ദിമാപൂര്: ഏറെ ചര്ച്ച ചെയ്യപ്പെട്ട അനേകം തിരിവുകള്ക്കും മറിവുകള്ക്കും ശേഷം നാഗാലാന്റ് ദിമാപൂര് വിമാനത്താവളത്തില് നിന്നും കാണാതായ മൂന്നരക്കോടിയുടെ പഴയ നോട്ട് ആദായ നികുതിവകുപ്പ് കണ്ടെത്തി. സിനിമയെ വെല്ലുന്ന നാടകീയതകള് നിറഞ്ഞ സംഭവത്തില് വ്യാപകമായ തെരച്ചിലിന് ഒടുവിലാണ് കണ്ടെത്തിയത്. അസാധുവാക്കിയ പഴയ നോട്ടുകള് ഉള്പ്പെട്ട കെട്ടായിരുന്നു ഇത്.
ബീഹാറിലെ ഹിസ്സാറില് നിന്നും വിമാനം ചാര്ട്ട് ചെയ്ത് തനിയെ യാത്ര ചെയ്യുകയും വിമാനത്താവള സുരക്ഷാ വിഭാഗം പിടികൂടി ആദായ നികുതിവകുപ്പിന് കൈമാറുകയും പിന്നീട് അവര് വിട്ടയയ്ക്കുകയും ചെയ്ത ബിസിനസുകാരനില് നിന്നുമാണ് സംഭവങ്ങളുടെ തുടക്കം. കള്ളപ്പണമെന്ന് സംശയിക്കപ്പെടുന്ന സാഹചര്യത്തില് ഒരാള് തനിച്ച് വിമാനം ചാര്ട്ട് ചെയ്ത് പറക്കുന്നു എന്ന രഹസ്യ വിവരത്തിന്റെ അടിസ്ഥാനത്തിലാണ് ദിമാപൂര് ബിസിനസുകാരനെ പിടികൂടിയത്.
ദിമാപൂര് വിമാനത്താവളത്തില് നിന്നും സിഐഎസ്എഫ് പിടികൂടിയ ഇയാളെ പിന്നീട് ആദായ നികുതി വിഭാഗത്തിന് കൈമാറുകയും നികുതിയുമായി ബന്ധപ്പെട്ട രേഖകള് കാണിക്കണമെന്ന് ആവശ്യപ്പെട്ട് വിട്ടയയ്ക്കുകയും ചെയ്തിരുന്നു. എന്നാല് വിവരം ആദായ നികുതിയുടെയും സെന്ട്രല് ബോര്ഡ് ഓഫ് ഡയറക്ട് ടാക്സിന്റെയും ഉദ്യോഗസ്ഥര് ചര്ച്ച ചെയ്യുകയും ഇയാള്ക്കും ഇയാളുടെ പണത്തിനു വേണ്ടി തെരച്ചില് ആരംഭിക്കുകയുമായിരുന്നു.
സിഐഎസ്എഫ് നല്കിയ ടെലിവിഷന് ദൃശ്യങ്ങളുടെ പശ്ചാത്തലത്തില് കാണാതായ പണത്തിനായി അന്വേഷണം നടത്തിയ സിബിഡിറ്റി, ഐടി ഉദ്യോഗസ്ഥര് ഒടുവില് പണം കണ്ടെത്തുകയായിരുന്നു. ദിമാപൂര് ബിസിനസുകാരനുമായി ബന്ധപ്പെട്ട കേന്ദ്രങ്ങളില് പരിശോധന നടത്തിയ ആദായനികുതി ഉദ്യോഗസ്ഥര് 3.5 കോടി രൂപ കണ്ടെത്തുകയായിരുന്നു. ഇതിനൊപ്പം പഴയ 500 ന്റെയും 1000 ന്റെയും അസാധുവാക്കിയ നോട്ടുകള് അടങ്ങിയ 4.47 കോടി രൂപയും പിടിച്ചെടുത്തു.
