ലക്നൗ: കോവിഡ് പ്രതിരോധവുമായി ബന്ധപ്പെട്ട പിഴവുകള് ചൂണ്ടിക്കാട്ടി വന് വിമര്ശനം ഉയരുന്ന സാഹചര്യത്തിലും ഉത്തര്പ്രദേശില് വെന്നിക്കൊടി പാറിച്ച് ബിജെപി. സിലാ പഞ്ചായത്ത് ചെയര്മാന് തെരഞ്ഞെടുപ്പില് 53 സീറ്റുകളില് ബിജെപി പിന്തുണച്ച സ്ഥാനാര്ത്ഥികള്ക്ക് വന് മുന്നേറ്റം. 45 ജില്ലകള്ക്ക് മുകളില് ബിജെപി സ്ഥാനാര്ത്ഥികള് വിജയത്തിലേക്ക് നീങ്ങുന്നതായിട്ടാണ് വിവരം.
തെരഞ്ഞെടുപ്പ് ഫലം അന്തിമമായി പുറത്തുവിട്ടിട്ടില്ലെങ്കിലും 21 ജില്ലകളില് സിലാ പഞ്ചായത്ത് ചെയര്മാന് സ്ഥാനം ബിജെപി പിടിച്ചെടുത്തിട്ടുണ്ട്. ജൂണ് 29 ന് എതിരില്ലാതെ തെരഞ്ഞെടുക്കപ്പെട്ട വാരണാസിയും ഗൊരഖ്പൂറും ഇതില് ഉള്പ്പെടും. അയോദ്ധ്യയിലും മഥുരയിലും ബിജെപി പിന്തുണ നല്കിയവരാണ് ജയം നേടിയത്. ഹിന്ദുക്കള്ക്ക് ഭൂരിപക്ഷമുള്ള അയോദ്ധ്യയില് ബിജെപി പിന്തുണച്ച റോലി സിംഗ് സമാജ് വാദി പാര്ട്ടി പിന്തുണച്ച സെന് യാദവിനെ തോല്പ്പിച്ചു. മഥുരയില് ബിജെപി പിന്തുണയോടെ മത്സരിച്ച കിസാന് സിംഗ് ആര് എല് ഡി പിന്തുണച്ച രാജേന്ദ്ര സിംഗ് സികാര്വറിനെയാണ് വീഴ്ത്തിയത്.
അടുത്ത വര്ഷം സംസ്ഥാന തെരഞ്ഞെടുപ്പ് നടക്കാനിരിക്കെ സിലാ പഞ്ചായത്ത് ചെയര്പേഴ്സണ് തെരഞ്ഞെടുപ്പ് ബിജെപിയ്ക്ക് അഭിമാന പ്രശ്നമായിരുന്നു. അതേസമയം സമാജ്വാദി പാര്ട്ടിയും ബിജെപിയും തമ്മിലായിരുന്നു പ്രധാന പോര്. സിലാ പഞ്ചായത്ത് ചെയര്പേഴ്സണ് പദവിക്കായി ബിഎസ്പി ഇറങ്ങുന്നില്ലെന്ന് നേരത്തേ മായാവതി പ്രഖ്യാപിച്ചിരുന്നു.
