സ്വന്തം വീട് ജപ്തി ചെയ്യുമ്പോള് അലറിക്കരഞ്ഞ് തടയാന് ശ്രമിക്കുന്ന പത്ത് വയസ്കാരന് ആദിത്യന്റെ ചിത്രങ്ങള് ഒരിക്കല് മാധ്യമങ്ങളില് വാര്ത്തയായിരുന്നു. 2019 ഒക്ടോബര് 15നായിരുന്നു അത്. വര്ഷങ്ങള് പിന്നിടുമ്പോള് ഇന്ന് ആദിത്യന് സിനിമയിലേക്ക് അരങ്ങേറ്റം കുറിക്കാന് ഒരുങ്ങുകയാണ്. നവ്യാ നായര് കേന്ദ്രകഥാപാത്രമാകുന്ന ചിത്രത്തില് ആദിത്യനും ഭാഗമാകുന്ന കാര്യം താരം തന്നെയാണ് സാമൂഹിക മാധ്യമങ്ങളിലൂടെ അറിയിച്ചത്. 'ഒരുത്തീ'യിലെ അപ്പു എന്ന കഥാപാത്രം ചെയ്യാന് ജീവിതത്തിന്റെ കൊടുംചൂട് തൊട്ടറിഞ്ഞ ആദിത്യനല്ലാതെ മറ്റാരുണ്ടെന്ന് താരം ഫേസ്ബുക്കില് കുറിച്ചു.
ഫേസ്ബുക്ക് കുറിപ്പ് ഇങ്ങനെ,
ഇത് ആദിത്യന്. എന്റെ (മണിയുടെ) സ്വന്തം അപ്പു. ആദിത്യനെ നിങ്ങള്ക്കും അറിയാം. 2019 ഒക്ടോബര് 15 ന് ആദിത്യനെക്കുറിച്ച് ഒരു വാര്ത്ത മാതൃഭൂമി ഓണ്ലൈന് പ്രസിദ്ധീകരിച്ചു.
കുന്നംകുളത്തിനടുത്ത് ഒരു വീട് ജപ്തി ചെയ്യുന്നു. അച്ഛനും അമ്മയും സ്ഥലത്തില്ല. നിയമം നടപ്പിലാക്കാന് ചുമതലപ്പെട്ട പോലീസ് സംഘം കോടതി ഉത്തരവു പ്രകാരം വീട് ഒഴിപ്പിക്കാന് ശ്രമിക്കുന്നു. വീട്ടുസാധനങ്ങള് പുറത്തേക്കിടുന്നു. പൊലീസ് സംഘഞ്ഞെ പത്തു വയസ്സുള്ള ആദിത്യന് അലറിക്കരഞ്ഞ് തടയാന് ശ്രമിക്കുന്നു. പൊലീസുകാരാവട്ടെ ആദിത്യനെ എടുത്തു മാറ്റി 'നിയമം നടപ്പിലാക്കുന്നു.'ചുറ്റും കൂടിയ മനുഷ്യര് നിസ്സഹായരായി എല്ലാം കണ്ടു നില്ക്കുന്നു.
ഈ സമയത്താണ് മാതൃഭൂമിയുടെ ഫോട്ടോഗ്രാഫര് ഫിലിപ്പ് ജേക്കബ് മറ്റൊരു അസൈന്മെന്റ് കഴിഞ്ഞ് ആ വഴി വരുന്നത്.ആള്കൂട്ടം കണ്ട് വണ്ടി നിര്ത്തിയ ഫിലിപ്പ് അവിടുത്തെ രംഗങ്ങള് ക്യാമറയിലാക്കി. അന്നു വൈകിട്ട് അത് ഒരു വാര്ത്തയായി. പൊലീസുകാര് പിടിച്ചു മാറ്റുന്ന ആദിത്യന്റെ കൈയ്യില് അതുവരെ അവന് വളര്ത്തിയ പക്ഷി കുഞ്ഞുങ്ങളില് ഒന്നിനെ കരുതലോടെ അടക്കി പിടിച്ചിരിക്കുന്നു.സ്വന്തം കൂട് ഇല്ലാതാവുമ്പോഴും ആ പക്ഷിക്കുഞ്ഞിനെ അവന് വിട്ടുകളയുന്നില്ല!ഈ ചിത്രവും വാര്ത്തയും വൈകുന്നേരം ലോകം കണ്ടു.
'ഒരുത്തി'യുടെ കാസ്റ്റിംഗ് തിരക്കുകളിലായിരുന്ന തിരക്കഥാകൃത്ത് സുരേഷേട്ടന് അന്നു വൈകിട്ട് എന്നെ വിളിച്ചു...' മണീ...(ഒരുത്തിയില് എന്റെ കഥാപാത്രത്തിന്റെ പേര്) നമ്മുടെ അപ്പൂനെ കിട്ടി'. സുരേഷേട്ടന് അയച്ച ഫോട്ടോയും വാര്ത്തയും ഞാന് നോക്കി. എന്റെ കണ്ണു നിറഞ്ഞു . ജീവിതത്തിന്റെ കൊടും ചൂട് തൊട്ടറിഞ്ഞ ഇവനല്ലാതെ എന്റെ അപ്പുവാകാന് മറ്റാര്..?
