ന്യൂഡല്ഹി: വലിയ പ്രതീക്ഷയുമായി പോയ പശ്ചിമബംഗാളിലും കേരളത്തിലും ഉണ്ടായ അനുഭവങ്ങളില് നിന്നും പാഠം ഉള്ക്കൊള്ളണമെന്ന ബിജെപി നേതാക്കളോട് നരേന്ദ്രമോഡി. ഉത്തര്പ്രദേശ് അടക്കം അഞ്ചു സംസ്ഥാനങ്ങളില് അടുത്ത വര്ഷം നടക്കാന് പോകുന്ന തെരഞ്ഞെടുപ്പ് ലക്ഷ്യമിട്ട് വിവിധ സമിതികളുടെ നേതാക്കന്മാരുമായി നടത്തിയ കൂടിക്കാഴ്ചയിലായിരുന്നു മോഡി ഇക്കാര്യം പറഞ്ഞത്.
കോവിഡ് മൂന്നാം തരംഗത്തിന്റെ ഭീഷണിയില് രാജ്യം നില്ക്കുമ്പോള് അനേകം കാര്യങ്ങള് മുന്നില് നില്ക്കേ വരാനിരിക്കുന്ന യുപി തെരഞ്ഞെടുപ്പിന് വേണ്ടിയാണ് ബിജെപി നേതൃത്വം തല പുകച്ചു തുടങ്ങിയിരിക്കുന്നത്. ബിജെപി അദ്ധ്യക്ഷന് ജെപി. നദ്ദയും സംഘടനാ ചുമതലയുള്ള ദേശീയ സെക്രട്ടറി സന്തോഷും മറ്റ് മോര്ച്ചകളുടെ പ്രസിഡന്റുമാരും പങ്കെടുത്ത യോഗത്തില് പ്രധാനമായും ഉയര്ന്നുവന്ന വിഷയം കോവിഡിന്റെ പശ്ചാത്തലത്തില് വിര്ച്വല് പ്രചരണം ഏത് രീതിയില് വേണമെന്നതായിരുന്നു.
കോവിഡ് മഹാമാരിക്കിടയില് എങ്ങിനെ തെരഞ്ഞെടുപ്പില് ഒരുങ്ങണമെന്ന കാര്യത്തില് ബിജെപി അദ്ധ്യക്ഷന് ജെപി നദ്ദയും ദേശീയ ജനറല് സെക്രട്ടറിമാരും മോഡിയുമായി ഞായറാഴ്ച അഞ്ചു മണിക്കൂറുകളാണ് ചര്ച്ച നടത്തിയത്. മമതബാനര്ജിയെ ബിജെപിയ്ക്ക് ബംഗാളില് വെല്ലുവിളിക്കാനാകാതെ വന്നത് എന്തുകൊണ്ടാണ് എന്നും കേരളത്തിലെ ഹിന്ദുവളര്ച്ച ഉണ്ടായിട്ടും എന്തുകൊണ്ടാണ് പരാജയപ്പെട്ടതെന്നുമുള്ള തെറ്റുകളില് നിന്നും പാഠം ഉള്ക്കൊളളണമെന്ന് യോഗത്തില് പ്രധാനമന്ത്രി പറഞ്ഞു. ഈ തോല്വികളില് നിന്നും പാഠം ഉള്ക്കൊണ്ടു വേണം ഭാവിയെക്കുറിച്ച് ചിന്തിക്കാന് എന്നും പ്രധാനമന്ത്രി പറഞ്ഞു.
പാര്ട്ടിയുടെ ഡിജിറ്റല് റീച്ച് മെച്ചപ്പെടുത്താനുള്ള തീരുമാനങ്ങളിലായിരുന്നു യോഗം പ്രധാനമായും ശ്രദ്ധിച്ചത്. തെരഞ്ഞെടുപ്പ് നടക്കാന് പോകുന്ന അഞ്ചു സംസ്ഥാനങ്ങളിലെ പാര്ട്ടി കേഡറുകളില് പെട്ടവര്ക്ക് ഇക്കാര്യത്തില് പരിശീലനം നല്കണം. നിയമസഭാ മണ്ഡലങ്ങളില് സീനിയര് നേതാക്കളുടെ വിര്ച്വല് റാലിയുടെ ലൈവ് സ്ട്രീമിംഗ് വേണം എന്നതുള്പ്പെടെയുള്ള കാര്യങ്ങള് ആലോചിച്ചു. തെരഞ്ഞെടുപ്പില് ജനങ്ങള്ക്ക് ഇടയിലേക്ക് എങ്ങിനെ ഇറങ്ങാനാകുമെന്ന് വിവിധ മോര്ച്ചകളുടെ അഭിപ്രായവും ആരാഞ്ഞു.
തെരഞ്ഞെടുപ്പ് പരിപാടികള് പ്രാദേശിക മേഖലകളില് ആസൂത്രണം ചെയ്യാന് യുപിയിലെ ബിജെപി നേതാക്കളോട് ആവശ്യപ്പെടുകയും ചെയ്തു. മണ്ഡലത്തിന്റെ ചുമതലയുള്ളവര്ക്ക് സിറ്റിംഗ് എംഎല്എമാരുടെ പ്രകടനം വിലയിരുത്താനും മതിയായ ഫീഡ്ബാക്ക് നല്കാനും നിര്ദേശിച്ചിട്ടുണ്ട്. ഈ റിപ്പോര്ട്ടിന്റെ അടിസ്ഥാനത്തിലായിരിക്കും സ്ഥാനാര്ത്ഥി നിര്ണ്ണയം. ദേശീയ ജനറല് സെക്രട്ടറി ബിഎല് സന്തോഷിനും പുറമേ പ്രസിഡന്റ് ജെ.പി.നദ്ദയും എട്ടു ജനറല് സെക്രട്ടറിമാരും യുവ, കിസാന്, മഹിളാ, ഒബിസി, എസ് സി, എസ്ടി, ന്യൂനപക്ഷ മോര്ച്ചകളുടെ പ്രസിഡന്റുമാരും യോഗത്തിനുണ്ടായിരുന്നു.
