ശബരിമല: ശബരിമലയില് ഡ്യൂട്ടിയിലുള്ള പോലീസുകാര്ക്ക് നല്കിയ പൊതുനിര്ദേശങ്ങളില് സര്ക്കാരിനു താക്കീതുമായി ബി.ജെ.പി സംസ്ഥാന അധ്യക്ഷന് കെ.സുരേന്ദ്രന്. നിര്ദേശങ്ങളിലെ ഒന്നാമത്തേതാണ് ബി.ജെ.പി വിമര്ശിക്കുന്നത്. സുപ്രീം കോടതിയുടെ 28/09/2018ലെ വിധിന്യായ പ്രകാരം എല്ലാ തീര്ഥാടകര്ക്കും ശബരിമലയില് പ്രവേശനം അനുവദിക്കപ്പെട്ടുണ്ടെന്ന നിര്ദേശത്തോടാണ് ബി.ജെ.പിക്ക് എതിര്പ്പ്. ഡ്യൂട്ടിയില് ഉള്ള പോലീസുകാര് എല്ലാം ആചാരങ്ങള് പാലിക്കണം എന്നും നിര്ദേശത്തില് പറയുന്നുണ്ട്.
വിശ്വാസികള് ഒരിക്കല് തിരുത്തിച്ചതാണെന്നും വീണ്ടും അവിവേകത്തിന് മുതിര്ന്നാല് പഴയതൊന്നും ഓര്മ്മിപ്പിക്കരുതെന്നും കെ.സുരേന്ദ്രന് ഫെയ്സ്ബുക്ക് പോസ്റ്റിലുടെ മുന്നറിയിപ്പ് നല്കി. ശബരിമലയില് പോലീസിന് നല്കിയ വിവാദ നിര്ദേശം കൊണ്ട് സര്ക്കാര് ഉദ്ദേശിക്കുന്നത് എന്താണെങ്കിലും, അത് മുളയിലെ നുള്ളുന്നതാണ് നല്ലതെന്നും കെ സുരേന്ദ്രന് കൊച്ചിയില് പറഞ്ഞു. ശബരിമലയില് വിശ്വാസികളെ വീണ്ടും വേട്ടയാടാനാണ് ഉദ്ദേശമെങ്കില് വലിയ പ്രത്യാഘാതം ഉണ്ടാക്കും. ഒരിക്കല് കൈപൊള്ളി സര്ക്കാര് അതില് നിന്ന് പിന്മാറിയതാണ്. ശബരിമലയില് വിവിധയിടങ്ങളില് ജോലി ചെയ്യുന്ന പോലീസുകാര്ക്കായാണ് നിര്ദേശങ്ങള് അടങ്ങിയ കൈപ്പുസ്തകം നല്കിയിട്ടുള്ളത്.
