തിരുവനന്തപുരം: സര്ക്കാര് സ്ഥാപനങ്ങളുടെ ദൈനംദിന വരുമാനം നിക്ഷേപിക്കുവാന് ജില്ലാ സഹകരണ ബാങ്കുകളില് അക്കൗണ്ട് തുറക്കുമെന്ന് ധന മന്ത്രി ഡോ. തോമസ് ഐസക്. ദില്ലിയില് ജി എസ് ടി ചര്ച്ചക്കെത്തിയ ധന മന്ത്രി മാധ്യമങ്ങളോട് സംസാരിക്കുകയായിരുന്നു. ഇതു സംബന്ധിച്ച് മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തി ആദിമ അന്തിമ തീരുമാനമെടുക്കുമെന്നും ധന മന്ത്രി പറഞ്ഞു. സഹകരണ റെജിസ്ട്രര് ഇത്തരമൊരു പദ്ധതി സര്ക്കാരിന് സമര്പ്പിച്ചതായി കഴിഞ്ഞ ദിവസം മംഗളം റിപ്പോര്ട്ട് ചെയ്തിരുന്നു.
പൊതുമേഖലാ സ്ഥാപനങ്ങളടക്കം സര്ക്കാര് സ്ഥാപനങ്ങളുടെ ദൈനം ദിന വരുമാനം സഹകരണ ബാങ്കുകളിലെ അക്കൗണ്ടില് നിക്ഷേപിക്കുവാനും, അവിടെ നിന്നും ട്രഷറിയിലേക്കു നിക്ഷേപിക്കുമെന്നുമുള്ള ഒരു ശുപാര്ശ സഹകരണ റെജിസ്ട്രര് സര്ക്കാരിന് നല്കിയിരുന്നു. സഹകരണ വകുപ്പും ധനവകുപ്പും ഇക്കാര്യം വിശദമായി ചര്ച്ച ചെയ്തിരുന്നു. ജില്ലാ സഹകരണ ബാങ്കുകളില് അക്കൗണ്ട് തുടങ്ങുന്നതിനു മുഖ്യമന്ത്രിയുടെയും മന്ത്രിസഭയുടെയും അന്തിമ അനുമതി കൂടി ആവശ്യമുണ്ട്. പദ്ധതി നടപ്പായാല് കെ എസ് ആര് ടി സി, ബീവറേജസ് കോര്പറേഷന് , ഭാഗ്യക്കുറി വകുപ്പ്, സിവില് സപ്ലൈസ്, പോലീസ്,തുടങ്ങി സ്ഥാപനങ്ങളുടെ ദൈനം ദിന വരുമാനവും, മറ്റു വരുമാനവും ജില്ലാബാങ്കുകളിലാകും നിക്ഷേപിക്കുക.
