ചെന്നൈ: തമിഴ്പുലികളുടെ കഥ പറയുന്ന ഫാമിലിമാന് 2 വെബ് സീരീസിനെതിരേ ഉയരുന്ന പ്രതിഷേധത്തില് നടി സാമന്തയ്ക്ക്എതിരേ തമിഴ് ജനതയുടെ രോഷം ശക്തിപ്രാപിക്കുന്നു. ട്വിറ്ററില് ‘ഷെയിം ഓണ് യൂ സാമന്ത’ എന്ന പേരില് വിദ്വേഷ ക്യാംപെയിനും തുടങ്ങിയിട്ടുണ്ട്. തമിഴ്പുലികളെ തീവ്രവാദികളായി ചിത്രീകരിക്കുന്ന സീരീസില് വനിതാ തമിഴ് പോരാളിയായിട്ടാണ് സാമന്ത അഭിനയിക്കുന്നതാണ് പ്രതിഷേധത്തിന് കാരണം.
വളരെ വൈകാരികമായിട്ടാണ് ആള്ക്കാരുടെ പ്രതികരണം. ഒരു അഭിസാരികയായി അഭിനയിച്ചാലും തമിഴ്പുലിയായി അഭിനയിക്കരുതെന്നും തമിഴ്പുലികള് തങ്ങളുടെ വംശത്തിന്റെ കാവലാളുകളായ ദൈവങ്ങളാണെന്നായിരുന്നു ട്വിറ്ററിലെ ഒരു പ്രതികരണം. സാമന്തയ്ക്ക് നടിയെന്ന നിലയില് അംഗീകാരം നേടിക്കൊടുത്ത തമിഴ്ജനതയോട് ഈ രീതിയില് നന്ദികേട് കാണിക്കരുതെന്നും ചിലര് പറയുന്നു.
ശ്രീലങ്കയിലെ തമിഴ് പോരാളികളെന്ന് തമിഴര് വിശേഷിപ്പിക്കുന്ന എല്ടിടിഇ യെ സീരീസില് തീവ്രവാദികളായി ചിത്രീകരിച്ചിരിക്കുന്നതാണ് തമിഴ്ജനതയുടെ പ്രതിഷേധത്തിന് കാരണമായിരിക്കുന്നത്. തമിഴരുടെ വികാരം വ്രണപ്പെടുത്തുന്ന കഥാപാത്രത്തെ അവതരിപ്പിച്ചതിന് സാമന്ത മാപ്പ് പറയണമെന്നുമായിരുന്നു പ്രതിഷേധക്കാര് പറഞ്ഞത്. എല്.ടി.ടി.ഇ സ്വാതന്ത്ര്യ സമരസേനാനികളുടെ സംഘടനായാണെന്നും അതിന്റെ നേതാവാണ് പ്രഭാകരനെന്നും സീരീസ് തമിഴ് ജനതയുടെ വികാരങ്ങളെ ഹനിക്കുന്നുവെന്നും ചിലര് ട്വീറ്റ് ചെയ്തു.
ആമസോണ് പ്രൈമില് ജൂണ് നാല് മുതല് സ്ട്രീം ചെയ്യാനൊരുങ്ങുന്ന ദ ഫാമിലി മാന് -2 എന്ന വെബ് സീരീസില് രാജിയെന്ന കഥാപാത്രത്തെയാണ് സാമന്ത അവതരിപ്പിക്കുന്നത്. തമിഴ് സംവിധായകനും രാഷ്ട്രീയ പ്രവര്ത്തകനുമായ സീമാനാണ് പ്രതിഷേധവുമായി രംഗത്ത് എത്തിയത്.
വെബ് സീരീസ് പുറത്തിറങ്ങിയാല് സാമന്തയും അണിയറ പ്രവര്ത്തകരും ആമസോണും അതിന്റെ ഭവിഷ്യത്തുകള് നേരിടേണ്ടിവരുമെന്ന് സീമാന് പറഞ്ഞിരുന്നു. മനോജ് ബാജ്പേയ് ആണ് സീരിസിലെ പ്രധാനകഥാപാത്രത്തെ അവതരിപ്പിക്കുന്നത്. കുടുംബസ്ഥനായ, അതേസമയം തീവ്രവാദ വിരുദ്ധ സേനയിലെ ഉദ്യോഗസ്ഥനുമായ ശ്രീകാന്ത് തിവാരി എന്ന കഥാപാത്രമായാണ് മനോജ് ബാജ്പേയ് ഫാമിലി മാനില് എത്തുന്നത്.
