കൊല്ക്കത്ത: പ്രശാന്ത് കിഷോറുമായി താന് നടത്തിയ കൂടിക്കാഴ്ചകള് പെഗാസസ് ചാര സോഫ്റ്റ്വെയര് ഉപയോഗിച്ച് കേന്ദ്ര സര്ക്കാര് നിരീക്ഷിച്ചെന്ന ആരോപണവുമായി പശ്ചിമ ബംഗാള് മുഖ്യമന്ത്രി മമതാ ബാനര്ജി. പ്രശാന്ത് കിഷോറും മറ്റുചിലരുമായി അടുത്തിടെ കൂടിക്കാഴ്ച നടത്തിയിരുന്നു. കേന്ദ്ര സര്ക്കാര് അത് നിരീക്ഷിച്ചു. ഞങ്ങള് നടത്തിയ ഒരു യോഗം സര്ക്കാര് പെഗാസസ് സ്പൈവെയര് ഉപയോഗിച്ച് നിരീക്ഷിച്ചതായി കണ്ടെത്തിയെന്ന് വാര്ത്താ സമ്മേളനത്തില് മമത പറഞ്ഞു.
രണ്ട് കേന്ദ്ര മന്ത്രിമാരും 40 മാധ്യമ പ്രവര്ത്തകരും പ്രതിപക്ഷത്തെ മൂന്നു നേതാക്കളും ഉള്പ്പടെ മുന്നൂറോളം പേരുടെ ഫോണുകള് പെഗാസസ് സ്പൈവെയര് ഉപയോഗിച്ച് കേന്ദ്ര സര്ക്കാര് നിരീക്ഷിച്ചെന്ന വാര്ത്ത ഞായറാഴ്ചയാണ് പുറത്തുവന്നത്. പാര്ലമെന്റിന്റെ വര്ഷകാല സമ്മേളത്തിന്റെ ആദ്യദിവസം പ്രതിപക്ഷം വിഷയം സഭയില് അവതരിപ്പിച്ചു.
