മറ്റ് ജയിലുകളില് നിന്ന് വ്യത്യസ്തമായി ഒരു ജയില് ഒരുങ്ങുന്നു. യുകെയിലെ വെല്ലിംഗ്ബറോ, നോര്ത്താംപ്ടണ്ഷെയറിലാണ് ഈ പുനരധിവാസ സ്ഥാപനം സ്ഥിതി ചെയ്യുന്നത്. ഒരു കൂട്ടം ജയില് നിയമങ്ങളുള്ള ആദ്യത്തെ 'മെഗാ ജയില്' ആയി മാറാനാണ് ഇവിടം തയ്യാറെടുക്കുന്നത്. ഈ ജയിലില് തടവിലാക്കപ്പെട്ട ആദ്യത്തെ തടവുകാരന് കഴിഞ്ഞ മാസമാണ് എത്തിയത്. ഇപ്പോള് ഇവിടെ നിവാസികളുടെ എണ്ണം 137 ആയി വര്ദ്ധിച്ചു. ഇവിടെ അന്തേവാസികളെ 'ജയില്പുള്ളികള്' എന്നല്ല മറിച്ച് 'താമസക്കാര്' എന്നാണ് ഇവിടുത്തെ ജോലിക്കാര് വിളിക്കുന്നത്. 'തടവുമുറികളെ' വിളിക്കുന്നത് അവരുടെ 'മുറികള്' എന്നാണ്. 'സെല്ലി'ന് പകരമാണ് ഇവയെ 'മുറികള്' എന്ന് അഭിസംബോധന ചെയ്യുന്നത്.
1700 പേരെ ഉള്ക്കൊള്ളാനാവുന്ന സ്ഥലം ഇതിനകത്തുണ്ട്. അതിനൊപ്പം തന്നെ വിവിധ പരിശീലനങ്ങളും ഇവിടെ നടക്കുന്നു. അതില് ബാര്ബര്, ബൈക്ക് റിപ്പയര്, കാര് മെയിന്റനന്സ്, കോഡിംഗ്, പ്ലംബിംഗ്, പ്രിന്റിംഗ് എന്നിവയ്ക്കുള്ള പരിശീലനം ഉള്പ്പെടുന്നു. അതോടൊപ്പം തന്നെ അന്തേവാസികള്ക്കായി ഒരു 'പെറ്റ് തെറാപ്പി' സെഷനും ഇവിടെയുണ്ട്. അതിലൂടെ പെറ്റുകള്ക്കൊപ്പമുള്ള തെറാപ്പിയാണ് അന്തേവാസികള്ക്ക് ലഭിക്കുക. ഇനിയൊരിക്കലും അവര് കുറ്റം ചെയ്യാതെ നല്ല രീതിയില് ജീവിക്കുന്നതിലേക്ക് അവരെ മാറ്റുക എന്നതും റീഹാബിലിറ്റേഷന് സെന്ററുകളായി പരിണമിക്കുന്ന ഈ ജയിലിന്റെ ലക്ഷ്യത്തില് പെടുന്നു.
അന്തേവാസികളെ ഏറ്റവും മികച്ച വ്യക്തിയാകാന് പ്രോത്സാഹിപ്പിക്കുകയും ശാക്തീകരിക്കുകയും ചെയ്യുന്ന ഒരു ജയില് എനിക്ക് വേണം. അതിലേക്കുള്ള ഒരു ചെറിയ ചുവടുവയ്പ്പാണിത്. അവരെ തടവുകാരെന്നോ കുറ്റവാളികളെന്നോ പരാമര്ശിക്കാതിരിക്കുന്നത് വളരെ നല്ലൊരു റിസള്ട്ട് ഉണ്ടാക്കുമെന്ന് ഞാന് പ്രതീക്ഷിക്കുന്നു. അത് വേറൊരു തരം സംസ്കാരം ഉണ്ടാക്കുകയും ധാര്മ്മികത പുലര്ത്തുകയും ചെയ്യുമെന്ന് ഗവര്ണര് ജോണ് മക്ലാഫ്ലിന് പറയുന്നു.
