ബി.ജെ.പിയും ശിവസേനയും തമ്മിലുള്ള ബന്ധം വിവാഹ മോചിതരായ നടന് ആമിര് ഖാനും സംവിധായിക കിരണ്റാവുവും തമ്മിലുള്ള ബന്ധം പോലെയാണെന്നും വേര്പിരിഞ്ഞെങ്കിലും സൗഹാര്ദ്ദം തുടരുമെന്നും ശിവസേന വക്താവ് സഞ്ജയ് റാവത്ത്. ശിവസേന ഒരിക്കലും ബി.ജെ.പിയുടെ ശത്രുവല്ലെന്ന് മഹാരാഷ്ട്ര മുന് മുഖ്യമന്ത്രിയും ബി.ജെ.പി നേതാവുമായ ദേവേന്ദ്ര ഫഡ്നാവിസ് പറഞ്ഞതിന് പിന്നാലെയാണ് പ്രതികരണം.
ശിവസേനയും ബിജെപിയും വീണ്ടും സഖ്യമുണ്ടാക്കാനുള്ള സാധ്യതകള് ശക്തമായി ഉയരുന്നതിനിടയിലാണ് ദേവേന്ദ്ര ഫഡ്നാവീസിന്റെയും സഞ്ജയ് റാവുത്തിന്റെയും പ്രതികരണം. ആഴ്ചകള്ക്ക് മുമ്പാണ് ശിവസേനാ നേതാവ് ഉദ്ധവ് താക്കറേ പ്രധാനമന്ത്രി നരേന്ദ്രമോഡിയുമായി കൂടിക്കാഴ്ച നടത്തിയത്. ബിജെപിയും ശിവസേനയും കൈകോര്ത്തേക്കുമെന്ന റിപ്പോര്ട്ട് അപ്പോള് മുതല് തുടങ്ങിയിരുന്നു. തൊട്ടുപിന്നാലെ രാജ്യത്തെ ഏറ്റവും ഉന്നത നേതാവാണ് മോഡിയെന്ന് സഞ്ജയ് റാവുത്ത് പ്രശംസിക്കുകയും ചെയ്തിരുന്നു.
ഇതിന് പിന്നാലെയാണ് ശിവസേനയ്ക്ക് ബിജെപിയുമായി പ്രശ്നങ്ങളില്ലെന്ന് റാവുത്ത് പ്രതികരിച്ചിരിക്കുന്നതും. രാഷ്ട്രീയ വഴികള് വ്യത്യസ്തമായിരിക്കാം എന്നാലും സൗഹൃദം തുടരുമെന്നാണ് റാവത്ത് പറഞ്ഞിരിക്കുന്നത്.‘‘ഞങ്ങള് ഇന്ത്യയും പാക്കിസ്ഥാനുമല്ല. ആമിര് ഖാനെയും കിരണ് റാവുവിനെയും നോക്കൂ, ഞങ്ങള് അവരെപ്പോലെയാണ്.’’ റാവുത്ത് പറഞ്ഞു. മഹാരാഷ്ട്രയില് വീണ്ടും സഖ്യമുണ്ടാക്കുമോ എന്ന ചോദ്യത്തിന് സാഹചര്യങ്ങള് വിലയിരുത്തി ഉചിതമായ തീരുമാനം കൈക്കൊള്ളുമെന്ന മറുപടിയാണ് നേരത്തേ മഹാരാഷ്ട്ര ബിജെപി തലവന് ഫഡ്നാവിസും നല്കിയത്.
15 വര്ഷം ഒരുമിച്ച് ജീവിച്ച ശേഷം കഴിഞ്ഞ ആഴ്ചയാണ് ആമിര് ഖാനും കിരണ്റാവുവും വിവാഹമോചനം പ്രഖ്യാപിച്ചത്. തങ്ങളുടെ ബന്ധം മാത്രമാണ് മാറുന്നതെന്നും ഒരു കുടുംബമായി തന്നെ തുടരുമെന്നും ഇരുവരും സംയുക്ത പ്രസ്താവനയില് പറഞ്ഞിരുന്നു. ഇതിനെ ഉപമപ്പെടുത്തി ആയിരുന്നു സഞ്ജയ് റാവത്ത് ശിവസേന ബി.ജെ.പി ബന്ധത്തെക്കുറിച്ചും പറഞ്ഞിരിക്കുന്നത്.
