കൊച്ചി: ലിജോ ജോസ് പെല്ലിശേരി സംവിധാനം ചെയ്ത ചുരുളി എന്ന ചലചിത്രത്തിലെ പദപ്രയോഗങ്ങള് അതിഭീകരമാണെന്നു ഹൈക്കോടതി. ചിത്രത്തിലെ ദൃശ്യങ്ങള് പരിശോധിച്ചശേഷം ജസ്റ്റിസ് എന്.നാഗരേഷാണ് ഇക്കാര്യം പറഞ്ഞത്. ചിത്രത്തില് അസഭ്യവാക്കുകളുടെ അമിതപ്രയോഗമുണ്ടായിട്ടുണ്ടെന്നു ചിത്രം പരിശോധിച്ച് വ്യക്തമാക്കിയ ശേഷം കോടതി നിരീക്ഷിച്ചു. ചുരുളി ഒ.ടി.ടി. പ്ലാറ്റ്ഫോമില് നിന്നു പിന്വലിക്കണമെന്നാവശ്യപ്പെട്ട് തൃശൂര് സ്വദേശിനിയായ അഡ്വ. പെഗ്ഗി ഫെന് സമര്പ്പിച്ച ഹര്ജി പരിഗണിക്കവെയാണ് ജസ്റ്റിസ് എന്.നാഗരേഷിന്റെ നിരീക്ഷണമുണ്ടായത്. മോശം ഭാഷാപ്രയോഗങ്ങളുടെ അതിപ്രസരമാണ് ചിത്രത്തിലെന്നും കോടതി ചൂണ്ടിക്കാട്ടി. ചിത്രത്തിലെ പദപ്രയോഗങ്ങള് പൊതുസമൂഹത്തിലെ ശാന്തമായ അന്തരീക്ഷത്തിനു ഭംഗം വരുത്തുന്നവയാണ്. ധാര്മികതയ്ക്കു നിരക്കാത്ത പദപ്രയോഗങ്ങളാണ് ചിത്രത്തിലെന്നും കോടതി വിലയിരുത്തി. ചിത്രത്തില് ഉപയോഗിച്ചിരുന്ന മോശം പദപ്രയോഗങ്ങള് ആരും വീടുകളില് ഉപയോഗിക്കാന് താല്പര്യപ്പെടുന്ന തരത്തിലുള്ളതല്ലെന്നും കോടതി വ്യക്തമാക്കി.
വിഷയത്തില് കേന്ദ്ര സെന്സര് ബോര്ഡ്, സംവിധായകന് ലിജോ ജോസ് പെല്ലിശേരി, നടന് ജോജു ജോര്ജ് എന്നിവര് ഉള്പ്പടെയുള്ളവര്ക്ക് കോടതി വിശദീകരണം ബോധിപ്പിക്കുന്നതിനു നോട്ടീസ് അയച്ചു. എന്നാല് ചുരുളി സെന്സര് ചെയ്ത സിനിമയല്ല എന്ന് കേന്ദ്ര സെന്സര് ബോര്ഡ് കോടതിയെ അറിയിച്ചിട്ടുണ്ട്. രാജ്യാന്തരമേളകളില് തന്നെ ശ്രദ്ധനേടിയ ചുരുളി അടുത്തിടെയാണ് സോണി ലൈവിലൂടെ പ്രേക്ഷകരിലേക്ക് എത്തിയത്. സിനിമാറ്റോഗ്രാഫ് ആക്ട് 1952, സര്ട്ടിഫിക്കേഷന് റൂള്സ് 1983 കേന്ദ്രസര്ക്കാര് മാര്ഗ നിര്ദേശങ്ങള് പ്രകാരം സിനിമയില് അവശ്യമായ മാറ്റങ്ങള് നിര്ദ്ദേശിച്ച് എ സര്ട്ടിഫിക്കറ്റാണ് സെന്സര് ബോര്ഡ് ചുരുളിക്കു നല്കിയത്. എന്നാല് മാറ്റങ്ങള് വരുത്താതെയാണ് ചിത്രം ഒ.ടി.ടിയിലൂടെയാണ് പുറത്തുവന്നത് എന്നായിരുന്നു സെന്സര് ബോര്ഡ് വിശദീകരണം.
സ്ത്രീകളെയും കുട്ടികളെയും അപമാനിക്കുന്ന തരത്തിലുള്ള പദപ്രയോഗങ്ങളാണ് ചിത്രത്തിലുതെന്നു ഹര്ജിക്കാരി കോടതിയില് വാദമുന്നയിച്ചു. ചിത്രം ജനങ്ങളെ സ്വാധീനിക്കപ്പെടുന്ന തരത്തിലുള്ള ഒരു കലയാണെന്നും ഹര്ജിക്കാരി ചൂണ്ടിക്കാട്ടി. സിനിമകളിലെ വാചകങ്ങളാണ് അനുകരണ കലാകാരന് അനുകരിക്കുന്നത്. അത്തരത്തിലുള്ള അനുകരണങ്ങള് പോലും സമൂഹത്തിന്റെ ധാര്മികതയെ ബാധിക്കുമെന്നും ഹര്ജിക്കാരി വ്യക്തമാക്കി.
