ന്യൂഡല്ഹി: നാട്ടുകാരുടെ പണമെടുത്ത് ഡല്ഹി മുഖ്യമന്ത്രി ആഡംബര ബംഗ്ലാവിനുള്ളില് സ്വിമ്മിംഗ് പൂള് പണിതെന്ന ആരോപണവുമായി ബിജെപി. സ്വിമ്മിംഗ് പൂളോട് കുടി വീട് നവീകരിക്കാന് നികുതി ദായകരുടെ പണത്തില് നിന്നും 10 കോടി രൂപ കെജ്രിവാള് അനുവദിച്ചെന്നാണ് ആരോപണം. നികുതിദായകരുടെ പണം കെജ്രിവാള് ധൂര്ത്തടിച്ചെന്ന് വെള്ളിയാഴ്ച നടത്തിയ വാര്ത്താസമ്മേളനത്തില് ബിജെപി ആരോപിച്ചു.
ബിജെപിയുടെ ഡല്ഹി യൂണിറ്റിന്റെ തലവന് ആദേശ് ഗുപ്തയാണ് ആരോപണവുമായി രംഗത്ത് വന്നത്. തെരഞ്ഞെടുക്കപ്പെട്ട ജനപ്രതിനിധികള് ചുവന്ന ബീക്കണ് കാറില് യാത്ര ചെയ്യേണ്ടതില്ല, ആഡംബര ബംഗ്ളാവിന് പകരം ഒറ്റമുറി ഫ്ളാറ്റായാലും തരക്കേടില്ല, അനാവശ്യ സുരക്ഷ ആവശ്യമില്ല തുടങ്ങി കെജ്രിവാള് നേരത്തേ പ്രസ്താവന നടത്തുന്നതിന്റെ പഴയ സംഭവത്തിന്റെ വീഡിയോയും ബിജെപി നേതാക്കള് പ്രദര്ശിപ്പിച്ചു.
പഴയ വാക്കൊക്കെ മറന്ന് ഇതിന്റെ നേരെ എതിര് കാര്യമാണ് കെജ്രിവാള് ഇപ്പോള് ചെയ്തിരിക്കുന്നതെന്നും രാഷ്ട്രീയത്തിലേക്ക് പ്രവേശിക്കുമ്പോള് ആള്ക്കാര് പഴയ വാഗ്ദാനം മറക്കുമെന്നതിന്റെ തെളിവാണ് ഇതെന്നും ജനങ്ങളെ കെജ്രിവാള് മണ്ടന് കളിപ്പിക്കുകയാണെന്നും ബിജെപി നേതാക്കള് ആരോപിച്ചു. പണം ധൂര്ത്തടിക്കാന് വേണ്ടിയാണ് തന്റെ ഇരട്ടഫ്ളാറ്റ് വിട്ട് കെജ്രിവാള് ബംഗ്ളാവിലേക്ക് മാറിയതെന്നും സുരക്ഷയുടെ പേരു പറഞ്ഞ് ബംഗ്ളാവ് വാങ്ങിയത് എന്തിനായിരുന്നെന്ന് ഇപ്പോഴാണ് മനസ്സിലായതെന്നും ഗുപ്ത പറഞ്ഞു.
തന്റെ പഴയ ചെറിയകാറും കെജ്രിവാള് മാറ്റി. ഇപ്പോള് അദ്ദേഹത്തിന് വലിയകാറും അകമ്പടി വാഹനങ്ങളും ഉണ്ട്. എല്ലാം സഹിക്കാം. പക്ഷേ ബംഗ്ളാവ് നവീകരിക്കാന് ജനങ്ങള് കഷ്ടപ്പെട്ട് നല്കുന്ന 10 കോടി ചെലവാക്കിയത് അനുവദിക്കാനാകില്ലെന്നും പറഞ്ഞു. അടുത്തിടെയാണ് സര്ക്കാരിന്റെ കയ്യില് ഒരു പണവും ഇല്ലെന്നും വാക്സിനേഷന് ഫണ്ട് ഇല്ലാത്തതിനാല് കേന്ദ്രത്തിന്റെ സഹായം തേടിയെന്നും ഉപമുഖ്യമന്ത്രി മനീഷ് സിസോദിയ പറഞ്ഞത്.
ഓക്സിജന്, വെന്റിലേറ്റര്, ജനങ്ങള്ക്ക് റേഷന് തുടങ്ങി എല്ലാക്കാര്യത്തിനും അവര് കേന്ദ്രത്തെ സമീപിച്ചിരുന്നു. എല്ലാ കാര്യത്തിനും കേന്ദ്രത്തെ വിമര്ശിക്കുന്നവരാണ് ഇപ്പോള് നാട്ടുകാരുടെ പണം ഉപയോഗിച്ച് സ്വന്തം വീട്ടില് സ്വിമ്മിംഗ് പൂള് പണിയുന്നതെന്നും പറഞ്ഞു. ആയിരങ്ങള് ഡല്ഹിയില് മരിക്കുമ്പോഴാണ് കെജ്രിവാള് വീട് മിനുക്കാന് നിര്ദേശം നല്കിയിരിക്കുന്നത്. 2020 ഒക്ടോബര് 17 നായിരുന്നു കെജ്രിവാള് കരാര് നല്കിയതെന്നും ഗുപ്ത പറഞ്ഞു. ഒരു കോടി രൂപ ചെലവഴിച്ചാണ് അദ്ദേഹം ബംഗ്ളാവിന്റെ ഗേറ്റ് വെച്ചതെന്ന ആരോപണവും ബിജെപി നടത്തി.
