ഗുവാഹത്തി: കോണ്ഗ്രസ് നേതാക്കളെയും അവരുടെ പോരാട്ടങ്ങളെയും തമസ്ക്കരിച്ച് ബിജെപി ചരിത്രം തിരുത്തിയെഴുതുമ്പോള് അതിനുപയോഗിക്കുന്ന കംപ്യുട്ടറും മൊബൈല്ഫോണുമെല്ലാം കിട്ടിയത് മുന് പ്രധാനമന്ത്രി രാജീവ് ഗാന്ധി കൊണ്ടുവന്ന ഐ.ടി. വിപ്ലവത്തിന്റെ ഫലമാണെന്ന് ഓര്ക്കണം എന്ന് കോണ്ഗ്രസ്. പേരു മാറ്റിയാലും രാജീവ്ഗാന്ധി രാജ്യത്തിന് നല്കിയ സംഭാവനകളെ മാറ്റാനാകില്ലെന്നും കോണ്ഗ്രസ് പറഞ്ഞു.
ബംഗാള് കടുവകളുടെ പ്രധാന ആവാസകേന്ദ്രങ്ങളിലൊന്നെന്ന നിലയില് ലോകപ്രശസ്തമായ അസം ദേശീയോദ്യാനത്തിന്റെ പേരില് നിന്നും രാജീവ്ഗാന്ധിയെ വെട്ടിമാറ്റിയ സംഭവത്തിലായിരുന്നു കോണ്ഗ്രസിന്റെ പ്രതികരണം. അസമിലെ രാജീവ് ഗാന്ധി ഒറംഗ് ദേശീയോദ്യാനത്തിന്റെ പേര് ഒംറഗ് ദേശീയോദ്യാനം എന്നാക്കി മാറ്റിയതായി സംസ്ഥാന സര്ക്കാര് അറിയിച്ചിരുന്നു.
പ്രദേശത്തെ ഗോത്രവിഭാഗങ്ങളുടെ ആവശ്യം പരിഗണിച്ചാണ് പേര് മാറ്റുന്നതെന്നാണ് അസം സര്ക്കാര് പുറത്തുവിട്ട പ്രസ്താവനയില് പറയുന്നത്. ദേശീയോദ്യാനത്തിന്റെ പേര് മാറ്റണമെന്ന ആവശ്യവുമായി നിരവധി സംഘടനകള് സമീപിച്ചെന്നും അവര് ന്യായീകരിച്ചു. അതേസമയം പേര് വെട്ടിമാറ്റിയ അസം സര്ക്കാര് നടപടിക്കെതിരെ വലിയ പ്രതിഷേധമാണ് കോണ്ഗ്രസ് നടത്തിയത്. പേര് മാറ്റിയതിന്റെ പേരില് രാജീവ് ഗാന്ധി രാജ്യത്തിന് നല്കിയ സംഭാവനകള് മാറ്റാന് സാധിക്കില്ലെന്ന് കോണ്ഗ്രസ് നേതാക്കള് പ്രതികരിച്ചു.
യുവാക്കളുടെ വോട്ടിംഗ് പ്രായം 21 ല് നിന്ന് 18 ആക്കിയതും പഞ്ചായത്തുകളില് 33 ശതമാനം വനിതാ സംവരണം കൊണ്ടുവന്നതും രാജീവിന്റെ കാലത്താണെന്നും അസം കോണ്ഗ്രസ് അധ്യക്ഷന് ഭൂപന് കുമാര് ബോറ പറഞ്ഞു. രാജ്യത്തിന്റെ ചരിത്രത്തില് നിന്നും ഓര്മ്മകളില് നിന്നും രാജീവ് ഗാന്ധിയെയും കോണ്ഗ്രസിനെയും വെട്ടിമാറ്റാനുള്ള ബോധപൂര്വമായ ശ്രമങ്ങളാണ് ബി.ജെ.പി നടത്തുന്നതെന്നാണ് ആക്ഷേപം.
നേരത്തെ ഖേല്രത്ന പുരസ്ക്കാരത്തില് നിന്ന് രാജീവ് ഗാന്ധിയുടെ പേര് കേന്ദ്രസര്ക്കാര് മാറ്റിയിരുന്നു. ഹോക്കി ഇതിഹാസം മേജര് ധ്യാന്ചന്ദിന്റെ പേരിലേക്കാണ് ഖേല്രത്ന പുരസ്കാരം കേന്ദ്ര സര്ക്കാര് മാറ്റിയത്. ജനവികാരം മാനിച്ചാണ് ഈ പേരുമാറ്റലെന്നായിരുന്നു അന്ന് പ്രധാനമന്ത്രി നരേന്ദ്ര മോദി പറഞ്ഞിരുന്നത്. ഇന്ത്യക്ക് വേണ്ടി അഭിമാനകരമായ നേട്ടങ്ങള് കൊയ്ത ആദ്യ കായികതാരമാണ് മേജര് ധ്യാന് ചന്ദെന്നും പറഞ്ഞു. ഇതിന് മൊട്ടേരയിലെ സ്റ്റേഡിയത്തിന് മോഡിയുടെ പേരിട്ടത് എന്തിനാണെന്ന വിമര്ശനം കോണ്ഗ്രസ് ഉന്നയിക്കുകയും ചെയ്തിരുന്നു.
1985 ലാണ് അസമിലെ പ്രദേശത്തെ വന്യജീവി സങ്കേതമായി പ്രഖ്യാപിക്കുന്നത്. 1999ലാണ് ദേശീയോദ്യോനമെന്ന പദവിയിലേക്ക് ഉയര്ത്തിയത്.
1992ല് വന്യജീവി സങ്കേതത്തിന് രാജീവ് ഗാന്ധിയുടെ പേര് നല്കിയിരുന്നെങ്കിലും 2001ല് കോണ്ഗ്രസിന്റെ തരുണ് ഗൊഗോയി സര്ക്കാര് അധികാരത്തിലിരുന്ന സമയത്തായിരുന്നു രാജീവ് ഗാന്ധി നാഷണല് പാര്ക്ക് എന്ന് പേരാക്കി മാറ്റിയത്.
