നൂറുവര്ഷത്തിലധികം പഴക്കമുള്ള ഗരീബ് നവാസ് മോസ്ക്ക് പൊളിച്ചുമാറ്റിയതുമായി ബന്ധപ്പെട്ട് തയ്യാറാക്കിയ ഡോക്യൂമെന്ററി സംപ്രഷണം ചെയ്തതിന് മാധ്യമത്തിനെതിരേ യുപി പോലീസ് കേസ് എടുത്തു. അനധികൃതമായി നിര്മ്മാണം നടത്തിയെന്നാരോപിച്ച് പൊളിച്ചുമാറ്റാന് ഉത്തരവിട്ട ബരാബങ്കിയിലെ പള്ളി പൊളിക്കലുമായി ബന്ധപ്പെട്ട ഡോക്യുമെന്ററിയുടെ പേരില് ദി വയര് ആണ് നടപടി നേരിടുന്നത്.
യുക്തിരഹിതവും തെറ്റായതുമായ പ്രസ്താവനകള് നടത്തി ശത്രുത വളര്ത്താനും കലാപം സൃഷ്ടിക്കാനും ശ്രമം നടത്തി എന്ന കുറ്റത്തിനാണ് കേസെടുത്തത്. ഒരു പ്രത്യേക മതത്തിന്റെ ഗ്രന്ഥം അഴുക്കുചാലിലേക്ക് വലിച്ചെറിഞ്ഞു എന്നതടക്കമുള്ള ഡോക്യുമെന്ററിയിലെ വെളിപ്പെടുത്തല് തെറ്റായ വാദങ്ങള് ആണെന്നതടക്കം ഗുരുതരമായ ഒട്ടേറെ പ്രശ്നങ്ങള് വീഡിയോയില് നടത്തിയിട്ടുണ്ടെന്നാണ് ആരോപണം.
ജൂണ് 23 ന് ന്യൂസ് പോര്ട്ടല് അവരുടെ ട്വിറ്റര് ഹാന്ഡിലിലാണ് ഡോക്യുമെന്ററി സംപ്രേഷണം ചെയ്തത്. ന്യൂസ് പോര്ട്ടലിന് പുറമെ വെബ്സൈറ്റില് പ്രവര്ത്തിക്കുന്ന രണ്ട് മാധ്യമപ്രവര്ത്തകരുടെ പേരിലും എഫ്.ഐ.ആര്. എടുത്തിട്ടുണ്ട്. ബാരബങ്കിയിലെ പള്ളി പൊളിച്ചുമാറ്റിയ സംഭവത്തില് ജുഡീഷ്യല് അന്വേഷണം ആവശ്യപ്പെട്ട് മുസ്ലിം വ്യക്തി നിയമ ബോര്ഡ് രംഗത്തുവന്നിരിക്കുന്ന സാഹചര്യത്തിലാണ് കേസുമായി യുപി പോലീസ് എത്തുന്നത്.
സാമുദായിക സംഘര്ഷവും മതസ്പര്ദയും വളര്ത്താനുള്ള ശ്രമം എന്ന ആരോപണത്തില് ‘കലാപത്തിന് കാരണമാകുക’, ‘മതശത്രുത വളര്ത്തുക’, ‘ക്രിമിനല് ഗൂഢാലോചന’ തുടങ്ങിയ വകുപ്പുകള് പ്രകാരമാണ് കേസ് ഫയല് ചെയ്തിരിക്കുന്നത്. അതേസമയം മെയ് 31 വരെ പള്ളി പൊളിക്കരുതെന്ന അലഹബാദ് ഹൈക്കോടതി ഉത്തരവ് നിലനില്ക്കെ മാര്ച്ച് 15 നാണ് പള്ളി അനധികൃത നിര്മ്മാണമാണെന്ന് പറഞ്ഞുകൊണ്ട് പള്ളിക്കമ്മറ്റിക്ക് ജില്ലാഭരണകൂടം നോട്ടീസ് നല്കിയത്. തുടര്ന്ന് ബുള്ഡോസര് ഉപയോഗിച്ച് പള്ളി പൊളിച്ചുമാറ്റുകയും ചെയ്തു.
യാതെരു മുന്നറിയിപ്പും കൂടാതെയാണ് ബാരബങ്കി ഭരണകൂടം പള്ളി പൊളിച്ചുമാറ്റിയതെന്ന് മുസ്ലിം വ്യക്തി നിയമ ബോര്ഡ് ആരോപിച്ചിട്ടുണ്ട്. നിയമ വിരുദ്ധവും അധികാര ദുര്വിനിയോഗവും ഏപ്രില് 24 ന് പുറപ്പെടുവിച്ച ഹൈക്കോടതി ഉത്തരവിന്റെ ലംഘനം എന്നുമാണ് ഇതിനോട് ഉത്തര്പ്രദേശ് സുന്നി സെന്ട്രല് വഖഫ് ബോര്ഡിന്റെ പ്രതികരണം. പള്ളി തകര്ത്തതിനെ എതിര്ത്തും പള്ളി പുനസ്ഥാപിക്കണം എന്നാവശ്യപ്പെട്ടും യുപി സര്ക്കാരിനെതിരേ സുന്നി വഖഫ് ബോര്ഡ് ഹൈക്കോടതിയില് റിട്ട് സമര്പ്പിച്ചിട്ടുണ്ട്.
ഏപ്രില് 24 വരെ പള്ളി പൊളിക്കരുതെന്ന ഹൈകോടതി ഉത്തരവുണ്ടായിട്ടും ജില്ലാ ഭരണകൂടം പളളി പൊളിക്കല് നടപടിയുമായി മുമ്പോട്ട് പോയെന്നാണ് സുന്നി സെന്ട്രല് വഖഫ് ബോര്ഡിന്റെ പ്രതികരണം. എന്നാല് ഉത്തര്പ്രദേശ് ഹൈക്കോടതി നിയമവിരുദ്ധമാണെന്ന് പ്രഖ്യാപിച്ച കാര്യത്തിലാണ് നടപടി സ്വീകരിച്ചതെന്നാണ് ജില്ലാ മജിസ്ട്രേറ്റ് ആദര്ശ് സിംഗ് പറഞ്ഞത്. പള്ളി താന് കണ്ടില്ലെന്നും പ്രതികരിച്ചു.
അതേസമയം പോലീസിന്റെ നടപടി അടിസ്ഥാനരഹിതമാണെന്നാണ് വയര് പറയുന്നത്. യോഗി ആദിത്യനാഥ് സര്ക്കാര് ഒരിക്കലും മാധ്യമസ്വാതന്ത്ര്യത്തെ മാനിക്കുന്നവരല്ലെന്നും സംസ്ഥാനത്ത് എന്തു സംഭവിച്ചാലും അത് റിപ്പോര്ട്ട് ചെയ്യുന്ന മാധ്യമപ്രവര്ത്തകരെ ക്രിമിനലല് വല്ക്കരിക്കുകയാണെന്നും വയര് പറയുന്നു.
ഉത്തര്പ്രദേശില് രാഷ്ട്രീയക്കാരും സാമൂഹ്യ വിരുദ്ധ ശക്തികളും തുറന്ന നിലയില് തന്നെ സാമുദായിക വിദ്വേഷം നടത്തുകയാണ്. സാമൂഹ്യ ഐക്യത്തിന് ഇത്തരം നടപടി കനത്ത ഭീഷണി ഉയര്ത്തിയിട്ടും പോലീസ് കേസെടുക്കുന്നില്ലെന്ന് വയര് പറയുന്നു. ദിവസങ്ങള്ക്ക് മുമ്പായിരുന്നു ഗസിയാബാദില് ഒരു മുസ്ളീം വൃദ്ധനെ ആക്രമിക്കുന്നതിന്റെ വീഡിയോ പ്രചരിച്ചതിന്റെ പേരില് വീഡിയോ പങ്കുവെച്ച മാധ്യമപ്രവര്ത്തകനെതിരേ യുപി പോലീസ് കേസെടുത്തത്. ഇതിന് പിന്നാലെയാണ് ബാരാബാങ്കിയുടെ പേരില് വയറിനെതിരേയും കേസ് വന്നിരിക്കുന്നത്.
