ഗുരുഗ്രാം: ലോക്സഭ മുന് സെക്യുരിറ്റി ഡെപ്യൂട്ടി ജനറലിനെ തെറ്റിദ്ധരിപ്പിച്ച് കോടികള് തട്ടിയെടുത്തുവെന്ന പരാതിയില് പ്രമുഖ ബാങ്കിലെ ജീവനക്കാരനും ഭാര്യയ്ക്കുമെതിരെ കേസ്. ബാങ്കില് കോടികള് നിക്ഷേപിക്കുന്നത് നിയമനടപടിക്ക് ഇടയാക്കുമെന്ന് തെറ്റിദ്ധരിപ്പിക്കുകയും ആ പണം മ്യൂച്ചല് ഫണ്ടിലും ഓഹരികളിലും നിക്ഷേപിക്കണമെന്നും പറഞ്ഞാണ് പണം തട്ടിയെടുത്തത്.
ബി.എല് അഹുജ (84)നാണ് പണം നഷ്ടപ്പെട്ടത്. ഗുരുഗ്രാം സെക്ടര് 43ലെ താമസക്കാരനാണ് ഇദ്ദേഹം. 2000ല് ലോക്സഭ സെക്യുരിറ്റി ഡെപ്യൂട്ടി ജനറലായി വിരമിച്ചയാളാണ് ഇദ്ദേഹം.
2013 മുതലാണ് ഇദ്ദേഹം കബളിപ്പിക്കലിന് ഇരയായത്. അന്ന് ഐസിഐസിഐ ബാങ്ക് ജീവനക്കാരനായിരുന്ന അഭിഷേക് മഹേശ്വരിയും ഭാര്യയും ചേര്ന്നാണ് പണം തട്ടിയെടുത്തത്. നിലവില് ആക്സിസ് ബാങ്കിലാണ് അഭിഷേക് മഹേശ്വരി ജോലി ചെയ്യുന്നതെന്ന് പോലീസ് അറിയിച്ചു.
ബാങ്കില് നിക്ഷേപിക്കുന്നതിനു പകരം പണം മ്യൂച്ചല് ഫണ്ടുകളില് നിക്ഷേപിക്കാന് അഭിഷേക് മഹേശ്വരി ഉപദേശിച്ചു. ഇതുപ്രകാരം 2018ല് അഹുജയില് നിന്ന് ഒരു കോടി രൂപ മൂല്യം വരുന്ന രണ്ട് ചെക്ക് കൈമാറി. വിപ്രോയുടെ ഓഹരികളില് നിക്ഷേപിക്കാമെന്ന് പറഞ്ഞ് 2019 മാര്ച്ചില് 30 ലക്ഷം രൂപയുടെ ചെക്ക് കൂടി അഹുജയില് നിന്ന് കൈപ്പറ്റി.
എന്നാല്, യു.എസിലുള്ള അഹുജയുടെ മകന് നിക്ഷേപത്തിന്റെ സ്റ്റാറ്റസിനെ കുറിച്ച് അഭിഷേകിനെ വിളിച്ച് പല തവണ അന്വേഷിച്ചെങ്കിലും വ്യാജമായ രേഖകള് നല്കി കബളിപ്പിക്കാന് ശ്രമിക്കുകയായിരുന്നു. 2021 ഏപ്രില് നാട്ടിലെത്തിയ മകന്, നിക്ഷേപത്തിന്റെ സ്റ്റാറ്റസ് നല്കാന് ആവശ്യപ്പെട്ടു. അപ്പോഴും വ്യാജമായ വാഗ്ദാനങ്ങള് നല്കി അഭിഷേക് മഹേശ്വരി കബളിപ്പിച്ചുവെന്ന് അഹുജ പറഞ്ഞു.
ഇതോടെ മകന് ഒരു പ്രദേശിക ഓഹരി ഇടപാട് കേന്ദ്രത്തെ സമീപിച്ച് ഇടപാടുകളുടെ സ്റ്റാറ്റസ് പരിശോധിച്ചു. എന്നാല് അഭിഷേകും ഭാര്യ അര്ച്ചനയും ചേര്ന്ന് ഒരു സബ്-ബ്രോക്കേജ് സ്ഥാപനം നടത്തുകയാണെന്നും അഹുജയില് നിന്ന് വാങ്ങിയ അവിടെ നിക്ഷേപിക്കുകയായിരുന്നുവെന്നും കണ്ടെത്തി. അഹുജയുടെ അറിവോ സമ്മതമോ കൂടാതെ അദ്ദേഹത്തിന്റെ അക്കൗണ്ടിന്റെ നിയന്ത്രണവും ഇവര് കരസ്ഥമാക്കി. ഫോണില് നിന്ന് ഒടിപി നമ്പറ് ഉപയോഗിച്ചായിരുന്നു ഈ തട്ടിപ്പ്. ഇതോടെയാണ് കുടുംബം ഇവര്ക്കെതിരെ പരാതി നല്കിയത്.
പ്രതികള്ക്കെതിരെ ഐപിസി 420, 467, 468, 471, 120-ബി, 34 എന്നിവ പ്രകാരം കേസെടുത്തതായി പോലീസ് അറിയിച്ചു.
