ന്യൂഡല്ഹി: രാജ്യത്തെ ആശുപത്രികളില് ഓക്സിജന് ക്ഷാമമുണ്ടാവുകയും നൂറ് കണക്കിന് രോഗികള് ഓക്സിജന് ലഭിക്കാതെ മരിക്കുകയും ചെയ്തതിന് പിന്നാലെ കേന്ദ്രത്തിന്റെ വീഴ്ച സമ്മതിച്ച് ഗതാഗത മന്ത്രി നിതിന് ഗഡ്കരിയും.
ഓക്സിജന് ലഭിക്കാതെ രാജ്യത്ത് ആളുകള് മരിക്കുന്നത് ഒരു നല്ല കാര്യമല്ലെന്ന് നിതിന് ഗഡ്ക്കരി പ്രതികരിച്ചു. ഒന്നാം തരംഗത്തിന് ശേഷം കേന്ദ്രം അശ്രദ്ധകാട്ടിയെന്ന ആരോപണം തുടരുന്നതിന് ഇടയിലാണ് കേന്ദ്രത്തെ വിമര്ശിച്ച് നിതിന് ഗഡ്ക്കരിയും രംഗത്ത് വന്നത്. കൊവിഡിന്റെ രണ്ടാം തരംഗമോ മൂന്നാം തരംഗമോ ഉണ്ടാവുകയാണെങ്കില്, അതിനെ നേരിടാന് ആശുപത്രികളില് ഓക്സിജന് സൗകര്യം ഉണ്ടാകണം എന്ന് ഗഡ്കരി പറഞ്ഞു. എല്ലാ ആശുപത്രികളെയും ഓക്സിജനില് സ്വയം പര്യാപ്തരാക്കേണ്ടതുണ്ടെന്നും അദ്ദേഹം കൂട്ടിച്ചേര്ത്തു.
രാജ്യത്ത് ഓക്സിജന് ക്ഷാമമുണ്ടെന്ന് അംഗീകരിക്കാന് കേന്ദ്ര സര്ക്കാരോ ബി.ജെ.പിയോ ഇതുവരെ തയ്യാറാകാത്ത ഘട്ടത്തിലാണ് വിമര്ശനവുമായി അദ്ദേഹം എത്തിയത്. സന്നദ്ധ സംഘടനകളും മത സംഘടനകളും ഓക്സിജന് കോണ്സന്ട്രേറ്ററുകളും സിലിണ്ടറുകളും വിതരണം ചെയ്യാനായി മുന്നോട്ടുവരണം എന്നും നിതിന് ഗഡ്ക്കരി ആവശ്യപ്പെട്ടു.
സര്വകലാശാലകളിലെ വൈസ് ചാന്സലര്മാരുമായി നടത്തിയ വെബിനാറില് ആയിരുന്നു ഗഡ്ക്കരിയുടെ വിമര്ശനം. രാജ്യത്ത് കോവിഡ് മരണം ഉയരുന്നതിനിടയില് വാക്സിന് നയത്തില് മാറ്റം വരണമെന്നും മറ്റു കമ്പനികള്ക്ക് കൂടി വാക്സിന് നിര്മ്മിക്കാന് അനുമതി നല്കണമെന്നും അങ്ങിനെ ചെയ്താലേ പ്രശ്നത്തിന് പരിഹാരം ഉണ്ടാകൂ എന്നും പറഞ്ഞു.
വാക്സിന് ആവശ്യത്തിന് ഇന്ത്യയില് ലഭിക്കുന്നില്ല. നിലവിലെ സാഹചര്യം തുടരുകയാണെങ്കില് സ്ഥിതി രൂക്ഷമാകുമെന്നും നിതിന് ഗഡ്ക്കരി പറഞ്ഞു. മെയ് മാസം തുടക്കത്തില് ഗഡ്കരിയുടെ വകുപ്പിന്റെ കീഴില് വരുന്ന നാഷണല് ഹൈവേയ്സ് അതോറിറ്റി ഓഫ് ഇന്ത്യയെ ഓക്സിജന് പ്ലാന്റ് നിര്മ്മാണത്തിന്റെ ചുമതല ഗഡ്കരി ഏല്പ്പിച്ചിരുന്നു. കൊവിഡ് പ്രതിരോധത്തില് സംഭവിച്ച പിഴവില് സംഘപരിവാറില് നിന്ന് തന്നെ മോഡി സര്ക്കാരിനെതിരേ വിമര്ശനം രൂക്ഷമാകുന്നുണ്ട്. ആര്എസ്എസ് തലവന് കേന്ദ്രസര്ക്കാരിന് വിമര്ശനവുമായി രംഗത്ത് വന്നിരുന്നു.
ആദ്യ തരംഗത്തിന് ശേഷം ജനങ്ങളും സര്ക്കാരുകളും ഭരണകൂടവും അശ്രദ്ധ കാണിച്ചെന്നായിരുന്നു ആര്.എസ്.എസ് തലവന് മോഹന് ഭാഗവത് പറഞ്ഞത്. ഡോക്ടര്മാര് മുന്നറിയിപ്പ് നല്കിയിരുന്നു. എന്നിട്ടും നമ്മള് അശ്രദ്ധരായിരുന്നു എന്നും മോഹന് ഭാഗവത് പറഞ്ഞു.
