ഇരുകാലുകളും തളര്ന്ന യുവാവ് 24 മണിക്കൂറു കൊണ്ട് 215 കിലോമീറ്റര് വീല്ചെയറില് സഞ്ചരിച്ച് ഗിന്നസ് റെക്കോര്ഡ് സ്വന്തമാക്കി. ഒഡീഷയിലെ പുരി സ്വദേശിയായ 28-കാരന് കമല കാന്ത നായക് എന്ന യുവാവാണ് ഈ നേട്ടം സ്വന്തമാക്കിയത്. 2007-ല് പോര്ച്ചുഗലിലെ മരിയോ ട്രിനിഡാഡ് എന്ന വ്യക്തി വില്ല റിയല് സ്റ്റേഡിയത്തില് വെച്ച് 24 മണിക്കൂര് കൊണ്ട് 182 കിലോമീറ്റര് താണ്ടി സ്ഥാപിച്ച റെക്കോര്ഡാണ് കമല കാന്ത് തകര്ത്തത്.
ഇരുകാലുകളും തളര്ന്ന കമലകാന്ത് സഞ്ചരിച്ചത് ചെന്നൈയിലെ ഇന്ത്യന് ഇന്സ്റ്റിറ്റ്യൂട്ട് ഓഫ് ടെക്നോളജി നിര്മ്മിച്ച നിയോഫൈ വീല്ചെയറിലാണ്. കമല കാന്തിന്റെ ശരീരത്തിന് അനുയോജ്യമായ സൗകര്യവും മറ്റ് ഘടകങ്ങളും ചേര്ത്ത് കൊണ്ടാണ് വീല്ചെയര് രൂപകല്പന ചെയ്തതെന്ന് ആര്2ഡി2വിന്റെ മേധാവി സുജാത ശ്രീനിവാസന് പ്രമുഖ മാധ്യമത്തോട് വ്യക്തമാക്കി.
ഗുരുത്വാകര്ഷണ കേന്ദ്രം മുതല് ചക്രത്തിന്റെ വലുപ്പം വരെയുള്ള കാര്യങ്ങള് രൂപകല്പ്പനയെ സ്വാധീനിച്ച ഘടകങ്ങളാണ്. കൂടാതെ വീലുകളും ഭാരവും നായകിന്റെ ശരീരത്തിന് അനുസരിച്ചാണ് ക്രമീകരിച്ചത്. ലോക റെക്കോര്ഡ് സ്ഥാപിക്കുന്നതിന് മുമ്പ് നായക് നാല് വര്ഷത്തിലേറെ ഈ നിയോഫ്ലൈ വീല്ചെയറില് സ്വയം പരിശീലനം നടത്തിയിരുന്നതായി ഐഐടി മദ്രാസ് പറഞ്ഞു.
ഐഐടി മദ്രാസിന്റെ ടിടികെ സെന്റര് ഫോര് റീഹാബിലിറ്റേഷന് റിസര്ച്ച് ആന്ഡ് ഡിവൈസ് ഡെവലപ്മെന്റും അതിന്റെ സ്റ്റാര്ട്ടപ്പായ നിയോമോഷനും സംയുക്തമായാണ് കഴിഞ്ഞ വര്ഷം ഭിന്നശേഷിക്കാര്ക്കായി മോട്ടോര് ഘടിപ്പിച്ച വീല്ചെയര് വികസിപ്പിച്ചത്. നിയോബോള്ട്ട് എന്നറിയപ്പെടുന്ന ഈ വീല്ചെയര് സ്വന്തമായി യാത്ര ചെയ്യാന് ഭിന്നശേഷിക്കാരെ സഹായിക്കാനായി രൂപകല്പ്പന ചെയ്തിട്ടുള്ളതാണ്.
മോട്ടോര് ഘടിപ്പിച്ച മെഷീന് വീല്ചെയറില് നിന്ന് ആവശ്യമെങ്കില് വേര്പെടുത്തി ഉപയോഗിക്കാനും സാധിക്കും. നിയോബോള്ട്ട് നിയോഫ്ളൈയെ സുരക്ഷിതമായി ഉപയോഗിക്കാന് കഴിയുന്നതാക്കുന്നതോടൊപ്പം ഏത് റോഡിലൂടെയും ഓടിക്കാന് കഴിയുന്ന വാഹനമാക്കി മാറ്റുകയും ചെയ്യുന്നു. പരുക്കന് റോഡുകളിലൂടെയോ കുത്തനെയുള്ള ചരിവുകളിലൂടെയും ഈ വാഹനം ഓടിക്കാം. വാഹന നികുതി ഉള്പ്പെടെ 95,000 രൂപയ്ക്ക് ഈ മോട്ടോറൈസ്ഡ് വീല്ചെയര് ലഭ്യമാണ്.
