ലക്നൗ: ഓക്സിജന് ക്ഷാമമില്ലെന്ന് ഉത്തര്പ്രദേശ് മുഖ്യമന്ത്രി യോഗി ആദിത്യനാഥും യുപി ആരോഗ്യവിഭാഗവും ആവര്ത്തിക്കുമ്പോള് തന്റെ സ്വന്തം മണ്ഡലത്തില് ഓക്സിജന് കിട്ടാക്കനിയെന്ന് വ്യക്തമാക്കി സ്വന്തം പാര്ട്ടിക്കാരനും കേന്ദ്രമന്ത്രിയും പാര്ലമെന്റംഗവുമായ സന്തോഷ് ഗാംഗ്വര്.
ബെറെയ്ലി പാര്ലമെന്റ് മണ്ഡലത്തെ പ്രതിനിധീകരിക്കുന്ന സന്തോഷ് തന്റെ മണ്ഡലത്തിലെ ഓക്സിജന് ദൗര്ലഭ്യത്തെക്കുറിച്ചും വെന്റിലേറ്ററുകള് ഉള്പ്പെടെയുള്ള മെഡിക്കല് ഉപകരണങ്ങളുടെ കാര്യത്തിലും നടക്കുന്ന കരിഞ്ചന്തയെക്കുറിച്ചും വിവരിച്ച് യോഗി ആദിത്യനാഥിന് കത്തെഴുതിയിരിക്കുകയാണ്.
സംസ്ഥാനത്തെ സര്ക്കാരാശുപത്രികളില് ഓക്സിജന് ക്ഷാമമില്ലെന്നും വ്യാജ പ്രചരണം നടത്തുന്നവര്ക്ക് എതിരേ കര്ശന നടപടിയെടുക്കുമെന്നും വസ്തുവകകള് കണ്ടുകെട്ടുമെന്നും യോഗി വ്യക്തമാക്കിയതിന് തൊട്ടു പിന്നാലെയാണ് പരാതിയുമായി എംപി തന്നെ രംഗത്ത് വന്നത്. വെന്റിലേറ്ററുകള് ഉള്പ്പെടെയുള്ള മെഡിക്കല് ഉപകരണങ്ങള് ബെറെയ്ലിയില് കരിഞ്ചന്തയില് വില്പ്പന നടക്കുന്നതായി ഇദ്ദേഹം പറഞ്ഞു. കോവിഡ് രോഗികളെ സഹായിക്കാന് ബെറെയ്ലിയിലെ ആശുപത്രികളില് ഓക്സിജന് പ്ലാന്റുകള് കൊണ്ടുവരാനും സംസ്ഥാന സര്ക്കാരിനോട് ആവശ്യപ്പെട്ടിട്ടുണ്ട്.
കത്തിനെക്കുറിച്ചുള്ള മാധ്യമപ്രവര്ത്തകരുടെ ചോദ്യത്തിന് താന് ഉന്നയിച്ച പരാതികളും നിര്ദേശങ്ങളും ജനങ്ങളില് നിന്നും ഉണ്ടായതാണെന്നും താന് അത് മുഖ്യമന്ത്രിക്ക് കൈമാറിയെന്നേയുള്ളെന്നും സന്തോഷ് ഗാംഗ്വര് പറഞ്ഞു.
ഓക്സിജന് ക്ഷാമമെന്നത് വളരെ ചെറിയ പ്രശ്നമാണ് അത് പരിഹരിക്കാവുന്നതേയുള്ളൂ. എന്നാല് അവയ്ക്ക് കരിഞ്ചന്ത വരുന്നത് അംഗീകരിക്കാനാകില്ല. സംസ്ഥാനത്തെ സ്വകാര്യ - സര്ക്കാര് ആശുപത്രികളില് ഓക്സിജന് ദൗര്ലഭ്യം ഇല്ലെന്നും കോവിഡ് ബാധിതരായ എല്ലാവര്ക്കും ഓക്സിജന്റെ ആവശ്യം വരുന്നില്ലെന്നും ആയിരുന്നു യോഗി ആദിത്യനാഥ് കഴിഞ്ഞ മാസം പറഞ്ഞത്.
ഈ വാര്ത്താസമ്മേളനത്തിലായിരുന്നു അഭ്യൂഹങ്ങളും അജണ്ഡ പ്രകാരം വ്യാജവാര്ത്ത സൃഷ്ടിക്കുന്നവര്ക്ക് എതിരേ ദേശീയ സുരക്ഷാ നിയമപ്രകാരം സ്വത്ത് കണ്ടുകെട്ടുന്നതടക്കമുള്ള നടപടികള് സ്വീകരിക്കുമെന്നും യോഗി പറഞ്ഞത്. എന്നാല് കരിഞ്ചന്ത നടക്കുന്നുണ്ടെന്നു സമ്മതിച്ച യോഗി അതിനെതിരേ കനത്ത നടപടി വരുമെന്നും പറഞ്ഞിരുന്നു.
തൊട്ടുപിന്നാലെ വിമര്ശനവുമായി കോണ്ഗ്രസ് നേതാവ് പ്രിയങ്കാഗാന്ധി രംഗത്ത് വരികയും ചെയ്തിരുന്നു. ഓക്സിജന് ദൗര്ലഭ്യം സംസ്ഥാനത്ത് ഉടനീളമുണ്ടെന്നുള്ളണ് സത്യമാണെന്നും ഇക്കാര്യത്തില് തനിക്കെതിരേ കേസെടുക്കുകയോ സ്വത്ത് കണ്ടുകെട്ടുകയോ ചെയ്തോളാനും എന്നാലും ദൈവത്തെയോര്ത്ത് സാഹചര്യത്തിന്റെ ഗൗരവം മനസ്സിലാക്കണമെന്നും പറഞ്ഞിരുന്നു.
അതേസമയം ബെറെയ്ലിയില് 24 മണിക്കൂറിനിടയില് 736 പുതിയകേസുകളാണ് റിപ്പോര്ട്ട് ചെയ്തത്. ഇതോടെ ബെറെയ്ലിയില് ചികിത്സ തേടുന്നവരുടെ എണ്ണം 6,387 ആയി. യുപിയില് കോവിഡ് മരണം 200 ആയിട്ടുണ്ട്.
