ന്യുഡല്ഹി: കോണ്ഗ്രസ് നേതാവ് നവ്ജ്യോത് സിംഗ് സിദ്ദു പഞ്ചാബ് പി.സി.സി അധ്യക്ഷ സ്ഥാനത്തെത്തുന്നത് തടയാന് അവസാന നിമിഷത്തിലും തന്ത്രവുമായി മുഖ്യമന്ത്രി ക്യാപ്റ്റന് അമരീന്ദര് സിംഗ്. സിദ്ദു നേതൃത്വത്തിലേക്ക് വന്നാല് പാര്ട്ടിയില് പിളര്പ്പുണ്ടാകുമെന്ന സൂചനയാണ് അമരീന്ദര് സിംഗ് നല്കുന്നത്. ഇക്കാര്യം ചൂണ്ടിക്കാട്ടി സിംഗ് കോണ്ഗ്രസ് അധ്യക്ഷ സോണിയ ഗാന്ധിക്ക് കത്തയച്ചു. ഇന്നലെ സിദ്ദു കോണ്ഗ്രസ് അധ്യക്ഷയേയും പഞ്ചാബിന്റെ ചുമതലയുള്ള എഐസിസി ജനറല് സെക്രട്ടറി ഹരീഷ് റാവത്തിനെയും കണ്ട സാഹചര്യത്തിലാണ് അമരീന്ദര് സിംഗിന്റെ നീക്കം.
സിദ്ദു പി.സി.സി അധ്യക്ഷനാകുന്നത് തന്റെ ഭാവിക്ക് ഭീഷണിയാകുമെന്ന ആശങ്കയാണ് അമരീന്ദര് സിംഗിന്. 2022ല് നടക്കാനിരിക്കുന്ന നിയമസഭ തിരഞ്ഞെടുപ്പിനെ സിദ്ദുവിന്റെ നേതൃത്വം ദോഷമായി ബാധിക്കുമെന്ന് അമരീന്ദര് പറയുന്നു. സിദ്ദുവിനെ പി.സി.സി അധ്യക്ഷനാക്കിയാല് രാജിവയ്ക്കാന് പോലും മടിക്കില്ലെന്ന ഭീഷണിയും ഉയര്ത്തി അമരീന്ദര് ചില നേതാക്കള്ക്ക് കത്ത് നല്കിയതായും സൂചനയുണ്ട്.
താനും സിദ്ദുവും ജാട്ട് സിഖ് സമുദായത്തില് നിന്നുള്ളവരാണ്. സിദ്ദുവിന്റെ നിയമനം തെറ്റായ സന്ദേശം നല്കും. മാത്രമല്ല, സിദ്ദുവിന്റെ പ്രവര്ത്തന ശൈലിയോട് യോജിക്കാന് കഴിയില്ലെന്നും അദ്ദേഹം പറയുന്നു. മുഖ്യമന്ത്രിയുടെ കത്തുമായി അദ്ദേഹത്തിന്റെ ഒഎസ്ഡി നരീന്ദര് ഭാംബ്രി 10 ജന്പഥ് റോഡിലെ സോണിയ ഗാന്ധിയുടെ വസതിയില് എത്തിയെന്നാണ് സൂചന.
