സതാംപ്ടണ്: ലോക ടെസ്റ്റ് ചാമ്പ്യന്ഷിപ്പ് ഫൈനലില് ഇന്ത്യയ്ക്കെതിരെ ന്യൂസിലന്ഡിന് 139 റണ്സ് വിജയലക്ഷ്യം. രണ്ട് വിക്കറ്റിന് 64 റണ്സ് എന്ന നിലയില് റിസര്വ് ദിനത്തില് ബാറ്റിങ്ങ് ആരംഭിച്ച ഇന്ത്യന് ഇന്നിങ്സ് 170 ല് അവസാനിച്ചു. കിവീസിനായി ടിം സൗത്തി നാല് വിക്കറ്റ് വീഴ്ത്തി. ട്രെന്റ് ബോള്ട്ട് മൂന്ന് വിക്കറ്റും കൈല് ജയ്മിസണ് രണ്ട് വിക്കറ്റും വീഴ്ത്തി.
രണ്ടാം ഇന്നിങ്സില് വിജയം ലക്ഷ്യമിട്ട് ഇറങ്ങിയ കിവീസ് ആറ് ഓവര് പിന്നിടുമ്പോള് വിക്കറ്റ് നഷ്ടപ്പെടാതെ 14 റണ്സെന്ന നിലയിലാണ്. നാല് റണ്സുമായി ടോം ലാഥം അഞ്ച് റണ്സുമായി ഡെവോണ് കോണ്വേ എന്നിവരാണ് ക്രീസില്.
രണ്ടാം ഇന്നിങ്സിലും മികച്ച ഒരു കൂട്ടുകെട്ട് പോലും ഇന്ത്യന് നിരയില് പിറന്നില്ല. ക്യപ്റ്റന് വിരാട് കോഹ്ലി(13), ചേതേശ്വര് പൂജാര (15), വൈസ് ക്യാപ്റ്റന് അജിങ്ക്യ രഹാനെ(15), രവീന്ദ്ര ജഡേജ(16), ഋഷഭ് പന്ത് (41), രവിചന്ദ്രന് അശ്വിന്(7) എന്നിവരാണ് ഇന്ന് മടങ്ങിയവരുടെ സമ്പാദ്യം.
