ന്യൂഡല്ഹി: കേന്ദ്രസര്ക്കാര് കര്ഷകരെ കേള്ക്കാന് തയ്യാറാകാത്ത സാഹചര്യത്തില് അടുത്ത സമരത്തിന് ട്രാക്ടര് തയ്യാറാക്കി ഒരുങ്ങിയിരിക്കാന് കര്ഷകരോട് ആഹ്വാനം ചെയ്ത് കര്ഷകനേതാവ് രാകേഷ് ടികായത്ത്. കേന്ദ്രസര്ക്കാര് നമ്മളെ കേള്ക്കില്ലെന്നും ട്രാക്ടറുമായി ഒരുങ്ങിയിരിക്കാനും ഞായറാഴ്ച ഇട്ട ട്വീറ്റില് പറയുന്നു. ഭാരതീയ കിസാന് യൂണിയന് വക്താവാണ് രാകേഷ് ടികായത്ത്
‘‘നമ്മളെ സര്ക്കാര് കേള്ക്കാന് പോകുന്നില്ല. അവര്ക്ക് നല്ലൊരു മറുപടി നല്കേണ്ടതുണ്ട്. നമ്മുടെ ഭൂമി സംരക്ഷിക്കാനുള്ള പോരാട്ടത്തിനായി നിങ്ങള് ട്രാക്ടറുമായി തയ്യാറാകുക.’’ ട്വീറ്റില് പറയുന്നു. ഹരിയാന സര്ക്കാര് പ്രതിഷേധക്കാര്ക്കെതിരേ കേസെടുത്തു പീഡിപ്പിക്കുകയാണ് എന്ന് തിങ്കാളാഴ്ച ടികായത്ത് ട്വീറ്റ് ഇട്ടിരുന്നു. ഹരിയാന സര്ക്കാരിന്റെ വ്യാജക്കേസ് കൊണ്ട് കര്ഷകരെ പ്രതിഷേധത്തില് നിന്നും തടയാന് കഴിയില്ല എന്നും പറഞ്ഞു.
ജൂണ് 26 ന് രാജ്ഭവന് പുറത്ത് കര്ഷകര് പ്രതിഷേധിക്കുമെന്ന് ടികായത്ത് പറഞ്ഞതിന് പിന്നാലെയാണ് ശനിയാഴ്ച ട്രാക്ടറുമായി ഒരുങ്ങിയിരിക്കാനും ടികായത്ത് ട്വീറ്റ് ഇട്ടത്. പ്രതിഷേധം ഏഴുമാസം പിന്നിടുന്ന അവസ്ഥയില് കര്ഷകദിനത്തെയും ജനാധിപത്യത്തെയും സംരക്ഷിക്കണം എന്നാവശ്യപ്പെട്ട് രാജ്ഭവന് ചുറ്റും പ്രതിഷേധം സംഘടിപ്പിക്കുമെന്ന് കഴിഞ്ഞയാഴ്ച ടികായത്ത് ട്വീറ്റ് ചെയ്തിരുന്നു. കര്ഷക സമരത്തില് പങ്കുചേരണമെന്ന് ആവശ്യപ്പെട്ട് ശനിയാഴ്ച ഹരിയാനയിലെ സോണീപഥിലെ 20 ഗ്രാമങ്ങളുടെ മഹാപഞ്ചായത്ത് വിളിച്ചു ചേര്ത്തിരുന്നു.
കേന്ദ്രസര്ക്കാര് കൊണ്ടുവരുന്ന പുതിയ നിയമത്തിനെതിരേ കഴിഞ്ഞ നവംബറിലാണ് കര്ഷകര് സമരം ആരംഭിച്ചത്. പ്രതിഷേധം ശക്തമായ സാഹചര്യത്തിലും റിപ്പബ്ലിക് ദിനത്തില് അക്രമം ഉണ്ടായ സാഹചര്യത്തിലും ഡല്ഹി പോലീസ് അതിര്ത്തി അടച്ചിരുന്നു.
