കൊല്ക്കത്ത: നരേന്ദ്രമോഡി അധികാരത്തിലെത്തിയ ശേഷം കോണ്ഗ്രസിന് നഷ്ടമായത് അനേകം നേതാക്കളെയാണ്. ബിജെപി ഉള്പ്പെടെയുള്ള മറുപാര്ട്ടികളിലേക്ക് ചേക്കേറിയ അനേകം നേതാക്കളുടെ പട്ടിയിലേക്ക് കോണ്ഗ്രസിന്റെ മുതിര്ന്ന നേതാവും മുന് രാഷ്ട്രപതിയുമായ പ്രണബ് മുഖര്ജിയുടെ മകന് അഭിജിത്തിന്റെ പേരും. കോണ്ഗ്രസ് വിട്ട അഭിജിത് തൃണമൂല് കോണ്ഗ്രസിന്റെ ഭാഗമായേക്കുമെന്നാണ് റിപ്പോര്ട്ട്.
കഴിഞ്ഞ കുറച്ച് നാളുകളായി അഭിജിത്ത് മുഖര്ജി തൃണമൂല് കോണ്ഗ്രസുമായി ചര്ച്ചകള് നടത്തുന്നുണ്ടായിരുന്നു. കഴിഞ്ഞ മാസം കൊല്ക്കത്തയില് വെച്ച് തൃണമൂല് നേതാവ് അഭിഷേക് ബാനര്ജിയെ സന്ദര്ശിക്കുകയും ചെയ്തിരുന്നു. അഭിജിത്തുമായി ഏറെ അടുപ്പം ഉണ്ടായിരുന്ന ജിതിന് പ്രസാദ കോണ്ഗ്രസ് വിട്ട് ബി.ജെ.പിയില് ചേര്ന്നതിന് പിന്നാലെ അഭിജിത്തും ബിജെപിയുടെ ഭാഗമായേക്കുമെന്ന് അഭ്യൂഹങ്ങള് ഉയര്ന്നിരുന്നെങ്കിലും ഇക്കാര്യത്തില് ഉയര്ന്നുവന്ന ചോദ്യങ്ങളെല്ലാം അന്ന് അഭിജിത് തള്ളുകയും ചെയ്തിരുന്നു.
എന്നാല് കഴിഞ്ഞ ദിവസം ഉണ്ടായ ചര്ച്ചയുടെ ഫലമായി അഭിജിത് തൃണമൂല് കോണ്ഗ്രസില് ചേരുമെന്നാണ് കരുതുന്നത്. തിങ്കളാഴ്ച വൈകുന്നേരം നാല് മണിക്ക് അഭിജിത്ത് തൃണമൂല് കോണ്ഗ്രസില് ചേരുന്നതായി പ്രഖ്യാപനമുണ്ടാകുമെന്നാണ് പുറത്ത് വരുന്ന റിപ്പോര്ട്ടുകള്. താന് കോണ്ഗ്രസ് വിട്ട് തൃണമൂല് കോണ്ഗ്രസിലോ മറ്റേതെങ്കിലും പാര്ട്ടിയിലോ ചേരാന് പോകുന്നു എന്ന തരത്തില് പ്രചരിക്കുന്ന വാര്ത്തകള് തെറ്റാണെന്നായിരുന്നു ജൂണില് അദ്ദേഹം പി.ടി.ഐ.യോട് പ്രതികരിച്ചത്.
ജിതിന് പ്രസാദ പാര്ട്ടി വിട്ടതോടെ അഭിജിത്ത് മുഖര്ജിയും സച്ചിന് പൈലറ്റും കോണ്ഗ്രസ് വിടുമെന്ന് അഭ്യൂഹങ്ങളുണ്ടായിരുന്നു. എന്നാല് താന് കോണ്ഗ്രസ് പാര്ട്ടി വിട്ട് ബി.ജെ.പിയില് ചേരുമെന്ന വാര്ത്തകള് അടിസ്ഥാന രഹിതമാണെന്നാണ് സച്ചിന് പൈലറ്റ് പറഞ്ഞത്. ജംഗിപൂര് മണ്ഡലത്തില് നിന്നും രണ്ട് തവണ ലോക്സഭാംഗമായി തെരഞ്ഞെടുക്കപ്പെട്ടിട്ടുള്ളയാളാണ് അഭിജിത്ത് മുഖര്ജി.
