കൊല്ക്കത്ത: മുകുള്റോയിയെ സ്വീകരിച്ചെന്ന് വെച്ച് തൃണമൂല് കോണ്ഗ്രസിനെ ചീത്തവിളിച്ച് നിയമസഭാ തെരഞ്ഞെടുപ്പിന് തൊട്ടുമുമ്പ് മറുകണ്ടം ചാടിയ എല്ലാവരേയും സ്വീകരിക്കുമെന്ന് കരുതേണ്ടെന്ന് പശ്ചിമബംഗാള് മുഖ്യമന്ത്രി മമതാബാനര്ജി. ബിജെപിയുടെ പണത്തില് മറിഞ്ഞ് മമതാബാനര്ജിയെയും പാര്ട്ടിയെയും വിമര്ശിക്കുകയും തൃണമൂലിനെ ഒറ്റു കൊടുത്തവരെയും ഒരിക്കലും പരിഗണിക്കുകയില്ലെന്നും മമത അസന്നിഗ്ദ്ധമായി പ്രഖ്യാപിച്ചു.
നിയമസഭാ തെരഞ്ഞെടുപ്പില് വന് തോല്വി ഏറ്റുവാങ്ങിയതിന് പിന്നാലെ അനേകം നേതാക്കള് ബിജെപിയില് നിന്നും തൃണമൂല് കോണ്ഗ്രസിലേക്ക് തിരിച്ചുവരാന് താല്പ്പര്യം കാട്ടുന്നെന്നാണ് റിപ്പോര്ട്ടുകള്. അതിനിടയില് ബിജെപിയില് നിന്നും തൃണമൂല് കോണ്ഗ്രസിലേക്ക് തിരിച്ചുവന്ന മുകുള്റോയിയെ സ്വീകരിക്കുന്ന ചടങ്ങിലായിരുന്നു മമത നയം വ്യക്തമാക്കിയത്. മുകുള്റോയി തനിക്ക് മകനെ പോലെ ആണെന്നും അദ്ദേഹം തുടര്ന്നും ബിജെപിയില് ചേരുന്നതിന് മുമ്പ് എന്ന പോലെ പാര്ട്ടിയിലെ സുപ്രധാന പദവിയില് തന്നെയുണ്ടാകും എന്നും പറഞ്ഞു.
തൃണമൂലിലേക്ക് തിരിച്ചു വന്നതോടെ മുകുള്റോയിയ്ക്ക് മനസ്സമാധാനം കിട്ടിയെന്നും ബിജെപിയില് ആയിരുന്നപ്പോള് അദ്ദേഹത്തിന്റെ ആരോഗ്യത്തെ പോലും അത് ബാധിച്ചെന്നും മമത പറഞ്ഞു. ബിജെപിയില് മുകുള്റോയി ഭീഷണി നേരിട്ടിരുന്നു എന്നും മമത ആരോപിച്ചു. ബിജെപിയില് പോയത് പറ്റിയ ഏറ്റവും വലിയ മണ്ടത്തരമാണെന്നായിരുന്നു മുകുള്റോയി പറഞ്ഞതെന്നും മമത പറഞ്ഞു. ബംഗാളില് പ്രചാരമുണ്ടാക്കാന് ബിജെപി തന്നെ ഉപയോഗിക്കുകയായിരുന്നു എന്നും ഇദ്ദേഹം പറഞ്ഞു.
വലിയ ദേശീയനേതാക്കള് ഇറങ്ങിയിട്ടും വന്തുക ചെലവഴിച്ചിട്ടും തെരഞ്ഞെടുപ്പില് ജയിക്കാനാകാതിരുന്നതും പിന്നാലെ മുകുള്റോയിയുടെ തൃണമൂലിലേക്കുള്ള മടക്കവും ബിജെപിയെ ഞെട്ടിച്ചിരിക്കുന്നത് ചില്ലറയല്ല. നേതാക്കള് കൂട്ടത്തോടെ തിരിച്ചൊഴുകാന് തുടങ്ങിയിരിക്കുന്നതും ആശങ്കയായിട്ടുണ്ട്. കഴിഞ്ഞയാഴ്ച മമതാബാനര്ജിയുടെ അനന്തിരവനും തൃണമൂലിന്റെ ഉയര്ന്ന ചുമതലയുള്ളയാളുമായ അഭിഷേക് ബാനര്ജി മുകുള്റോയിയുടെ ഭാര്യയെ ആശുപത്രിയില് സന്ദര്ശിച്ചത് മുതല് മുകുള്റോയിയും ബിജെപിയും തമ്മിലുള്ള ബന്ധം അത്ര ശരിയായ രീതിയിലല്ല എന്ന തരത്തില് അഭ്യൂഹങ്ങള് പ്രചരിച്ചു തുടങ്ങിയിരുന്നു.
ബിജെപിയ്ക്കൊപ്പം തെരഞ്ഞെടുപ്പിന് തൊട്ടുമുമ്പ് ചേര്ന്നവരും തെരഞ്ഞെടുപ്പില് തോറ്റവരുമായ മുന് തൃണമൂല് നേതാക്കള്ക്കും ഇപ്പോള് മടങ്ങണമെന്നുണ്ട്. തൃണമൂലില് നിന്നും ബിജെപിയില് എത്തുകയും തെരഞ്ഞെടുപ്പില് തോല്വി ഏറ്റുവാങ്ങുകയും ചെയ്ത രജീബ് ബാനര്ജി അടുത്തിടെ ഫേസ്ബുക്ക് പോസ്റ്റില് ഇക്കാര്യം വ്യക്തമാക്കുകയും ചെയ്തിരുന്നു. തോറ്റതിന് പിന്നാലെ മമതാബാനര്ജി സര്ക്കാരിനെ അപമാനിക്കുന്ന പരിപാടിയില് നിന്നും മാറണമെന്ന് ബിജെപിയ്ക്ക് ഫേസ്ബുക്കിലൂടെ മുന്നറിയിപ്പ് നല്കി.
മമതാബാനര്ജി സര്ക്കാരിന് മേല് 356 ാം വകുപ്പ് പ്രയോഗിക്കണമെന്ന പരാമര്ശത്തെയാണ് രജീബ് വിമര്ശിച്ചത്. തുടര്ച്ചയായി മമതാബാനര്ജി സര്ക്കാരിന് മേല് നടത്തുന്ന ഭീഷണി ബംഗാള് ജനത സഹിക്കുമെന്ന് കരുതരുത് എന്നായിരുന്നു ബംഗാളിയില് ഇദ്ദേഹം ബിജെപിയ്ക്ക് നല്കിയ മുന്നറിയിപ്പ്.
