തിരുവനന്തപുരം: ഇരുപത്തിമൂന്നാം പാര്‍ട്ടി കോണ്‍ഗ്രസിന് മുന്നോടിയായുള്ള ലോക്കല്‍ സമ്മേളനങ്ങളിലേക്ക് സംസ്ഥാന സി.പി.എം കടന്നിരിക്കെ പാര്‍ട്ടിക്കു തലവേദനയായി മന്ത്രി പി.എ മുഹമ്മദ് റിയാസും എ.എന്‍ ഷംസീറും തമ്മിലുള്ള പോര്. റിയാസിനെ പിന്തുണച്ച് സംസ്ഥാന സെക്രട്ടറിയേറ്റ് രംഗത്തെത്തിയെങ്കിലും ഷംസീറിന്റെ വിമതസ്വരങ്ങള്‍ സൃഷ്ടിക്കുന്നത് അസ്വസ്ഥതതകള്‍. നിയമസഭാ കക്ഷിയോഗത്തില്‍ പൊതുമരാമത്ത് വകുപ്പിനെതിരെ വ്യാപക ആരോപണം ഉയര്‍ന്നതായി സൂചന.
സി.പി.എമ്മിന്റെ കഴിഞ്ഞ നിയമസഭാകക്ഷിയോഗത്തില്‍ പൊതുമരാമത്ത് മന്ത്രി പി.എ. മുഹമ്മദ് റിയാസിനെതിരെ പാര്‍ട്ടിയുടെ മറ്റൊരു സംസ്ഥാന കമ്മിറ്റിയംഗമായ തലശ്ശേരി എം.എല്‍.എ എ.എന്‍. ഷംസീര്‍ രംഗത്തെത്തിയതാണ് ഇപ്പോള്‍ സി.പി.എമ്മിലുള്ള പ്രധാന ചര്‍ച്ച. എം.എല്‍.എമാര്‍ കരാറുകാരെയും കൂട്ടി കാണാന്‍ വരരുതെന്ന് നിയമസഭയില്‍ മന്ത്രി റിയാസ് പറഞ്ഞത് എം.എല്‍.എമാര്‍ക്കെതിരെ ദുസ്സൂചന തരുന്ന തരത്തിലായെന്നും മണ്ഡലത്തിലെ പ്രശ്‌നങ്ങള്‍ പരിഹരിക്കാന്‍ എം.എല്‍.എമാര്‍ക്ക് പലരെയും കൂട്ടി മന്ത്രിയെ കാണാന്‍ വരേണ്ടിവരുമെന്നും ഷംസീര്‍ നിയമ സഭാകക്ഷിയോഗത്തില്‍ വിമര്‍ശിച്ചു. എന്നാല്‍, ഇത് നിഷേധിച്ച മന്ത്രി റിയാസ് നിയമസഭയില്‍ പറഞ്ഞ കാര്യത്തില്‍ താനുറച്ചു നില്‍ക്കുന്നതായും വ്യക്തമാക്കി. താന്‍ നിയമസഭയില്‍ പറഞ്ഞത് ഇടതുമുന്നണി നിലപാടാണെന്നും അദ്ദേഹം പ്രതികരിച്ചു.
ഇടക്കിടെ വിമത ശബ്ദമാകുന്ന ഷംസീര്‍ ഇതുസംബന്ധിച്ച് കൂടുതല്‍ വിശദീകരണം നടത്തുന്നതിനു മുന്‍പേ സംസ്ഥാന സെക്രട്ടറിയുടെ ചുമതലയുള്ള എ. വിജയരാഘവന്‍ റിയാസിനെ പിന്തുണച്ച് രംഗത്തെത്തി. സി.പി.എം സംസ്ഥാന സെക്രട്ടറിയേറ്റിനു ശേഷം വിജയരാഘവന്‍ റിയാസിനു പിന്തുണ പ്രഖ്യാപിച്ചതോടെ അതിന് പാര്‍ട്ടി പിന്തുണയെന്ന ഔദ്യോഗിക പരിവേഷവും ലഭിച്ചു. പൊതുവേ ഇത്തരം കാര്യങ്ങളില്‍ പൊതുനിര്‍ദ്ദേശങ്ങള്‍ സി.പി.എം നല്‍കാറുണ്ടെന്നും അതിനനുസൃതമായ കാര്യമാണ് മന്ത്രി വ്യക്തമാക്കിയതെന്നും സെക്രട്ടറിയേറ്റ് യോഗത്തിനുശേഷം വിജയരാഘവന്‍ പറഞ്ഞു. ഊര്‍ജ്ജസ്വലമായി സര്‍ക്കാര്‍ പ്രവര്‍ത്തിക്കുമ്പോള്‍ ആ പ്രവര്‍ത്തനത്തിന് മങ്ങലേല്പിക്കാനുള്ള ശ്രമമുണ്ടാവുക സ്വാഭാവികമാണെന്ന്, സി.പി.എം നിയമസഭാകക്ഷിയോഗത്തില്‍ മന്ത്രിക്കെതിരെ വിമര്‍ശനമുണ്ടായെന്ന വാര്‍ത്തയെ സൂചിപ്പിച്ച് വിജയരാഘവന്‍ പറഞ്ഞു.
സര്‍ക്കാര്‍ എങ്ങനെ പ്രവര്‍ത്തിക്കണമെന്നും മന്ത്രിമാരുടെ ഓഫീസ് എങ്ങനെ പ്രവര്‍ത്തിക്കണമെന്നും സംബന്ധിച്ച് സി.പി.എമ്മിന് വ്യക്തമായ സമീപനമുണ്ട്. അതിനനുസരിച്ച് പ്രവര്‍ത്തിക്കാന്‍ സര്‍ക്കാരില്‍ പ്രവര്‍ത്തിക്കുന്നവരോട് നിര്‍ദ്ദേശിച്ചിട്ടുണ്ട്. നിയമസഭാകക്ഷിയോഗത്തില്‍ പാര്‍ട്ടി എം.എല്‍.എയുടെ വിമര്‍ശനത്തെപ്പറ്റി ആവര്‍ത്തിച്ച് ചോദിച്ചപ്പോള്‍, താന്‍ പാര്‍ലമെന്ററി പാര്‍ട്ടിയോഗത്തില്‍ പങ്കെടുത്തിട്ടില്ലെന്നായിരുന്നു വിജയരാഘവന്റെ മറുപടി.
പൊതുമരാമത്ത് വകുപ്പില്‍ നിന്ന് കിഫ്ബി വഴിയുള്ള പദ്ധതികള്‍ക്ക് അനാവശ്യ കാലതാമസം വരുന്നുവെന്ന ആക്ഷേപം നേരത്തേ മുതല്‍ ഭരണകക്ഷിയില്‍ ശക്തമാണ്. പത്തനാപുരം മണ്ഡലത്തിലെ റോഡ് നിര്‍മ്മാണവുമായി ബന്ധപ്പെട്ട് കെ.ബി. ഗണേശ് കുമാര്‍ വിഷയത്തില്‍ നിയമസഭയിലൊരിക്കല്‍ ആഞ്ഞടിച്ചപ്പോള്‍, അതില്‍ കാര്യമുണ്ടെന്ന് വാദിച്ച് ഗണേശിനെ ഷംസീര്‍ പിന്തുണച്ചിരുന്നു. സഭയുടെ കഴിഞ്ഞ സമ്മേളനത്തിലായിരുന്നു ഇത്. നടപ്പുസമ്മേളനത്തിലാണ് നിയമസഭയില്‍ ചോദ്യോത്തരവേളയില്‍ മറുപടിക്കിടെ, കരാറുകാര്‍ക്കെതിരെ മന്ത്രി റിയാസ് വിമര്‍ശനമുയര്‍ത്തിയത്. സ്വന്തം മണ്ഡലത്തിലെ കരാറുകാരുമായി എം.എല്‍.എമാര്‍ വരുന്നതില്‍ തെറ്റില്ലെന്നും മറ്റ് മണ്ഡലങ്ങളിലെ കാര്യത്തിന് വരേണ്ടെന്നുമാണ് താന്‍ നിയമസഭയില്‍ പറഞ്ഞതെന്നാണ് മന്ത്രി റിയാസ് ഇന്നലെ പ്രതികരിച്ചത്.
തുടര്‍ഭരണം കിട്ടിയ സാഹചര്യത്തില്‍ എല്ലാവരും കൂടുതല്‍ വിനയാന്വിതരാകണമെന്ന പാര്‍ട്ടി മാര്‍ഗരേഖയുള്ളപ്പോള്‍ അഹങ്കാരത്തോടെ മറുപടി പറയുന്നത് ശരിയല്ലെന്നു ഷംസീര്‍ നിയമസഭാകക്ഷിയോഗത്തില്‍ തുറന്നടിച്ചെന്നാണ് വിവരം. പുതിയ അംഗങ്ങള്‍ നിയമസഭയില്‍ കാര്യങ്ങള്‍ പഠിച്ചുപറയണമെന്ന് യോഗത്തില്‍ ആമുഖമായി സംസാരിച്ച പാര്‍ലമെന്ററികാര്യമന്ത്രി കെ. രാധാകൃഷ്ണന്‍ പറഞ്ഞു. പരമാവധി കാര്യങ്ങള്‍ പഠിച്ചാണ് സംസാരിക്കുന്നതെങ്കിലും ചില മന്ത്രിമാരുടെ ഓഫീസില്‍ നിന്ന് വേണ്ടത്ര വിവരങ്ങള്‍ കിട്ടുന്നില്ലെന്ന് കെ.വി. സുമേഷും അഭിപ്രായപ്പെട്ടിരുന്നു. ഇതും റിയാസിനെതിരെയുള്ള ആരോപണമാണെന്നാണ് സൂചന.
Comments