കൊല്ക്കൊത്ത: പശ്ചിമ ബംഗാളില് തൃണമൂല് കോണ്ഗ്രസ് നേതാക്കള്ക്കിടയിലെ ഉള്പ്പോര് പുറത്ത്. മുര്ഷാബാദ് ജില്ലയിലെ രണ്ട് എം.എല്.എമാര് തമ്മിലുള്ള പ്രശ്നമാണ് പുറത്തുവന്നത്. തന്റെ വഴിയില് തടസ്സം നിന്നാല് അടിച്ച്എല്ലൊടിക്കുമെന്നാണ് ഭരത്പുര് എം.എല്.എ ഹുമയൂണ് കബര് രെജിനഗര് എം.എല്.എ റബിയൂള് ആലം ചൗധരിക്ക് നല്കിയ മുന്നറിയിപ്പ്.
ഒരു പാര്ട്ടി പരിപാടിക്കിടെ മുഴക്കിയ ഭീഷണിയുടെ വീഡിയോ ദൃശ്യം ടെലിവിഷന് ചാനലാണ് പുറത്തുവിട്ടത്. മുര്ഷാബാദിലെ മുതിര്ന്ന നേതാവാണ് ഹുമയൂണ് കബീര്. മുന്പ് കോണ്ഗ്രസില് ആയിരുന്ന ഇദ്ദേഹം പിന്നീട് തൃണമൂലില് എത്തിയതാണ്. ''റബിയുള് ആലം വലിയ അഹങ്കാരയും നിഷേധിയുമായി മാറിക്കൊണ്ടിരിക്കുകയാണ്. തന്റെ വഴി മുടക്കാന് ധൈര്യം കാണിച്ചാല് നിന്നെ ഞാന് പാഠം പഠിപ്പിക്കും. നിന്റെ എല്ലൊടിക്കും. നമ്മള് രണ്ടുപേരും ഒരേ പാര്ട്ടിയില് പ്രവര്ത്തിക്കുന്നവരാണ്. തന്നോട് ഏറ്റുമുട്ടാന് ശ്രമിക്കരുത്''. ഹുമയൂണ് ഭീഷണിപ്പെടുത്തി. തന്റെ അനുയായികളുടെ സാന്നിധ്യത്തിലായിരുന്നു ഭീഷണി.
സംഭവത്തില് ഹുയമൂണ് കബീറിന് കാരണം കാണിക്കല് നോട്ടീസ് നല്കിയെന്ന് ടിഎംസി സെക്രട്ടറി ജനറല് പാര്ത്ഥ ചാറ്റര്ജി പറഞ്ഞു. ഇത്തരം പരാമര്ശങ്ങള് അംഗീകരിക്കാനാവില്ല. ഇത്തരം പെരുമാറ്റത്തില് പാര്ട്ടി ശക്തമായ നടപടിയെടുക്കുമെന്നും പാര്ത്ഥ ചാറ്റര്ജി വ്യക്തമാക്കി. തനിക്കെതിരായ ഭീഷണി മുതിര്ന്ന നേതാക്കളെ അറിയിച്ചുവെന്നും അവര് തീരുമാനിക്കട്ടെയെന്നുമായിരുന്നു റബിയൂള് ആലം ചൗധരിയുടെ പ്രതികരണം. താന് മമത ബാനര്ജിയുടെ വിശ്വസ്ത ഭടനാണ്. പാര്ട്ടി തീരുമാനിക്കുന്ന പോലെയെ തനിക്ക് പോകാന് കഴിയുമെന്നും അദ്ദേഹം പറഞ്ഞു.
ഇരു നേതാക്കളും തമ്മില് ദീര്ഘകാലമായി തുടരുന്ന വഴക്കാണ് പുതിയ ഭീഷണിക്കു കാരണം. ഇരുവര്ക്കുമിടയിലുള്ള പ്രശ്നം പരിഹരിക്കാന് പല നേതാക്കളും ഇടപെട്ടുവെങ്കിലും പരാജയപ്പെടുകയായിരുന്നു.
