നിത്യഹരിത നായകനായി മലയാളികളുടെ മനസ്സില് എന്നും തിളങ്ങുന്ന നടനാണ് കുഞ്ചാക്കോ ബോബന്. ‘ഭീമന്റെ വഴി’യാണ് താരത്തിന്റേതായി ഒടുവില് പുറത്തിറങ്ങിയ ചിത്രം. സോഷ്യല് മീഡിയയില് സജീവ സാന്നിധ്യമാണ് ചാക്കോച്ചന്. സിനിമാവിശേഷങ്ങള് മാത്രമല്ല രസകരമായ പോസ്റ്റുകളും താരം ഇതിലൂടെ ഷെയര് ചെയ്യാറുണ്ട്. ഇപ്പോഴിതാ താരം സമൂഹമാദ്ധ്യമങ്ങളില് ചര്ച്ചയായത് തെങ്ങിന്റെ മണ്ടയില് കയറിയതോടെയാണ്.
ഹോളിദിനത്തില് ഹോളിഡേ ഫണ് എന്ന തലക്കെട്ടോടെ പങ്കുവെച്ച ചാക്കോച്ചന്റെ ഫേസ്ബുക്ക് പോസ്റ്റാണ് ഇപ്പോഴത്തെ ചര്ച്ചാ വിഷയം. കരിക്ക് ഷെയ്ക്ക് കുടിക്കാന് മോഹം തോന്നി തെങ്ങില് കയറിയെന്ന് പറഞ്ഞ് ചാക്കോച്ചന് പങ്കുവെച്ച ചിത്രങ്ങള് നിമിഷനേരം കൊണ്ടാണ് വൈറലായത്.
‘‘ഒരു കരിക്ക് ഷേക്ക് കുടിക്കാൻ മോഹം..ഒന്നും നോക്കിയില്ല !! അപ്പൊത്തന്നെ തെങ്ങു കേറി....കരിക്കിട്ടു ...ഷെയ്ക്കടിച്ചു ഉണ്ടാക്കി...കുടിച്ചു !!!
ആഗ്രഹങ്ങൾ മാറ്റിവെക്കരുത് ...
പരിശ്രമിച്ചു ,അപ്പോൾത്തന്നെ സാധിക്കണം!!
ഇങ്ങനെ ക്യാപ്ഷന് നല്കിയാണ് ചാക്കോച്ചന് ഫേസ്ബുക്ക് പോസ്റ്റ് ഷെയര് ചെയ്തത്. ഇതോടൊപ്പം തെങ്ങില് കയറുന്ന ചിത്രങ്ങളും മുകളില് ഇരുന്നുകൊണ്ട് കരിക്ക് പിരിക്കുന്ന ചിത്രവും താരം പങ്കുവെച്ചിട്ടുണ്ട്. ഒപ്പം ഷെയ്ക്ക് കുടിക്കുന്ന ചിത്രം പങ്കുവെക്കാനും താരം മറന്നില്ല.
എന്നാല് നടന് തെങ്ങില് കയറുന്നതായി അഭിനയിക്കുകയാണെന്നാണ് ഫോളോവേഴ്സായ ഒരു കൂട്ടരുടെ വാദം. മറ്റ് ചിലര് താരത്തിന്റെ നേരംപോക്കിനെ അഭിനന്ദിക്കുകയും ചെയ്തു. എയറില് കയറിയ ചാക്കോച്ചന് ഫേസ്ബുക്ക് പോസ്റ്റിട്ടതോടെ വീണ്ടും എയറില് കയറ്റിയിരിക്കുകയാണ് ആരാധകര്.
