ബംഗലുരു: മൈസൂരില് യുവതി കൂട്ടബലാത്സംഗത്തിന് ഇരയായ സംഭവത്തില് ഇരയെ പരിഹസിച്ച് കര്ണാടകാ ആഭ്യന്തരമന്ത്രി. പെണ്കുട്ടിയും സുഹൃത്തും വിജനമായ സ്ഥലത്ത് പോയത് എന്തിനാണെന്ന് ചോദിച്ച കര്ണാടകാ മന്ത്രി ഈ വിഷയത്തില് കോണ്ഗ്രസ് രാഷ്ട്രീയ മുതലെടുപ്പിന് ശ്രമിക്കുകയാണെന്നും കോണ്ഗ്രസ് തന്നെ ബലാത്സംഗം ചെയ്യുകയാണെന്നും പറഞ്ഞു.
കര്ണാടകാ ആഭ്യന്തരമന്ത്രി അരാഗാ ജ്ഞാനേന്ദ്രയാണ് വിവാദത്തിലായത്. രാത്രി 7 മണിവരെ പെണ്കുട്ടി എന്തു ചെയ്യുകയായിരുന്നു എന്നും ഇദ്ദേഹം ചോദിച്ചു. മനുഷ്യത്വരഹിതമായ സംഭവമാണ് നടന്നത്. പെണ്കുട്ടിയും സുഹൃത്തും ആളൊഴിഞ്ഞ പ്രദേശത്തേക്ക് പോകാന് പാടില്ലായിരുന്നു. എന്നുമായിരുന്നു മാധ്യമങ്ങളുടെ ചോദ്യത്തിന് നല്കിയ മറുപടി. സംഭവം നടന്ന് ഒരു ദിവസം കഴിഞ്ഞിട്ടും പ്രതികളായ ഒരാളെ പോലും അറസ്റ്റ് ചെയ്യാന് കഴിഞ്ഞിട്ടില്ല. പ്രതികള് ഒളിവില് പോയിരിക്കുകയുമാണ്.
അതേസമയം ജ്ഞാനേന്ദ്രയുടെ പ്രസ്താവനയ്ക്ക് എതിരേ കോണ്ഗ്രസ് രംഗത്ത് വന്നു. ചൊവ്വാഴ്ച 7.30 യോടെയാണ് യുവതി കൂട്ട ബലാത്സംഗത്തിന് ഇരയായത്. സുഹൃത്തിനൊപ്പം പ്രമുഖ ടൂറിസ്റ്റ് കേന്ദ്രമായ ചാമുണ്ഡി ഹില്സില് എത്തിയപ്പോഴായിരുന്നു ആക്രമണം. സംഭവത്തില് യുവതിയ്ക്ക് ഗുരുതരമായി പരിക്കേറ്റിട്ടുണ്ട്. കാമുകനെ ആക്രമിച്ച ശേഷം തന്നെ കൂട്ട ബലാത്സംഗത്തിനും ഇരയാക്കി എന്ന് യുവതി പരാതിയില് പറഞ്ഞു. ഇവരെ പിന്തുടര്ന്ന ഒരു യുവാവ് പണം ചോദിച്ചിട്ട് നല്കാന് കൂട്ടാക്കാതിരുന്നതിന്റെ പേരിലായിരുന്നു ആക്രമണമെന്നാണ് യുവതി പോലീസിനോട് പറഞ്ഞത്.
