ന്യൂഡല്ഹി : ഡല്ഹി എയിംസ് ആശുപത്രിയില് ചികിത്സയില് കഴിയുന്ന കേന്ദ്ര വിദേശകാര്യമന്ത്രി സുഷമാ സ്വരാജിന് വൃക്ക നല്കാന് തയ്യാറായി ആയിരങ്ങള് രംഗത്ത്. എയിംസ് ആശുപത്രിയില് പ്രവേശിപ്പിക്കപ്പെട്ടിട്ടുള്ള സുഷമാ സ്വരാജിന് വൃക്കരോഗമാണെന്നും ഇത് പൂര്ണ്ണമായും ഭേദമാകണമെങ്കില് വൈകാതെ തന്നെ വൃക്ക മാറ്റിവയ്ക്കേണ്ടി വരുമെന്നുമുള്ള വാര്ത്ത പുറത്തു വന്നതിനു പിന്നാലെയാണ് നിരവധി പേര് സന്നദ്ധത അറിയിച്ച് രംഗത്തെത്തിയിരിക്കുന്നത്. അതേസമയം, വിവിധ ടെസ്റ്റുകള് നടന്നുകൊണ്ടിരിക്കുകയാണെന്നും അനുകൂലമായ വൃക്ക കണ്ടെത്താന് കഴിഞ്ഞിട്ടില്ലെന്നും ഡോക്ടര്മാര് അറിയിച്ചു.
ഈ മാസം ഏഴിനാണ് സുഷമാ സ്വരാജിനെ ദില്ലി എയിംസ് ആശുപത്രിയില് പ്രവേശിപ്പിച്ചത്. തനിക്ക് വൃക്കരോഗമാണ് എന്നത് ഉള്പ്പെടെയുള്ള ആരോഗ്യസ്ഥിതിയെ കുറിച്ച് മന്ത്രി തന്നെയാണ് ട്വിറ്ററിലൂടെ അറിയിച്ചത്. അതേസമയം, സുഷമ സ്വരാജിന്റെ ആരോഗ്യസ്ഥിതിയില് ആശങ്കപ്പെടാനില്ല എന്നാണ് എയിംസിലെ ഡോക്ടര്മാര് അറിയിച്ചിരിക്കുന്നത്.
