന്നെ ഇ.ഡി ചോദ്യം ചെയ്തതെന്ന് അന്ന് സ്വപ്ന കോടതിക്ക് മുന്നില് വെളിപ്പെടുത്തിയിരുന്നു. ഇതേത്തുടര്ന്നാണ് വനിതാ പോലീസിന്റെ സാന്നിധ്യത്തില് മാത്രമെ സ്വപ്നയെ ചോദ്യം ചെയ്യാവൂവെന്ന് െഹെക്കോടതി നിര്ദേശിച്ചത്. അതിനുശേഷം സ്വപ്നയെ ചോദ്യം ചെയ്തിട്ടില്ലെന്ന് ഇ.ഡി വ്യക്തമാക്കുന്നു.
* മുഖ്യമന്ത്രിക്കും മൂന്നു മന്ത്രിമാര്ക്കുമെതിരേ മൊഴിനല്കാന് ഇ.ഡി. നിര്ബന്ധിച്ചെന്ന വനിതാ പോലീസിന്റെ മൊഴിയുടെ അടിസ്ഥാനത്തില് കേന്ദ്ര ഏജന്സിക്കെതിരേ കേസെടുക്കാന് സംസ്ഥാന ഏജന്സിക്ക് കഴിയുമോ എന്നതാണ് നിയമപരമായ മറ്റൊരു ചോദ്യം. മൊഴിയില് പ്രതിപാദിക്കുന്ന ഇരകള് മുഖ്യമന്ത്രിയും മൂന്ന് മന്ത്രിമാരുമാണ്. ഇവരുടെ മൊഴിയുടെ അടിസ്ഥാനത്തിലല്ല കേസെടുത്തത്. സാക്ഷിമൊഴിയുടെ അടിസ്ഥാനത്തിലാണ്. ഇത് സാധാരണ കേസ് അന്വേഷണത്തിന് മാത്രമേ ഉപകരിക്കുവെന്ന് വിദഗ്ധര്.
* മുഖ്യമന്ത്രിയുടെ പേരു പറയാന് ഇ.ഡി നിര്ബന്ധിച്ചിരുന്നെന്നു ഫോണിലൂടെ പറയണമെന്നും വനിതാ പോലീസ് നിര്ദേശിച്ചിരുന്നെന്നു സ്വപ്ന മൊഴി നല്കിയിട്ടുണ്ട്.
* വനിതാ പോലീസ് ഉദ്യോഗസ്ഥരുടെ മൊഴിയുടെ അടിസ്ഥാനത്തില് കേസ് എടുക്കാന് നിര്ദേശിക്കുന്ന ഇ-ഫയലില് മാത്രമല്ല സന്ദീപ് നായര് കോടതിയില് സമര്പ്പിച്ച 164 സ്റ്റേറ്റ്മെന്റിന്റെ അടിസ്ഥാനത്തില് എടുത്ത രണ്ടാമത്തെ കേസ് ഫയലിലും ഡി.ജി.പി ഒപ്പുവച്ചിട്ടില്ല. പകരം എ.ഡി.ജി.പിയാണ് ഒപ്പുവച്ചിട്ടുള്ളത്.
* ഉന്നതര്ക്കെതിരേ അന്വേഷണം തിരിയുന്നത് തടയാന് സര്ക്കാര് ക്രൈംബ്രാഞ്ചിനെ ഉപയോഗിക്കുകയായിരുന്നെന്നു ഇ.ഡിക്ക് വാദിക്കാം. ശിവശങ്കറിന്റെ സാന്നിധ്യത്തില് ആറു തവണ മുഖ്യമന്ത്രിയെ കണ്ടതായി സ്വപ്ന മൊഴി നല്കിയതായി ഇ.ഡി. പ്രാഥമിക കുറ്റപത്രത്തില് പറയുന്നുണ്ട്. യു.എ.ഇ. കോണ്സുലേറ്റില്നിന്നു സ്വപ്ന രാജിവച്ചതു മുഖ്യമന്ത്രിയുടെ അറിവോടെയാണെന്നും യു.എ.ഇ. കോണ്സുല് ജനറല് മുഖ്യമന്ത്രിയെ കണ്ടതു സ്വപ്ന സുരേഷിന്റെ സാന്നിധ്യത്തിലാണെന്നും മൊഴിയുണ്ട്. ഇതിന്റെ അടിസ്ഥാനത്തില് അന്വേഷണം മുഖ്യമന്ത്രിയിലേക്കു നീങ്ങുന്നതു തടയാന് സര്ക്കാര് നടത്തിയ വഴിവിട്ട നീക്കമായി ക്രൈംബ്രാഞ്ച് അന്വേഷണത്തെ ചൂണ്ടിക്കാട്ടാന് ഇ.ഡിക്ക് കഴിയും.
* വനിതാ പോലീസ് ഉദ്യോഗസ്ഥരുടെ മൊഴി രാഷ്ട്രീയ പ്രേരിതമാണെന്നും മൊഴി നല്കിയ ഒരാള് പോലീസ് അസോസിയേഷന് ഭാരവാഹിയാണെന്നും ഇ.ഡി ചൂണ്ടിക്കാട്ടുന്നു. ഇ.ഡി അന്വേഷണത്തിന് തടയിടാനാണ് വനിതാ പോലീസ് ഉദ്യോഗസ്ഥര് മൊഴി നല്കിയതെന്ന് ചൂണ്ടിക്കാട്ടി കേന്ദ്ര രഹസ്യാന്വേഷണ വിഭാഗം നല്കിയ റിപ്പോര്ട്ടും ഇ.ഡിക്ക് തുണയാകും.
* ക്രൈംബ്രാഞ്ച് അന്വേഷണം സംബന്ധിച്ച വിവരങ്ങള് വിചാരണക്കോടതിക്ക് മുന്നില് സമര്പ്പിക്കാന് െഹെക്കോടതി നിര്ദേശിച്ച സ്ഥിതിക്ക് സുപ്രീം കോടതി അത് ശരിവയ്ക്കാനാണ് സാധ്യതയെന്നും നിയമവിദഗ്ധര് ചൂണ്ടിക്കാട്ടുന്നു.
