പത്തനംതിട്ട: കോവിഡ് ബാധിതരായ രണ്ട് രോഗികള് കഴിയുന്നത് ഓലഷെഡില്. നിരണം പാപ്പാത്ര അംബേദ്കര് കോളനിയിലെ രണ്ട് പുരുഷന്മാരാണ് താറാവ് ഷെഡില് അഭയം തേടിയത്. വീട്ടില് കുട്ടികളും പ്രായമുള്ളവരും ഉള്ളതിനാല് അവര്ക്ക് രോഗം പടരാതിരിക്കാനാണ് ഇരുവരും ഷെഡില് കഴിയുന്നത്.
ഇന്നലെ വൈകിട്ടാണ് ഇവര്ക്ക് രോഗം സ്ഥിരീകരിച്ചത്. മാറിതാമസിക്കാന് വീട്ടില് സൗകര്യങ്ങളില്ല. നിരണം പഞ്ചായത്ത് ഇടപെട്ട് സി.എഫ്.എല്.ടി്സിയും ഒരുക്കിയിട്ടില്ല. ഇതോടെ ഇവര് താറാവ് കര്ഷകര് വിശ്രമിക്കുന്ന പാടവരമ്പത്തെ ഷെഡിലേക്ക് മാറേണ്ടി വന്നത്. രാത്രി കനത്ത മഴ വന്നതോടെ ഒരു രോഗിയെ വീട്ടുകാര് തിരിച്ചുവിളിച്ചുകൊണ്ടുപോയി അടുക്കളയില് പാര്പ്പിച്ചു. പുലര്ച്ചെ ഇദ്ദേഹം ഷെഡിലേക്ക് മടങ്ങുകയും ചെയ്തു.
പഞ്ചായത്തില് നാല് പേര് ഇതിനകം തന്നെമരിച്ചു. നിരവധി പേര്ക്ക് രോഗമുണ്ട്. ആളുകള് തിങ്ങിപ്പാര്ക്കുന്ന പ്രദേശമാണ് ഇവിടം. പഞ്ചായത്തിന്റെ ഭാഗത്തുനിന്നും ഒരു നടപടിയുമെടുക്കാതെ വന്നതോടെയാണ് പൊതുപ്രവര്ത്തകര് ഈ സംഭവം മാധ്യമപ്രവര്ത്തകരുടെ ശ്രദ്ധയില്പെടുത്തിയത്.
എന്നാല് അത്തരമൊരു സംഭവമുണ്ടായിട്ടില്ലെന്ന് പഞ്ചായത്ത് പ്രസിഡന്റ് കെ.പി പുന്നൂസ് പറഞ്ഞു. രാവിലെ താന് ആ പ്രദേശത്ത് പോയിരുന്നു ആരും ഇത്തരമൊരു പരാതി പറഞ്ഞില്ല. ആറാം വാര്ഡ് മെമ്പര് ബിനീഷിന്റെ നേതൃത്വത്തില് ഇവിടെയുള്ള രോഗികളെ പള്ളിവക ക്വാറന്റീന് കേന്ദ്രത്തിലേക്ക് മാറ്റുന്നുണ്ട്. മെമ്പര് കോവിഡ് രോഗിയായിട്ടു കൂടിയും എല്ലാ ഒരുക്കങ്ങളും നടത്തുന്നുണ്ട്. യു.ഡി.എഫ് ഭരണസമിതിയെ അപകീര്ത്തിപ്പെടുത്താന് മനഃപൂര്വ്വം ഉന്നയിക്കുന്ന ആരോപണമാണ്. സി.എഫ്.എല്.ടി.സി തുറക്കാന് സര്ക്കാര് ഒരു സംവിധാനവും ചെയ്തു തന്നിട്ടില്ല. ആരോഗ്യവകുപ്പ് ഒരു കാര്യത്തിനും അനുമതി നല്കിയിട്ടില്ല. മനുഷ്യത്വത്തിന്റെ പേരില് എല്ലാ സംവിധാനവും പഞ്ചായത്ത് മൂനകൈ എടുത്ത് ചെയ്തിട്ടുണ്ടെന്നും ഇവരെ വൈകിട്ടോടെ സുരക്ഷിത കേന്ദ്രത്തിലേക്ക് മാറ്റുമെന്നും പ്രസിഡന്റ് ഒരു ദൃശ്യ മാധ്യമത്തോട് പറഞ്ഞു.
