മമ്മൂട്ടിയുടെ ഏറ്റവും പുതിയ സിനിമയായ ‘ഭീഷ്മപര്വ്വം’ തിയേറ്ററുകളില് മികച്ച പ്രതികരണം നേടി മുന്നേറുകയാണ്. അമല് നീരദ് സംവിധാനം ചെയ്ത ഈ ചിത്രം ക്യാരക്ടര് പോസ്റ്ററിലൂടെ തന്നെ പ്രേക്ഷകപ്രീതി നേടിയതാണ്. അതുകൊണ്ടു തന്നെ പ്രേക്ഷകരുടെ ഭാഗത്തു നിന്ന് നല്ല അഭിപ്രായം തന്നെയാണ് കിട്ടിക്കൊണ്ടിരുന്നത്. ഇപ്പോഴിതാ ഒരു അഭ്യര്ത്ഥനയുമായി എത്തിയിരിക്കുകയാണ് സംവിധായകന് അമല് നീരദ്.
‘‘മഹാമാരിയുടെ കാലത്ത് ഒരുപാട് പ്രയത്നിച്ചാണ് ഞങ്ങൾ ഈ സിനിമ ചിത്രീകരിച്ചത്, എല്ലാ പ്രൗഢിയോടെയും ഇത് തിയേറ്ററുകളിൽ കാണണമെന്നും മൊബൈൽ ഫോണിൽ ചിത്രീകരിച്ച ചിത്രത്തിന്റെ ഭാഗങ്ങൾ അപ്ലോഡ് ചെയ്യരുതെന്നും ഞങ്ങൾ നിങ്ങളോട് ഓരോരുത്തരോടും അഭ്യർത്ഥിക്കുന്നു. ഞങ്ങളുടെ ഭാഗത്ത് നിന്ന് ഒരു എളിയ അപേക്ഷ. ദയവായി വരൂ, ചിത്രം തിയേറ്ററുകളിൽ കണ്ട് ആസ്വദിക്കൂ 🙏🏽’’ ഫെയ്സ് ബുക്കിലൂടെയാണ് അമല് നീരദ് ഇക്കാര്യം പ്രേക്ഷകരുമായി പങ്കുവച്ചിരിക്കുന്നത്.
അമല് നീരദ് പ്രൊഡക്ഷന്സിന്റെ ബാനറിലാണ് സിനിമയുടെ നിര്മാണം. അമല് നീരദും ദേവദത്ത് ഷാജിയും ചേര്ന്നാണ് ‘ഭീഷ്മ പര്വ’ത്തിന്റെ തിരക്കഥ എഴുതിയിരിക്കുന്നത്. ഫര്ഹാന് ഫാസില്, ഷൈന് ടോം ചാക്കോ, ദിലീഷ് പോത്തന്, അബു സലിം, പദ്മരാജ് രതീഷ്, ഷെബിന് ബെന്സണ്, ലെന, സ്രിദ്ധ, ജിനു ജോസഫ്, വീണ നന്ദകുമാര്, ഹരീഷ് പേരടി, അനസൂയ ഭരദ്വാജ്, മാല പാര്വ്വതി തുടങ്ങി വലിയ താരനിരയാണ് ചിത്രത്തില് അണിനിരന്നിരിക്കുന്നത്. എ ആൻഡ് എയാണ് ചിത്രത്തിന്റെ വിതരണം. വിവേക് ഹര്ഷൻ ആണ് ചിത്രത്തിന്റെ ചിത്രസംയോജനം. ആനന്ദ് സി ചന്ദ്രനാണ് ചിത്രത്തിന്റെ ഛായാഗ്രാഹണം നിര്വഹിച്ചിരിക്കുന്നത്. സുഷിൻ ശ്യാം ആണ് ചിത്രത്തിന്റെ സംഗീത സംവിധാനം നിര്വഹിച്ചിരിക്കുന്നത്.
സ്റ്റൈലിഷായ മമ്മൂട്ടിയെ ചിത്രത്തിലൂടെ വീണ്ടും കാണാനാകുന്നു എന്നാണ് ‘ഭീഷ്മപര്വ്വം’ കണ്ട പ്രേക്ഷകരുടെ അഭിപ്രായം. സംവിധായകൻ അമല് നീരദിന്റെ സ്റ്റൈലിഷ് മേക്കിംഗ് തന്നെയാണ് ഭീഷ്മ പര്വത്തിന്റെ പ്രധാന ആകര്ഷണം. ക്രൈം ഡ്രാമയായിട്ടാണ് ചിത്രം എത്തിയിരിക്കുന്നതെങ്കിലും വൈകാരികാംശങ്ങളുള്ള കുടുംബ കഥയും ചിത്രത്തില് ഇഴചേര്ന്ന് നില്ക്കുന്നു.
ക്രൈം ത്രില്ലര് വിഭാഗത്തിലുള്ള ചിത്രമായ ‘പുഴു’വെന്ന ചിത്രമാണ് മമ്മൂട്ടിയുടേതായി ഇനി വൈകാതെ റിലീസ് ചെയ്യാനുള്ളത്.
