ബംഗാള്: തിരഞ്ഞെടുപ്പിന് മുന്പ് ബിജെപിയിലേക്ക് പോയ തൃണമൂല് നേതാക്കളും അണികളും പോയതിലും വേഗത്തില് തിരിച്ചെത്തുന്നു. 24 മണിക്കൂറിനിടെ രണ്ട് ബിജെപി എംഎല്എമാരാണ് ബിജെപി ബന്ധം ഉപേക്ഷിച്ച് തൃണമൂലിനൊപ്പം അണിചേര്ന്നത്. ഇപ്പോള് ബിജെപി എംഎല്എമാരും തൃണമൂലിലേക്ക് തിരിച്ചെത്തുന്നു. ്. ഇന്നലെ ബിഷ്ണുപുര് എംഎല്എ തന്മയ് ഘോഷ് മടങ്ങിയെത്തിയിരുന്നു.
ഇന്ന് എംഎല്എയായ ബിശ്വജിത് ദാസും ഒരു ബിജെപി കൗണ്സിലറും തൃണമൂലിലേക്ക് മടങ്ങിയെത്തി. എന്റെ തെറ്റ് ഞാന് മനസിലാക്കി വീട്ടിലേക്ക് മടങ്ങിയെത്തുന്നു എന്നാണ് എംഎല്എ പറയുന്നത്. ഇതോടെ മുകുള് റോയ് അടക്കം മൂന്ന് ബിജെപി എംഎല്എമാര് തൃണമൂലിലേക്ക് എത്തി.
ബിജെപി പ്രതികാര രാഷ്ട്രീയം കളിക്കുകയാണെന്നും കേന്ദ്ര ഏജന്സികളെ ഉപയോഗിച്ച് ബംഗാളികളെ വേട്ടയാടുകയാണെന്നും തന്മയ് ഘോഷ് ആരോപിച്ചു. ത്രിപുരയിലെ ബിജെപി എംഎല്എമാര് ടിഎംസിയില് ചേരുമെന്നും തന്മയ് ഘോഷ് അവകാശപ്പെട്ടു. വരും ദിവസങ്ങളില് കൂടുതല് പേര് തൃണമൂലിലേക്ക് തിരിച്ചെത്തുമെന്നാണ് റിപ്പോര്ട്ടുകള്.
