ലക്നൗ: അടുത്തവര്ഷം നടക്കാനിരിക്കുന്ന ഉത്തര്പ്രദേശ് നിയമസഭാ തെരഞ്ഞെടുപ്പില് വിജയം ലക്ഷ്യമിട്ട് 'പന്ന ക്കമ്മറ്റി' യുമായി ബിജെപി. തെരഞ്ഞെടുപ്പിനായി ഒരു വര്ഷം മുമ്പേ നടത്തുന്ന തയ്യാറെടുപ്പില് തെരഞ്ഞെടുപ്പ് കമ്മറ്റിയുടെ ഏറ്റവും പ്രാധാന്യമേറിയതും ചെറുതുമായ രൂപമാണ് പന്ന കമ്മറ്റി (പേജ് കമ്മറ്റി). വോട്ടേഴ്സ് ലിസ്റ്റിന്റെ ഓരോ പേജിന്റെയും ചുമതല വഹിക്കുന്ന അഞ്ചംഗ കമ്മറ്റിയാണ് പന്ന.
ഇവര്ക്ക് ഒരു പ്രമുഖും ഉണ്ടാകും. ബിജെപിയുടെ മൈക്രോ ലവല് ബൂത്ത് മാനേജ്മെന്റ് തന്ത്രത്തിന്റെ ഭാഗമായുള്ള പന്ന കമ്മറ്റിയുടെ പ്രമുഖിനായിരിക്കും വോട്ടേഴ്സ് ലിസ്റ്റിന്റെ ചുമതല. തന്നിട്ടുള്ള പേജിലെ വോട്ടര്മാരുമായി ആശയവിനിമയം നടത്തുക, പാര്ട്ടിക്ക് അനുകൂലമായി അവരുടെ വൈകാരികതയെ മാറ്റുക തുടങ്ങിയവയാണ് ഇവരുടെ ജോലി. വാട്ടേഴ്സ് ലിസ്റ്റുമായി ബന്ധപ്പെട്ട് ചുമതല തന്നിട്ടുള്ള പേജിലെ 30 ശതമാനം ആള്ക്കാരെയെങ്കിലും തിരിച്ചറിയുന്നയാളായിരിക്കും പന്നക്കമ്മറ്റിയുടെ പ്രമുഖ്.
എതിര്പാര്ട്ടിയിലുള്ള ആളാണെങ്കിലും നിരന്തരം അവരുമായി സമ്പര്ക്കം പുലര്ത്തി പാര്ട്ടിയ്ക്ക് അനുകൂലമായി തിരിച്ചുകൊണ്ടുവരികയാണ് വേണ്ടത്. 60 വോട്ടര്മാരെങ്കിലും അടങ്ങുന്ന 8 - 12 കുടുംബങ്ങളെ പന്ന പ്രമുഖ് സ്വാധീനിക്കണം. വോട്ടര്മാരെ ഇയാള് നേരിട്ടു കാണുകയും അവരുടെ പ്രശ്നങ്ങളും എന്തെങ്കിലും നിര്ദേശങ്ങളുണ്ടെങ്കില് അത് കേള്ക്കുകയും വേണം. ഒടുവില് ഇവരുടെ വോട്ടുകള് ബിജെപിയ്ക്ക് അനുകൂലമായി തിരിച്ചു കൊണ്ടുവരികയും വേണം.
കോവിഡ് 19 പ്രതിരോധവുമായി ബന്ധപ്പെട്ട് ബിജെപിയ്ക്ക് എതിരേ നില നില്ക്കുന്ന ശക്തമായ ജനവികാരം കുറച്ചുകൊണ്ടുവരാനുള്ള തന്ത്രങ്ങളുടെ ഭാഗമായിട്ടാണ് ബിജെപി ഈ രീതിയിലുള്ള നീക്കം നടത്തുന്നത്. പന്ന കമ്മറ്റിയിലൂടെ കൂടുതല് ആളുകളിലേക്ക് ഇറങ്ങിച്ചെല്ലാമെന്നാണ് ബിജെപി കരുതുന്നത്. ജില്ലാ പ്രസിഡന്റുമാരുടെ കൂടി ശുപാര്ശകള് വെച്ചാകും അഞ്ചംഗ പന്നക്കമ്മറ്റിയെ തെരഞ്ഞെടുക്കുക.
ജനങ്ങളിലേക്ക് പാര്ട്ടിയുടെ ആശയം കൂടുതല് എത്തിക്കാന് കഴിയുമെന്നാണ് ബിജെപി കരുതുന്നത്. യുപിയില് സംസ്ഥാന - കേന്ദ്ര സര്ക്കാരുകള് ചെയ്തിരിക്കുന്ന നല്ലകാര്യങ്ങളും ജനങ്ങളില് എത്തിക്കാന് ഇതിലൂടെ കഴിയുമെന്നും തെരഞ്ഞെടുപ്പ് ദിവസം വരെ നിരന്തരം സമ്പര്ക്കം പുലര്ത്തുന്നതിലൂടെ വോട്ടേഴ്സ് ലിസ്റ്റിലെ 70 ശതമാനം പേരെങ്കിലും അനുകൂലമായി തിരിക്കാനാകുമെന്നുമാണ് കരുതുന്നത്.
പേജ് ഇന് ചാര്ജ്ജ് എന്ന അര്ത്ഥം വരുന്ന 'പന്ന പ്രമുഖ്' മായി ബന്ധപ്പെട്ട പ്രഖ്യാപനം ലക്നൗവില് നടന്ന പാര്ട്ടിയോഗത്തില് പ്രതിരോധമന്ത്രി രാജ്നാഥ് സിംഗാണ് നടത്തിയത്. ഏത് തെരഞ്ഞെടുപ്പിലായാലും ഏത് സ്ഥാനാര്ത്ഥിയായാലും പന്ന പ്രമുഖ് ഏറെ പ്രാധാന്യം അര്ഹിക്കുന്നതായും അവരുമായി ബന്ധപ്പെട്ടിരിക്കുന്നതായും പറഞ്ഞു. ദേശീയ നേതാവ് ബി എല് സന്തോഷും രാധാമോഹന് സിംഗും ഉള്പ്പെടെയുള്ള നേതാക്കളുടെ യോഗത്തിലായിരുന്നു തീരുമാനം എടുത്തത്.
