ന്യൂഡല്ഹി: കോവിഡിന്റെ രണ്ടാം തരംഗത്തില് ആള്ക്കാര് ശ്വാസംകിട്ടാതെ മരിക്കുമ്പോള് കേന്ദ്രസര്ക്കാരിനെതിരേ ഉയരുന്ന വിമര്ശനങ്ങള് ചില്ലറയല്ല. കോവിഡ് കൈകാര്യം ചെയ്ത രീതിയില് ദേശീയ അന്താരാഷ്ട്ര തലങ്ങളില് ഉയരുന്ന വിമര്ശനങ്ങളില് വലഞ്ഞതോടെ കേന്ദ്രത്തെ രക്ഷിക്കാന് വന് പദ്ധതികളുമായി ആര്എസ്എസും ബിജെപിയും.
കോവിഡ് വിമര്ശനങ്ങളെ മറികടക്കാന് സര്ക്കാര് തയ്യറാക്കിയിട്ടുള്ള പദ്ധതികളും ചെയ്ത കാര്യങ്ങളും ജനങ്ങളില് പ്രചരിപ്പിച്ച് പോസീറ്റീവായി ചിന്തിക്കാന് അവരെ പ്രേരിപ്പിക്കുന്ന തരത്തിലുള്ള ബ്രഹത്തായ പ്രത്യാക്രമണ പദ്ധതിയാണ് അണിയറയില് ഒരുങ്ങുന്നതെന്നാണ് വിവരം.
വിമര്ശകര്ക്കും രാഷ്ട്രീയ പ്രതിയോഗികള്ക്കും എതിരേ കേന്ദ്രവും ബിജെപിയും ആര്എസ്എസും കൈകോര്ത്തുള്ള പ്രവര്ത്തനമാണെന്ന് ദേശീയ മാധ്യമം റിപ്പോര്ട്ട് ചെയ്യുന്നു. കോവിഡില് സര്ക്കാര് ഒരുക്കിയിട്ടുള്ള സൗകര്യങ്ങളെ കുറിച്ച് പറയാനും അത്തരം കാര്യങ്ങള്ക്ക് പരമാവധി പ്രചരണം നല്കാനുമാണ് ഉദ്ദേശം. വിമര്ശനങ്ങളെ സര്ക്കാര് ചെയ്ത കാര്യങ്ങളെക്കുറിച്ച് വിശദീകരിച്ച് പ്രതിരോധിക്കും സര്ക്കാരിന് എതിരേയുള്ള സംഘടിത പ്രചരണങ്ങളെ അനുകൂല പ്രചരണങ്ങള് കൊണ്ടു തടയിടും.
പ്രധാനമന്ത്രിയുടെ ട്വിറ്റര് പേജ്, പ്രതിമാസ റേഡിയോ പ്രഭാഷണമായ മന് കി ബാത്ത് എന്നിവ വഴി സര്ക്കാര് നീങ്ങുമ്പോള് തങ്ങളുടേതായ രീതിയില് പ്രതിരോധ പ്രചരണങ്ങളുമായി ബിജെപിയും ആര്എസ്എസും ഇറങ്ങും. കേന്ദ്രസര്ക്കാര് കോവിഡ് പ്രതിരോധത്തിനായി ചെയ്തിരിക്കുന്ന കാര്യങ്ങള് എടുത്തു പറഞ്ഞും സര്ക്കാര് അനുകൂല വാദങ്ങള് നിരത്തിയും വിമര്ശനങ്ങളെ കടന്നാക്രമിക്കാനാണ് പദ്ധതി. ഇതിനായി സാമൂഹ്യമാധ്യമങ്ങള് കാര്യക്ഷമമായി ബിജെപിയുടേയും ആര്എസ്എസിന്റെയും വിംഗുകള് കൈകാര്യം ചെയ്യും.
കേന്ദ്രസര്ക്കാര് സര്ക്കാര് പദ്ധതികളുടെ പ്രചരണം പ്രധാനമന്ത്രിയുടെ തന്നെ വാക്കുകളിലൂടെ പുറത്ത് എത്തിക്കുമ്പോള് സര്ക്കാര് അനുകൂല വാര്ത്തകള് ഉയര്ത്തിക്കാട്ടിയും ലേഖന പരമ്പരകള് സൃഷ്ടിച്ചും സാമൂഹ്യമാധ്യമങ്ങള് വഴി ജനങ്ങളില് എത്താനാണ് ബിജെപിയുടെ പദ്ധതി. ആര്എസ്എസ് സര്ക്കാരിനെതിരേ ഉയരുന്ന വിമര്ശനങ്ങളെ ഉന്നതരെ വെച്ച് പ്രചോദനാത്മക പ്രഭാഷണങ്ങളും പ്രസംഗങ്ങളും സാമൂഹ്യമാധ്യമങ്ങള് വഴി ജനങ്ങളില് സര്ക്കാരിന് അനുകൂലമായ സമീപനമാക്കി മാറ്റാനുള്ള പ്രവര്ത്തനങ്ങളില് ഏര്പ്പെടും.
ജോയന്റ് സെക്രട്ടറി റാങ്കിലുള്ള ഉദ്യോഗസ്ഥര് ഉള്പ്പെടെ കേന്ദ്ര സര്ക്കാരിന്റെ ഉദ്യോഗസ്ഥര്ക്ക് കഴിഞ്ഞയാഴ്ച ഇക്കാര്യത്തില് ഒരു ശില്പ്പശാല നടന്നിരുന്നു. മികച്ച രീതിയിലുളള ആശയവിനിമയം സാധ്യമാക്കാനും സര്ക്കാര് ചെയ്തിട്ടുള്ള പോസിറ്റീവായ കാര്യങ്ങള് ഉയര്ത്തിക്കാട്ടുന്ന പ്രവര്ത്തനങ്ങള് ഉണ്ടാകണമെന്നുമാണ് പറഞ്ഞിരിക്കുന്നത്. ആവശ്യമായ രീതിയില് ആശയവിനിമയം നടത്താന് പ്രധാനമന്ത്രിയുടെ ട്വിറ്റര് പേജും പ്രധാനമന്ത്രിയുടെ പ്രതിമാസ റേഡിയോ പ്രഭാഷണമായ മന്കിബാത്തും ഉപയോഗിക്കും. ഓക്സിജന് എക്സ്പ്രസ് പോലെ കേന്ദ്രം നല്കിയിട്ടുള്ള സംവിധാനങ്ങളെക്കുറിച്ച് കേന്ദ്രമന്ത്രിമാരും ട്വീറ്റ് ചെയ്യണം. സര്ക്കാര് അനുകൂല വാര്ത്തകളും ലേഖനങ്ങളും ഇവര് കോവിഡ് കാലത്ത് സമയാസമയത്ത് പ്രചരിപ്പിക്കണം.
കേന്ദ്രസര്ക്കാരിനെതിരേ കോവിഡിനെപ്രതി ഉയരുന്ന വിമര്ശനങ്ങളെയും പ്രതിഷേധങ്ങളെയും പാര്ട്ടി ലെവലില് ബിജെപി പ്രതിരോധിക്കും. എഴുത്തിനെ എഴുത്തിലൂടെ തന്നെ പ്രതിരോധിക്കും. കഴിഞ്ഞ ദിവസം സോണിയാഗാന്ധിയുടെ വിമര്ശനത്തിന് ബിജെപി പ്രസിഡന്റ് ജെ.പി.ദത്ത എഴുതിയ മറുപടിക്കത്ത് ഇതിന് ഉദാഹരണമാണ്. നാലു പേജുകള് വരുന്ന ജെ.പി. ദത്തയുടെ കത്ത് സോണിയാഗാന്ധിക്കും രാഹുലിനും എതിരേയുള്ള ശക്തമായ പ്രത്യാക്രമണം ആയിരുന്നു. പ്രധാനമന്ത്രിയുെട ഫണ്ടില് നിന്നും വിതരണം ചെയ്ത വെന്റിലേറ്ററിനെക്കുറിച്ചും മറ്റ് കോവിഡ് പ്രതിരോധ സംവിധാനങ്ങളെക്കുറിച്ചും കത്തില് പ്രതിപാദിച്ചിട്ടുണ്ട്.
സര്ക്കാരിന് പ്രതിരോധം തീര്ക്കാന് ശക്തമായ ഓണ്ലൈന് പ്രചരണമാണ് ആര്എസ്എസിന്റെ ചുമതല. വിമര്ശനങ്ങള്ക്ക് മറുപടി നല്കാന് 'പോസിറ്റീവിറ്റി അണ്ലിമിറ്റഡ്' എന്ന പേരില് ഒരു ഓണ്ലൈന് വിംഗ് തന്നെ അവര് രൂപപ്പെടുത്തിയിരിക്കുകയാണ്. മതഗുരുക്കന്മാരും സമൂഹത്തെ പ്രചോദിപ്പിച്ച ഉന്നതരും വ്യവസായ പ്രമുഖര് എന്നിവര് ഉള്പ്പെടെ ഉന്നതരുടെ പ്രഭാഷണങ്ങള്, പ്രസംഗങ്ങള് എന്നിവ പരിപാടിയില് ഉള്പ്പെടുത്തിയിട്ടുണ്ട്. സര്ക്കാരിന് അനുകൂലമായ പോസിറ്റീവിറ്റി നിറയ്ക്കാനുള്ള ആര്എസ്എസ് പരിപാടിയില് നേതാവ് മോഹന് ഭഗവത് തന്നെ ഉടന് രാഷ്ട്രത്തെ അഭിസംബോധന ചെയ്തേക്കും.
